Mpasi za kumi

Mose wakanisina Farao ti ka keti’â vutu dinga ko mu mu mona. Kâ ntete kenda, yandi wamutêla: ‘Mu kati kati dia mpimpa, bala babansoni ba ntete ba Bisi-Ezipte mbo bafwa, tûka mwana wa Farao tii kwe bala ba bisari.’

Yehova walomba kwe bala ba Israele mu kubika salaka dia nzitukulu. Yandi wabatêla: ‘Hondeno mwana timeme peleko mwana nkombo wa mvula mosi, tûleno ndambu ya menga mu ndeko ya mwelo wa nzo’eno. Yokeno musunia’andi, mpe dieno wo na dimpa dia lembo levire. Bêno ba kubama mu kwenda na mapapa meno mu malu. Mpimpa ni yi nita lu kûla.’ Banza’eti, bala ba Israele nsayi yayingi yabâ nawu.

Mu kati kati dia mpimpa, mbazi ya Yehova yayôka mu Ezipte yayansoni. Bu keri lembo monaka menga ma batûla mu ndeko ya mwelo wa nzo, mwana wa ntete wafweti fwa. Kâ bu keri monaka menga ma batûla mu ndeko ya mwelo wa nzo, mbazi ya Yehova ka yeri’â saka tima ko. Makanda mamansoni ma Bisi-Ezipte, ma bamputu na ma bamvwama, mahombesa mwana wumosi. Kâ na kani mwana wumosi wa bala ba Israele wafwa.

Mwana wa Farao mpe wafwa. Farao keri’â vutu lendaka ko. Buna mbala mosi watâ kwe Mose na Arone: ‘Yendeno. Yendeno lwasambila Nzambi’eno. Nateno bibulu bieno, mpe katukeno kû!’

Ku nsia mwezi, bala ba Israele badûka ku Ezipte mu bikunku bia makanda mawu. Babakala ba 600 000 babâ na lutangu lwa lunene lwa bakento na bala ba fioti. Bantu bakaka babingi bayenda na bawu mu kwe sambila Yehova. Buna bala ba Israele bakûluka!

Mu lembo zimbakana ti Yehova wabavûkisa, bala ba Israele bafweti dia salaka dio dia nzitukulu mivu miamiansoni. Salaka dio batâ dio nkumbu Pake. Mu bungu dia nti? Mu bungu ti ntêlo yo yizololo tâ “yôka ha zulu.”