Estere vûkisi kanda diandi

Estere ndumba yabâ ya Muyuda yeri bâka ku hata dia Perse di beri tâka nkumbu Suze. Mu mivu miayôka, kanda diandi, Nebukadenezare wakatula dio ku Yerusaleme. Nkazi’andi yamusansa yi beri tâka nkumbu Mardoshe, tisari timosi tia mutinu Asierise wa Perse.

Mutinu Asierise mukento wa môna wabâ nandi nsatu. Bisari biandi biamunatina bakento bayôka ba toma mu nsi’andi, ha kati diawu na Estere. Mu bakento babansoni, mutinu wasola Estere mu bâ mukento’andi. Mardoshe watâ kwe Estere mu lembo tâ ti yandi Muyuda wabâ.

Muntu wumosi wabâ na lulendo wu beri tâka nkumbu Amane wabâ mfumu ya bisari bia luyâlu. Yandi wazolo ti bantu babansoni bakondamaka ha matu mandi. Mardoshe wakala mu kondama. Amane wayizi baka nkesi, mpe wadinga mu mu honda. Amane bu kazaba ti Mardoshe Muyuda wabâ, wakubika misamu mu honda Bayuda babansoni ba mu nsi yo. Yandi watâ kwe mutinu: ‘Bayuda ba mbi bêna; fweti ba honda.’ Asierise wamutêla: ‘Yirika misamu miamiansoni mita zolo,’ mpe wamuhana lenda dia hana musiku mu bungu dia musamu wo. Amane wahana musiku weri lombaka kwe bantu mu honda Bayuda babansoni mu tilumbu tia 13 tia ngonda ya Adare. Yehova misamu miamiansoni mia keri monaka.

Estere ka bâ na nsangu za musiku wo ko. Buna Mardoshe wamutambikila mukanda wa musiku wo mpe wamutêla: ‘Yenda zonzela musamu wo kwe mutinu.’ Estere watâ: ‘Muntu ni muntu wukwendaka kwe mutinu tala ti ka bamutumisi’â ko, mbo bamuhonda. Mutinu ka kuntikisi’â ko tûka bilumbu 30! Kâ mbo nikwenda. Tala ti kunsongele muhangu’andi, mbo nitatamana mu bâ wa moyo. Kâ tala ti ka siri’â bo ko, mbo ni fwa.’

Estere wayenda kwe mutinu. Mutinu bu wamumona, wamusongela muhangu’andi. Yandi wapusana kwe mutinu, mpe mutinu wamuyûla: ‘Nti ndendi sa mu bungu dia nge, Estere?’ Estere watâ: ‘Nzololo nakutikisa nge na Amane mu bungu dia salaka dimosi.’ Bu bayiza ku salaka, Estere wavutu ba tikisa mu bungu dia salaka diakaka. Ku salaka dia nzole, mutinu wavutu yula kwe Estere: ‘Nti ndendi sa mu bungu dia nge?’ Yandi watâ: ‘Muntu wuta zolo ku honda meno na kanda diani. Mulemvo’aku tu vûkisa.’ Mutinu wamuyula: ‘Nani ta zolo ku honda?’ Estere watâ: ‘Ni Amane, muntu wu wa mbi.’ Asierise nkesi zatomo mu baka ni kahondesa Amane hô nkatika bendo.

Kâ ka kwabâ muntu ko waketi kabakasa musiku wa Amane, mutinu mpe kabâ na lenda dio ko. Buna mutinu wasola Mardoshe mu bâ mfumu ya bisari bia luyâlu mpe wamuhana lenda dia hana musiku wakaka. Mardoshe wahana musiku weri hanaka nzila kwe Bayuda mu tinwanina bu baketi ba nwanisa. Mu tilumbu tia 13 tia ngonda ya Adare, Bayuda banunga mbeni zawu. Tûka tilumbu tîna, bawu bakembela tilumbu tio mivu miamiansoni.