Yehova tambikiri Yeremi mu kwe samuna

Yehova wasola Yeremi mu bâ mbikuri ya kanda dia Yuda. Yandi wamulomba mu samuna kwe bantu na mu ba têla ti bafweti bîka mu yirika misamu mia mbi. Yeremi watâ: ‘Yehova, meno mwana fioti kwa ndiena. Ka nzebi’â ko bwe bazonzelaka kwe bantu.’ Yehova wamutêla: ‘Kubândi na bunkuta. Mbo nikutêla misamu mi fweti tâ. Mbo nikubakisa.’

Yehova watâ kwe Yeremi mu kutakasa mbuta za kanda dia Yuda, mu mwangasa tînzu tia tibuma ha meso mawu, na mu tâ: ‘Yerusaleme mbo bamwangasa yo mu mpila yi.’ Yeremi bu kayirika musamu wa mu lomba Yehova, bambuta babaka nkesi. Nganga-nzambi yimosi yi beri tâka nkumbu Pashure, watwa Yeremi, mpe wamukanga moko na malu mu mabaya. Mpimpa yayansoni, Yeremi walembana mu ningana. Tilumbu tialanda mu pari, Pashure wamusutula. Yeremi watâ: ‘Ka nita vutu lenda ko. Mbo nibîka mu samuna.’ Ngano yandi wabîka? Kâni. Yeremi bu katomo banza, watâ: ‘Zu dia Yehova ntiana tiya diena mu nitu’ani. Ka ndendi’â na bîka ko mu samuna.’ Yeremi watatamana mu lwengesa bantu.

Ha manima ma mvula zazingi, mutinu wakaka wabatika mu yâla ku Yuda. Nganga-nzambi na mbikuri za bungungu, nsangu za Yeremi beri yinaka. Bawu batâ kwe bamfumu: ‘Muntu wo wufweti fwa.’ Yeremi watâ: ‘Tala ti lukungondele, mbo luhonda muntu wulembolo zaba musamu. Nsangu za Yehova nita tâ, ka za me beni’â ko.’ Bamfumu bu bawâ wo batâ: ‘Muntu wu ka wufwanane’â ko kafwa.’

Yeremi watatamana mu samuna, mpe bamfumu bayizi tomo baka nkesi. Bawu balomba kwe mutinu mu honda Yeremi. Mutinu wabatêla ti lenda diabâ nawu dia yirika musamu wu bazolo kwe Yeremi. Bawu babwila Yeremi, mpe bamulosa mu bulu dia mamba diabâ na ntebe ngatu kafwa. Yeremi wabatika mu diama mu ntebe.

Tisari timosi tia mutinu, ti beri tâka nkumbu Ebede-meleke watâ kwe mutinu: ‘Bamfumu Yeremi balosele mu bulu dimosi dia mamba! Tamana mu bîka mûna mbo kafwa.’ Buna mutinu walomba kwe Ebede-meleke mu nata bantu 30 na yandi ngatu badûkisa Yeremi mu bulu dia mamba. Ngano ka tufweti’â tabâ ntiana Yeremi ko, walembo bîka tima ni tima tiamukabakasa mu samuna?