Mose wasola mu sarila Yehova

Ku Ezipte, bantu ba kanda dia Yakobe, bala ba Israele beri batâka. Ha manima ma lufwa lwa Yakobe na lwa Yozefe, Farao yakaka yeri yâlaka. Mu bungu ti bunkuta bwabâ nandi ti bala ba Israele bayôka Bisi-Ezipte mu ngolo, yandi wasa ti babansoni babâ ngamba. Buna, Farao wabatuma mu yirikaka bibiriki na mu salaka bisalu bia ngolo ku misitu. Kâ, Bisi-Ezipte bu beri ba sarisaka bisalu bia ngolo, bala ba Israele mpe ni funana kwa beri funanaka. Bala ba Israele bayizi bâ ba nkatika babingi. Musamu wo ka weri’â tâka Farao nsayi ko. Buna yandi walomba ti bahonda bala babansoni ba fioti ba bakala ba bala ba Israele ha mbutukulu’awu. Ntiana bu lendi wa banza, bala ba Israele bunkuta bwabâ nawu.

Mukento wumosi wa kanda dia Israele wu beri tâka nkumbu Yokebede wabuta mwana wumosi wa bakala wa toma. Mu kengerela mwana’andi, yandi wamutûla mu kati dia titunga, mpe wamusweka ku matiti mu ndeko ya nzari ya yinene yi batâka nkumbu Nile. Tibusi tia mwana yo, Miriame, watatamana mu bâ ha ndeko mu mona ntia musamu waketi yôka.

Mwana wa Farao bu wayizi yebela ku nzari, wamona titunga tio. Mu kati, mwana wabâ mô weri dilaka. Yandi wafwila mwana wo tiari. Miriame wamuyula: ‘Ngano zololo ti nadinga muntu wulendi mu yemeka?’ Mwana wa Farao watambula. Miriame waye tâ mbila nguri’andi, Yokebede. Mwana wa Farao wamutêla: ‘Bonga mwana wu, mu yemeka mu bungu dia meno, mpe mbo nikufuta.’

Mwana bu wayizi kula, Yokebede wamunata kwe mwana wa Farao. Mwana wa Farao wamutâ nkumbu Mose, mpe wamukipa ntiana kwa mwana wa yandi beni. Mose ntiana mwana wa mutinu bamusansa, mpe bima biabiansoni bi keri zoloko bia beri mu hanaka. Kâ, Mose ka zimbakana Yehova ko. Yandi wazaba ti mwana Israele kabâ, ka bâ Musi-Ezipte ko. Buna, Mose wasola mu sarila Yehova.

Mose bu kayizi bâ na mvula 40, wasola mu bakisa kanda diandi. Tilumbu timosi, Musi-Ezipte weri twaka mwana Israele. Buna, Mose wamuwinda tima tia ngolo mpe wafwa. Ha manima, wasweka nitu’andi mu dielo. Farao bu kawâ misamu miayôka, wadinga mu honda Mose. Kâ, Mose wadioka ku nsi ya Madiane. Yehova wamukipa ku nsi yîna.