Mpasi zitatu za ntete

Bala ba Israele ngamba zabâ, mpe bafweti sala bisalu bia ngolo. Yehova watambika Mose na Arone mu tâ kwe Farao: ‘Bîka kanda diani dienda diakunsambila ku sese.’ Farao wavutula na lulendo: ‘Misamu mi ta tâ Yehova ka miena nani salu ko, ka nibîka bala ba Israele ko benda.’ Buna Farao wabatuma mu vutu tomo sala ngolo. Kâ, Yehova mbo kaketi hana ndongosolo kwe Farao. Ngano zebi bwe? Yehova wanata mpasi za 10 ku nsi ya Ezipte. Yehova watâ kwe Mose: ‘Farao kata kungwila ko. Mbazi mu pari mu ndeko Nile kabâ. Yenda wamumonekena, mpe mu têla ti mu bungu ti ka bikiri’â kanda diani ko dienda, mamba ma Nile mbo matituka menga.’ Mose watumama, mpe waye monekena Farao. Kûna, ha meso ma Farao, Arone wawinda muhangu mu Nile, mpe mamba ma nzari matituka menga. Mbizi zafwa; mamba ma Nile mabatika mu nuka nsunga ya mbi, mpe ka baketi’â vutu ma nwa ko. Kâ, Farao watatamana mu kala mu bîka bala ba Israele benda.

Bilumbu 7 ha manima, Yehova watambika Mose kwe Farao mu tâ: ‘Tala ti kubikiri’â kanda diani ko dienda, biula mbo bikota ku Ezipte.’ Arone wananguna muhangu mpe biula biabatika mu yalangana mu nsi yayansoni. Bantu babatika mu mona biula mu nzo zawu, ku mfulu zawu na mu fure zawu. Biula kwakwansoni biabâ! Buna, Farao watâ kwe Mose: ‘Lomba kwe Yehova kamanisa mpasi zi; nikukanisini ti mbo nibika bala ba Israele benda. Buna, Yehova wasukisa mpasi zango. Bisi-Ezipte batota biula biafwa, mpe bakutakasa bio. Bikunku biabingi bia biula biafwa biabâ mu nsi yayansoni, mpe nsunga ya mbi bieri nukaka. Kâ, Farao wavutu kala mu bîka kanda dia Israele.

Ha manima, Yehova watâ kwe Mose: ‘Arone fweti winda muhangu ha mutoto, mpe mfumfuta ya mutoto mbo yitituka mbu.’ Mbala mosi, mbu zayalangana kwakwansoni. Bisi-Ezipte batâ kwe Farao: ‘Mpasi zi kwe Nzambi zitûkiri.’ Kâ Farao keri’â zolo ko mu bîka bala ba Israele benda.