Bantu 12 baye tala nsi mu mayela

Bala ba Israele bakatuka ku mongo wa Sinayi, basabuka sese dia Parane, mpe batûla mu mbuka yi beri tâka Kadeshe. Kûna Yehova watâ kwe Mose: ‘Sola babakala 12, wumosi mu muna kanda dia bala ba Israele. Fweti ba tambika mu kwe tala nsi ya Kana mu mayela, nsi yi nihana kwe bala ba Israele.’ Buna Mose wasola babakala ba 12, mpe yandi wabatêla: ‘Yendeno ku Kana mu tala tala ti nsi ya fuluka yena mu mbutu za mbote na mu ndunda ya mbote. Taleno tala ti bantu ngolo ze nawu peleko ka bena na ngolo ko, tala ti mu bivula babâka peleko mu mimvuka.’ Bantu ba 12 baye tala nsi mu mayela bayenda ku Kana. Ha kati diawu Yoswa wabâ hô na Kalebe.

Bantu baye tala nsi mu mayela bakâla ha manima ma bilumbu 40. Bawu banata mbutu za fige, mbutu za grenades na mbutu za vinu. Bantu bango batâ: ‘Nsi yo ya mbote yena, kâ bantu bê kô ngolo ze nawu mpe mu mahata mawu bibaka bia bila bie kô.’ Buna Kalebe watâ: ‘Tulendi ba nunga. Twendeno!’ Ngano zebi mu bungu dia nti Kalebe katêla bo? Ntiana Yoswa, lukwikulu lwabâ nandi mu Yehova. Kâ bantu bakaka ba 10 baye tala nsi batâ: ‘Kâni! Bantu bango ba nkatika ba zangama bena! Mbo tubâ ntiana makonko kwe bawu.’

Bala ba Israele banôka. Bawu babatika mu nionga na mu tâ: ‘Tasoleno mfumu yakaka mpe takâleno ku Ezipte. Mu bungu dia nti tukwenda mu kwe fwa ku Kana?’ Kâ Yoswa na Kalebe babatêla: ‘Ka lukolamanandi Yehova, ka lubândi na bunkuta. Yehova mbo kalukengerela.’ Kâ bala ba Israele ka beri’â ba wîlaka ko. Bawu badinga mpe mu honda Yoswa na Kalebe!

Ngano Yehova nti kasa? Yandi watâ kwe Mose mu bungu dia bala ba Israele: ‘Mu mio miamiansoni mi ndirikiri mu bungu dia bawu, ka bata kuntumamana ko. Eka, ku sese babâ mvula 40, mpe ni kô bafwila. Bala bawu kwa, Yoswa na Kalebe bakwenda ku nsi yi nakanisina mu ba hana.’