Timfumu tiakabana

Salomo bu katatamana mu sarila Yehova, Israele mu tidzunu yabâ. Kâ Salomo wakwela bakento babingi ba nsi zakaka. Bakento bango biteki beri sambilaka. Malembe malembe, Salomo wasoba, mpe wabatika mu sambila biteki. Yehova watomo baka nkesi. Yandi watâ kwe Salomo: ‘Nsi ya Israele mbo bakatula yo mu moko ma kanda diaku, mpe mbo yikabana mu bibuku biole. Mbo nihana lweka luyôkele bunene kwe timosi tia bisari biaku, mpe kanda diaku mbo diyâla lweka lwa fioti.’

Yehova wazabikisa nzengolo’andi mu mpila yakaka. Yeroboame, tisari tia Salomo, mu nzietolo kabâ bu kabwabana na mbikuri Ahiya. Ahiya watenda tiyunga tiandi mu bibuku 12, mpe watâ kwe Yeroboame: ‘Yehova mbo kakatula timfumu tia Israele kwe kanda dia Salomo mpe mbo kakaba tio mu bibuku biole. Bonga bibuku bi bia 10 mu bungu ti ni nge bâ mutinu wa makanda 10.’ Salomo bu kawâ musamu wo wadinga mu honda Yeroboame! Buna Yeroboame wadioka ku Ezipte. Ha manima, Salomo wafwa, mpe mwana’andi Rehobame wayizi bâ mutinu. Buna Yeroboame wamona ti lenda diabâ nandi dia kâla ku Israele mu tidzunu.

Mbuta za ku Israele zatâ kwe Rehobame: ‘Tala ti kipiri bantu mu mpila ya mbote, mbo babâ ba kwikama kwe nge.’ Kâ, ndiku za ntwenia za Rehobame zamutêla: ‘Fweti bâ na mutima wa ngolo kwe bantu! Sa ti bisalu biawu biavutu bâ ngolo!’ Rehobame walanda malongi ma ndiku zandi za ntwenia. Yandi wasongela mutima wa ngolo kwe bantu, mpe bantu bamutelamana. Bawu basa Yeroboame mutinu wa makanda ma 10, ma bazabila mu nkumbu ya timfumu tia Israele. Makanda ma mole makaka bayizi ma zabila mu nkumbu ya timfumu tia Yuda, mpe ma kwikama mabâ kwe Rehobame. Buna, makanda 12 ma Israele makabana.

Yeroboame ka zolo’â ko ti bantu bandi benda basambila ku Yerusaleme, yabâ mu timfumu tia Rehobame. Ngano zebi mu bungu dia nti? Yeroboame bunkuta yabâ nandi ti bamutelamana mpe babâ ku lweka lwa Rehobame. Buna yandi wasarisa bala ba ngombe bole ba ore mpe watâ kwe bantu: ‘Yerusaleme mala mingi yena. Lulendi sambila kwawu ku.’ Bantu babatika mu sambila bala ba ngombe ba ore, mpe bavutu zimbakana Yehova.