Muti weri lemaka tiya

Mose mvula 40 kasa ku nsi ya Madiane. Yandi wakwela, mpe wabuta bala. Tilumbu timosi, bu keri lundaka bindongo penepene na mongo wa Sinayi, yandi wamona tima timosi tia nzitukulu. Muti weri lemaka tiya, ka weri’â yâka ko! Mose bu kapusana penepene mu tomo tala mu bungu dia nti, wawâ zu dieri tûkaka mu muti dieri mu têlaka: ‘Mose! Kupusandi penepene. Katula mapapa maku mu bungu ti mbuka yi wena, mutoto wa santu wena.’ Yehova weri mu zonzelaka mu nzila ya mbazi.

Mose wayizi bâ na bunkuta, mpe wasweka tidiri. Zu dio diamutêla: ‘Mweni ti bala ba Israele mpasi zazingi bata mona ku Ezipte. Mbo nibavukisa, mpe mbo nibanata ku nsi ya mbote. Ni nge dûkisa kanda diani ku Ezipte.’ Mu mabanza ma nge, Mose nti kasa? Diangana, yandi watomo susumuka.

Mose wayula: ‘Mbo tala ti bantu bakundiyuriri nani kuntambikiri?’ Nzambi wamuvuturila: ‘Ba têla ti Yehova ku tambikiri, Nzambi ya Abrahame, Nzambi ya Izake na Nzambi ya Yakobe.’ Ha manima, Mose wayula: ‘Mbo tala ti ka bakungwirikiri’â ko?’ Buna, Yehova wamusongela ti mbo kaketi mu bakisa. Yehova wamutêla mu losa muti’andi ha mutoto, mpe muti watituka nioka! Mose wasimba nioka ku mutila, mpe nioka yavutu tituka muti. Yehova wamutêla: ‘Bu ba songela tidimbu ti mbo bazaba ti ni meno nikutambikiri.’

Ha manima, Mose watâ: ‘Ka nzebi’â tomo zonza ko.’ Yehova wamukanisina: ‘Mbo nikutêla misamu mi fweti tâ, mpe mpangi’aku Arone mbo kabâ hô mu ku bakisa.’ Mu bungu ti Mose lukwikulu lwabâ nandi ti Yehova mbo kaketi bâ na yandi, wakâla ku Ezipte na mukento’andi, na bala bandi.