Bawu ka balungisa kani diawu ko

Yehova watâ kwe Mose: ‘Naka kwe meno ku mongo. Mbo nitsoneka misiku ha zulu matari, mpe mbo nikuhana mio.’ Mose wanaka ku mongo mpe wabâ kûna bilumbu 40 na mpimpa 40. Yehova watsoneka misiku mia 10 mia mfunu ha zulu matari, mpe wahana mio kwe Mose. Misiku ni mio batâka Ntumunu Kumi.

Ha manima, bala ba Israele babanza ti Mose wabayambirika. Bawu batâ kwe Arone: ‘Muntu tuta dinga wututwarisa. Tu yirikila nzambi!’ Arone wavutula: ‘Kunganeno ore ye neno.’ Yandi waniengesa ore yo mpe wayirika tifwiti tia mwana ngombe. Bala ba Israele batâ: ‘Mwana ngombe wu ni Nzambi’eto, ni yandi watudukisi ku Ezipte!’ Bawu basambila tifwiti tia mwana ngombe wa ore mpe bayizi sa malaki ma manene. Ngano bubi bwabâ? Diangana bubi bwabâ mu bungu ti bawu kani basa dia sambila kwa Yehova. Ka balungisa kani diawu ko.

Yehova wamona misamu mieri yôkaka, mpe watâ kwe Mose: ‘Koka watala bantu bo. Bawu bakunkolamane; nzambi za bungungu bata sambila.’ Buna, Mose wakoka ku mongo na bibalu bia biole bia matari.

Bu katûla penepene na mbuka ya bâ bala ba Israele, Mose wawâ bantu beri tangaka mikunga. Yandi wamona ti tina beri tinaka, mpe mwana ngombe beri fukamanaka. Mose watomo baka nkesi, walosa bibalu bio bia matari ha mutoto, mpe wabula bio. Mbala mosi mpe, yandi wamwangasa tifwiti tio. Mose wayula kwe Arone: ‘Bwe bantu balendele mu yirika misamu mio mia mbi?’ Arone wavutula: ‘Kubakandi nkesi. Nge beni zebi bwe bantu ba bena. Bawu nzambi yi bêleke nawu nsatu; buna bu mbongeleke ore’awu ni ndoseleke yo ku tiya, mpe mwana ngombe wo wudûkiri!’ Arone ka fweti’â yirika musamu wo ko. Mose wavutu naka ku mongo mpe walomba kwe Yehova mu lemvokela kanda dia Israele.

Yehova walemvokela bô babansoni bazolo mu tumama. Ngano bakuri mu bungu dia nti wabêla nkatika mfunu kwe bala ba Israele mu tumama kwe Mose?