Ntontolo ya ku mongo wa Karmele

Mitinu mia mbi miamingi miayâla ha timfumu tia makanda ma 10 ma Israele, kâ Ahabe ni wumosi wayôka mu bubi. Yandi wakwela mukento wa mbi weri sambilaka Bale. Nkumbu’andi Yezabele. Ahabe na Yezabele bafulusa nsi yayansoni mu bantu beri sambilaka Bale, mpe bahonda mbikuri za Yehova. Ngano Yehova nti kasa? Yandi watambika mbikuri Eliya mu hana nsangu kwe Ahabe.

Eliya watâ kwe Ahabe ti mu bungu dia mbi yi keri sarilaka, ka kwa keti’â vutu bâ mvula ku Israele ko. Mvula zitatu, bima ka biamena ko mpe nsatu yakota kwe bantu. Ahabe watâ kwe Eliya: ‘Nge vwandi die naku! Ni nge watulumuni misamu mi.’ Eliya watâ: ‘Ka meno’â ko nakangamase mvula. Ni nge wasambiri Bale. Musamu tuyêla, mu zaba nani we Nzambi ya matieleka. Kutakasa bantu na mbikuri za Bale ha zulu mongo wa Karmele.’

Bantu bakutakana ha zulu mongo. Eliya wabatêla: ‘Lufweti sola. Tala ti Bale ni Nzambi ya matieleka, sambileno Bale. Kâ tala ti ni Yehova we Nzambi ya matieleka, sambileno Yehova. Ntiangu nita lu lomba musamu ewu: mbikuri 450 za Bale mbo bakubika mukayulu mpe mbo batâ mbila nzambi’awu, mpe meno mbo nikubika mukayulu mpe mbo nitâ mbila Yehova. Nzambi yiyoka mukayulu ni yandi we Nzambi ya matieleka.’ Bantu batambula.

Mbikuri za Bale zakubika mukayulu, mpe tilumbu tia mukaka batâ mbila nzambi’awu: ‘Ô Bale, tu hana mvutu!’ Mu bungu ti Bale keri’â hanaka mvutu ko, Eliya ni keri tâka mu ba sehesela: ‘Mu têno mbila mu ngolo zeno zazansoni. Kampe ku tolo kena, yandi fweti vumbuka.’ Mbikuri za Bale zatâ mbila tii mu nkokela. Kâ, na kani mvutu.

Eliya watûla mukayulu’andi ha ziku, mpe watsamuna mamba mamingi ha zulu. Ha manima, yandi wasambila: ‘Ô Yehova, mulemvo’aku, ba songela ti Nge ni Nzambi ya matieleka.’ Hô nkatika bendo, Yehova watambika tiya twayoka mukayulu. Bantu bakawula: ‘Yehova ni Nzambi ya matieleka!’ Eliya wabatêla: ‘Ka lubîkandi mbikuri za Bale zadioka!’ Tilumbu tîna, mbikuri 450 za Bale bahonda.

Ha manima tuti diamoneka ha zulu mamba ma mubu. Buna Eliya watâ kwe Ahabe: ‘Titembo tia ngolo tita kwiza. Kubika tipusu tiaku, mpe yenda ku nzo’aku.’ Matuti mamingi ma ndombi mabâ ku zulu, titembo tiapupa, mpe mvula ya yinene yabatika mu bwa. Ntangu yakangama mvula yasuka. Ahabe wanata tipusu tiandi na ntinu zazansoni. Na lubakusu lwa Yehova, Eliya wadioka ntinu mpe wayôka tipusu tia Ahabe! Ngano misamu mia Eliya miawa? Musamu ni wo tweka mona.