Ezdrase walongesa Zu dia Nzambi

Mvula 70 ha manima ma nkâlulu ya bala ba Israele ku Yerusaleme, bakaka ha kati diawu mu bizunga biakaka bia timfumu tia Perse beri bâka. Wumosi mu bawu ni Ezdrase, nganga-nzambi yabâ; Musiku wa Yehova keri longesaka. Ezdrase wawâ nsangu ti bantu ku Yerusaleme ka beri’â landaka Musiku wa Nzambi ko, mpe wadinga mu kwe ba bakisa. Artazersese, mutinu wa Perse wamutêla: ‘Nzambi wakuheni ndwenga ngatu wabâ na lenda dia longesa Musiku’andi. Buna, yenda mpe nata bô babansoni bazololo mu kwenda na nge.’ Ezdrase wamonekena bantu babansoni bazolo mu kâla ku Yerusaleme. Bawu basambila Yehova ngatu kabakengerela mu nzietolo yo ya yila, mpe bayenda.

Ngonda ziyà ha manima, bawu batûla ku Yerusaleme. Mfumu zatâ kwe Ezdrase: ‘Bala ba Israele bakolamane Yehova, mpe bakwelele bakento basarilaka nzambi za bungungu.’ Ngano Ezdrase nti kasa? Ha meso ma bantu, Ezdrase wafukama, mpe wasambila: ‘Yehova, misamu miamingi wayirika mu bungu dia beto, kâ beto tasumukini ha meso maku.’ Bantu basoba mabanza, kâ misamu mi beri yirikaka ka miabâ mia sungama ko. Ezdrase wasola bambuta na bamfundisi mu taluzula misamu mio. Mu ngonda zitatu zalanda, bô beri lembo sambilaka Yehova babakuma.

Mvula 12 zayôka. Mu ntangu yo, bavutu tunga bibaka bia Yerusaleme. Buna, Ezdrase wakutakasa Bayuda ha mbuka ya bantu babansoni mu ba tangila Musiku wa Nzambi. Ezdrase bu kazibula buku, bantu batelama. Yandi wakembela Yehova, mpe bananguna moko mu songela ti batambula. Ha manima, Ezdrase watanga mpe wabangula Musiku, mpe bantu batomo teka kutu. Bawu babakula ti bahengama na Yehova, mpe badila. Tilumbu tialanda, Ezdrase wavutu ba tangila Musiku. Bawu balongoka ti bafweti kembela malaki ma Bivula mu bilumbu biaketi landa. Hô nkatika bendo, babatika mu kubama.

Mu bilumbu 7 bia malaki, bantu bayangalala, mpe batonda Yehova mu bungu ti bima bi bakuna biatomo buta. Tûka ntangu ya Yoswa, ka kwa bâ malaki ma Bivula ma mpila yo ko. Ha manima ma malaki, bantu bakutakana mpe basambila: ‘Yehova, Nge watuvûkisa mu bungamba, watudikila ku sese, mpe watuhana nsi ya toma. Kâ, beto takolama kwe Nge mbala zazingi. Nge watambika bambikuri mu tu lwengesa; kâ ka takuwîla ko. Ntono musamu wo, Nge wasarila luvivululu. Kani di wasa kwe Abrahame dia walungisa. Bwawu bu, tukukanisini ti mbo tutumama kwe Nge.’ Bawu batsoneka kani diawu, mpe mfumu zawu, Levite na nganga-nzambi zatûla tiniemo mu mukanda wango.