Yerusaleme yimwangane

Mbala zazingi, kanda dia Yuda diabîka Yehova mu sambila nzambi za bungungu. Mvula zazingi, Yehova ka bîka ko mu yêla mu ba bakisa. Yandi watambika mbikuri mu ba lwengesa, kâ ka bamuwîla ko. Bawu basehesela mbikuri za Yehova. Yehova bwe kasukisila nsambululu’awu ya biteki?

Mutinu wa Babilone, Nebukadenezare, mahata keri kwe kotele, dimosi dimosi. Mbala ya ntete yi kakotela Yerusaleme, yandi wabwila mutinu Yehoyakine, bamfumu, binwani na bô beri salaka bisalu bia moko, mpe wabanata ku Babilone. Nebukadenezare wabonga mpe bimvwama biabiansoni bia ku Tempelo ya Yehova. Ha manima, yandi wasola Sedesiase mu bâ mutinu wa Yuda.

Ku mbatukulu, Sedesiase watumamana Nebukadenezare. Kâ makanda meri ba zungirilaka na mbikuri za bungungu balonga Sedesiase mu kolamana Babilone. Yeremi wamulwengesa: ‘Tala ti kolamane, bantu mbo bafwa, nsatu mbo yikota ku Yuda, na timbevo.’

Bu kamana yâla mvula 8, Sedesiase wabonga nzengolo ya kolamana Babilone. Yandi walomba kwe Bisi-Ezipte mu mu bakisa. Buna, Nebukadenezare watambika mukangu wa binwani biandi mu kotela Yerusaleme, mpe bazungirila hata dia Yerusaleme. Yeremi watâ kwe Sedesiase: ‘Yehova têle ti wamana tihana kwe Babilone, nge na hata di mbo luvûka. Kâ, tala ti kusiri’â bo ko, Bisi-Babilone mbo bayoka Yerusaleme, mpe mbo bakutûla ku boloko.’ Sedesiase watâ: ‘Ka nitihana ko!’

Mvula yimosi na ndambu ha manima, mukangu wa binwani wa Babilone wamwangasa lweka lwa tibaka, mpe bayoka hata dia Yerusaleme. Bawu bayoka Tempelo, bahonda bantu babingi, babingi mpe babwila.

Sedesiase wadioka hata dia Yerusaleme kâ Bisi-Babilone bamulanda. Bawu bamubwila penepene na Yeriko, mpe bamunata kwe Nebukadenezare. Mutinu wa Babilone wahonda bala ba Sedesiase ha meso mandi. Ha manima, Nebukadenezare watsubula meso ma Sedesiase, mpe wamutûla ku boloko. Ntangu fioti ha manima, Sedesiase wafwa. Kâ Yehova wasa kani kwe kanda dia Yuda: ‘Ha manima ma mvula 70, mbo nikukârisa ku Yerusaleme.’

Nti biatûrila ntwenia zi babwila mpe zi banata ku Babilone? Ngano mbo baketi tatamana mu bâ ba kwikama kwe Yehova?