Bawu bakolamana Yehova

Ntangu fioti ha manima, bala ba Israele bu babâ ku sese, Kore, Datane, Abirame na bala ba Israele ba 250 bakolamana Mose. Bawu bamutêla: ‘Tukufwatikiri! Mu bungu dia nti fweti bêla mfumu ya beto? Mu bungu dia nti Arone kafweti bêla mfumu-nganga-nzambi ya beto? Yehova na beto bansoni kena, ka nge na Arone’â ko kwa.’ Yehova ka yangalala ko. Bala ba Israele ntiana kwa bawu bakolama kwe Yandi!

Mose watâ kwe Kore na kwe bantu babâ ku lweka lwandi: ‘Mbazi yizeno ku tabernakle na ndonga za fuluka mu encens. Yehova mbo katusongela nani kasolele.’

Tilumbu tialanda, Kore na bantu 250 babâ ku lweka lwandi baye monekena Mose ku tabernakle. Bawu bayoka encens ntiana’eti nganga-nzambi babâ. Buna Yehova watâ kwe Mose na Arone: ‘Hambaneno na Kore, mboko na bantu bandi.’

Datane, Abirame na makanda mawu ka basa ntiana Kore ko. Bawu ka bayenda ku tabernakle ko. Yehova watâ kwe bala ba Israele mu hambana na bivula bia Kore, Datane na Abirame. Bala ba Israele batumama. Datane, Abirame na makanda mawu ha matu ma bivula biawu batelama. Mbala mosi mutoto wazibuka mpe bazikama! Ku tabernakle, tiya twatûka kwe Yehova twayoka Kore na bantu bandi ba 250.

Yehova watâ kwe Mose: ‘Lomba kwe mfumu ya muna kanda kakuhana muti mpe tsoneka nkumbu’andi ha zulu. Mu muti wa kanda dia Levi, tsoneka nkumbu ya Arone. Tûla miti miamiansoni mu tabernakle. Bifulu bimena mu muti wa muntu wu nsolele.’

Tilumbu tialanda, Mose waye bonga miti miamiansoni mpe wasongela mio kwe mfumu za makanda. Bifulu biamena ha zulu muti wa Arone na mbutu za amandes za bwaka. Buna, Yehova wasingisa ti wasola Arone mu bâ mfumu-nganga-nzambi.