Mpasi sambanu zalanda

Mose na Arone bahana nsangu zi za Nzambi kwe Farao: ‘Tala ti kubikiri’â kanda diani ko dienda, mbo nitambika mahekwa mu nsi yayansoni.’ Mahekwa, niandi zena za zinene zitâka. Mahekwa mamingi makota mu nzo za Bisi-Ezipte, mu nzo za bamputu na mu nzo za bamvwama. Nsi yayansoni yafuluka mu mahekwa. Ka ku nsi ya Goshene, kweri bâka bala ba Israele, ka kwa bâ mahekwa ko. Mpasi zo za yà na mpasi zalanda, Bisi-Ezipte kwa zabwila. Farao watâ: ‘Têno kwe Yehova kazimbakasa mahekwa ma. Bantu beno balendi kwenda.’ Kâ Yehova bu kazimbakasa mahekwa, Farao wasoba mabanza. Ngano tilumbu tie kô ti kaketi bakula musamu wo?

Ha manima Yehova watâ: ‘Tala ti Farao ka bikiri’â kanda diani ko dienda, bibulu bia Bisi-Ezipte mbo bibaka timbevo, mpe mbo bifwa.’ Musamu ni wo watûla mu tilumbu tialanda. Kâ, bibulu bia bala ba Israele ka biafwa ko. Ntono musamu wo, Farao watatamana mu bâ na tungu.

Ha manima, Yehova walomba kwe Mose mu vutu kwe monekena Farao na mu losa bombi mu zulu. Bombi diatituka mfumfuta. Mwela wawansoni wayizi bâ na mfumfuta; mfumfuta yo yatensama ha zulu Bisi-Ezipte na ha zulu bibulu biawu, mpe yatulumuna mahumbu meri ba saka nkesi mu nitu. Kâ buna mpe, Farao wakala mu bîka bala ba Israele benda.

Dieka bo, Yehova watambika Mose mu tâ kwe Farao: ‘Ngano tatamane mu kala mu bîka kanda diani dienda? Mbazi mbo ku bâ mvula ya matari.’ Tilumbu tialanda, Yehova watulumuna mibamunu mia nzazi, mpe wabwisa mvula ya matari na tiya. Ka kwa bâ musamu wa mpila yo ko watoko yilama ku Ezipte. Miti miamiansoni miamana ya; kâ ku tizunga tia Goshene ka kwa bâ musamu ko. Farao watâ: ‘Lombeno kwe Yehova kakangamasa mvula yi ya matari! Ha manima lulendi kwenda.’ Kâ buna kwa mvula ya matari bu yawa, Farao wasoba mabanza.

Ha manima, Mose watâ: ‘Bwawu bu, makonko mbo madia miti na matiti mamansoni ma sisiri mvula ya matari.’ Makonko mamingi madia bima biabiansoni biasâla ku misitu na mu miti. Farao watâ: ‘Lombeno kwe Yehova kakuma makonko.’ Kâ, Yehova bu kamana kuma makonko, yandi watatamana mu bâ na tungu.

Yehova watâ kwe Mose: ‘Lambula koko kwaku ku zulu.’ Mbala mosi, zulu diayizi bâ dia ndombi. Bilumbu bitatu, Bisi-Ezipte mu buyongongo bwa ngolo babâ. Ka babâ na lenda ko dia mona tima, mpe ka beri’â monasana ko bawu na bawu. Kâ bala ba Israele mutsamina wabâ nawu mu mbuka yi beri bâka.

Farao watâ kwe Mose: ‘Nge na kanda diaku lulendi kwenda. Ka bibulu bieno bifweti sâla kwawu ku.’ Mose wavutula: ‘Tufweti nata bibulu bieto; mu mukayulu tuhana bio kwe Nzambi’eto.’ Buna Farao wabaka nkesi. Yandi watâ: ‘Duka kû! Namana vutu ku mona, mbo nikuhonda.’