“Lundeno mabanza ma mbote, bêno na meso ma tia!”

1. Ngano Yezu bwe katâ kwe milongoki miandi mu bungu dia ntangu ya mansukina, mpe ntia ndwengosolo kahana?

MWA bilumbu ntete lufwa lwa Yezu, milongoki miandi miyà miayizi mu yula tiyuvu eti: “Ntia tidimbu tisongela [. . .] nsukunu ya nza?” (Mat. 24:3, NWT) Kampe milongoki mio mbo mieri dingaka mu zaba ntangu yi baketi fukisa Yerusaleme na Tempelo. Mu mvutu’andi Yezu wazonzela mfukulu ya Yerusaleme na Tempelo’andi, kâ mpe na nsukunu ya nza yi tubêlaka lumbu ti. Mu zonzela ntangu ya mansukina, Yezu watâ ti: ‘Lumbu tîna na ngunga yîna, ka bizebi’â muntu ko, mbazi ku zulu na Mwana ka bazebi’â bio ko, diambu’eti ni Tata kwa.’ Ha manima walwengesa milongoki miandi mu lunda mabanza ma mbote na mu bâ na meso ma tia.—Mak. 13:32-37.

2. Mu bungu dia nti weri mfunu kwe Bakristo ba ntete mu bâ na meso ma tia?

² Mu mbandu ya ntete, Bakristo beri Bayuda bafweti bâ na meso ma tia ngatu bavuka. Yezu wahana kwe milongoki miandi bidimbu biaketi babakisa mu zaba ntangu yaketi tula nsukunu ya nza. Watâ ti: ‘Bu lumona Yerusaleme yi bazungiriri kwe binwani, zabeno ti mfukulu yeka penepene.’ Mu ntangu yîna, bafweti tumamana ntumunu ya Yezu ya ‘dioka ku miongo.’ (Like 21:20, 21) Bantu balanda ntumunu yo bavuka mu ntangu Bisi-Rome bafukisa Yerusaleme.

3. Ngano nti tutaluzula mu timoko ti?

³ Lumbu ti, mbo tuta zinga mu ntangu ya mansukina ya nza yi ya mbi. Buna, beto mpe tufweti lunda mabanza ma mbote mpe tufweti bâ na meso ma tia. Mu timoko ti, mbo tuzonzela mpila yi tulendi bêla na mabanza ma delakana mu ntangu yi tukwe taluzuri misamu mia nza. Mbo tutaluzula mpe ka bwe tulendi sila mayela, mpe ka bwe tulendi sarila ntangu yisiri mu mpila yiyôkele bubote.

BÂ NA MABANZA MA DELAKANA BU KWE TALUZURI MISAMU MIA NZA

4. Mu bungu dia nti tufweti dimbitilaka mu mpila yi yôkelaka misamu mu nza, na mpila yi milungisilaka mbikululu za Bibila?

⁴ Misamu mia mbote misaka ti tataluzula ka bwe misamu miyôkaka mu nza lumbu ti milungisilaka mbikululu za Bibila. Mu tifwani, Yezu wazonzela misamu miaketi tu bakisa mu zaba ka ntia ntangu nsuka ya nza yi ya Satana yaketi tula. (Mat. 24:3-14) Ntumwa Piere watutindisa mu sa keba mu ndungananu za mbikululu ngatu timinu tieto tiatatamana mu bâ ngolo. (2 Pi. 1:19-21) Buku dia mansukina dia Bibila mbo dibatikilaka ebu: ‘Nzabukusu ya Yezu Kristo ya mu hana Nzambi, mu songela kwe bisari biandi, mio mifweti kwiza [ntamana].’ (Nza. 1:1) Mbo tutomo kipaka misamu miyôkaka mu nza lumbu ti, mpe mbo tudingaka mu zaba ka bwe milendi lungusila mbikululu za Bibila. Mpe tulendi bâ na timina mu zonzela misamu mio na bampwana’eto.

5. Ntia musamu tufweti silaka keba, kâ nti tufweti sa? (Tala mpe bifwani.)

⁵ Bu tuzonzelaka mbikululu za Bibila, ka tufweti’â tahanaka mabanza ma beto beni ko mu mpila yi yôkela misamu. Mu bungu dia nti? Mu bungu ti ka tuta zolo ko tatâ musamu wulendi hambasa timvuka. Mu tifwani, tulendi wâ mfumu za nza zita zonzela mpila yi bayirikila muzingu wumosi, na yi banatina tidzunu na kondo kwa bunkuta. Kani tazonzela mabanza ma beto beni bu tutâ ti musamu wo mbikululu ya 1 Bisi-Tesalonike 5:3 wuta lungisa, tufweti dinga mu zaba mbangululu ya mansukina yi badukisi yitariri mbikululu yo. Bu tusikamana mu misamu mi tâka organizasio ya Yehova bu tuzonzaka na bampwana’eto, mbo tubakisa timvuka mu tatamana mu bâ na mabanza mamosi.—1 Kor. 1:10; 4:6.

6. Ntia malongi tulendi baka mu 2 Piere 3:11-13?

⁶ Tanga 2 Piere 3:11-13. Ntumwa Piere watubakisa mu bâ na mabanza ma delakana bu tutaluzulaka mbikululu za Bibila. Watutindisa mu lunda tilumbu tia Yehova mu mabanza meto. Mu bungu dia nti? Ka wena ko ti tuzololo mu zaba “tilumbu na heure” Yehova yi kanata Armagedo, kâ mu bungu ti tuzololo tasarila ntangu yisiri neto mu bâ na nsalulu mpe na ndiatulu ya santu, mpe tasongela ti Nzambi tutînaka. (Mat. 24:36; Like 12:40) Wuzololo tâ ti tufweti tatamana mu bâ na ndiatulu ya mbote na mu bâ na lukwikulu ti ngolo zeto mu tisalu tia Yehova mbo zisongelaka ti luzolo lwalwingi lwe neto mu Yandi. Mu tatamana mu bâ na meso ma tia, tufweti sa keba mu beto beni.

NGANO SA KEBA MU BETO BENI BWE WUTA ZOLO TÂ?

7. Bwe tulendi songela ti mayela tusaka? (Like 21:34)

⁷ Yezu watâ kwe milongoki miandi mu sa keba mu misamu miyôkaka mu nza kâ mpe mu bawu beni. Mbo bazonzelaka wo mu misamu milwengesaka mie mu Like 21:34. (Tanga.) Taleno misamu emi miatâ Yezu: ‘Seno mayela.’ Muntu wusaka keba mu yandi beni peleko wusaka mayela, mbo wutaluzulaka mitambu miamiansoni milendi bebesa tindiku tiandi na Yehova, mpe mbo kasarilaka ngolo mu lembo bwa mu mitambu mio. Mu mpila yo, mbo katatamana mu bâ mu luzolo lwa Nzambi.—Bin. 22:3; Yude 20, 21.

8. Ngano Paulo ntia musamu katâ kwe Bakristo?

⁸ Ntumwa Paulo watâ kwe Bakristo basa keba mu bawu beni. Mu tifwani, watâ ebu kwe Bakristo ba ku Efeze: ‘Seno mayela mu mpila yi lukwe diatiri, ka wena ko ti ntiana bantu bakondo ndwenga, kâ ntiana bantu bê na ndwenga.’ (Efz. 5:15, 16) Timpeve tieto mbo tivulu kotaka mu ntontolo, buna Bibila mbo ditutindisaka mu ‘tatamana mu bakula luzolo lwa Yehova ni lwe’ ngatu talenda mu telamana ntontolo zazansoni.—Efz. 5:17.

9. Bwe tuzabilaka mio mi zololo Yehova mu beto?

⁹ Bibila ka dizonzelaka misamu miamiansoni milendi bebesa tindiku tieto na Yehova ko. Vula-vula, tufweti bonga nzengolo mu misamu milembo tomo zonzelaka Bibila. Mu sa nsololo za mbote, tufweti dinga mu mona peleko mu zaba “luzolo lwa Yehova.” Tulendi sila bo bu tuvulu bonga ntangu ya longoka na ya dimbitila Zu dia Nzambi. Bu tutomo kwe bakuri luzolo lwa Nzambi na bu tukwe dingi mu bâ na “mabanza ma Yezu,” mbo tutomo kwizi bâ na lenda dia sarila ndwenga mu ndiatulu’eto ni bu sa ti ka kwena musiku ko. (1 Kor. 2:14-16) Mitambu miakaka ka miena mpasi ko mu zaba, kâ miakaka mpasi miena.

10. Ntia mitambu tufweti sila keba?

¹⁰ Mu mitambu mi tufweti sila keba mwe na flirt, nwa malavu ma yôka, dia kwa yôka, nzonzolo yilwekesaka, porno, tifu tia talaka filme za miangu na misamu miakaka. (Mik. 101:3) Mbeni’eto Diabulu, mbo katatamana mu dinga mpila zi kabebesela tindiku tieto na Yehova. (1 Pi. 5:8) Tala ti ka tusiri’â keba ko, Satana lendi kotesa tifu tia dienokena, kondo kwa bunsungu, luwu lwa mbongo, diki, lumpampani na tifu tia tisemba mu mabanza meto na mu mutima’eto. (Nga. 5:19-21) Ku mbatukulu misamu mio mia mbi ka mitomo’â zabakanaka ko. Kâ tala ti ka tusiri’â keba ko mu katula misamu mio, mbo mikula mpe mbo mitukotesa mu mpasi.—Zaki 1:14, 15.

11. Ntia mutambu wulembo tomo zabakanaka tufweti sila keba, mpe mu bungu dia nti?

¹¹ Mutambu wulembo wumosi zabakanaka ni bindiku tia mbi. Tataluzuleno musamu ewu. Na muntu wulembolo Mbangi ya Yehova salaka. Zololo ti kabâ na mabanza ma mbote mu Mbangi za Yehova, buna mbo mu songelaka nsayi mpe mbo vulu mu bakisaka. Lendi tambula mpe mu dia na muntu wo ntangu zakaka. Mu mwa ntangu, lendi batika mu vulu diaka nandi. Ntangu zakaka, muntu wo wulendi zonzela misamu mia mvindu. Ku mbatukulu, kuzolo’â ko mu hanina misamu mio mvutu. Ntangu bu yiyôkele, wizi tomo yukunu na misamu mio mpe kuta vutu mia mona mia mbi ko. Lumbu timosi, muntu wo wu lusalaka wukutikisi mu kwe nwa mwa mbwata, mpe tamburi. Ha manima, weka banza ntiana muntu wo. Buna, mu ntangu fioti lendi kwizi batika mu yirika misamu ntiana muntu wo wu lusalaka. Wa matieleka, nsayi na buzitu tusongelaka kwe bantu babansoni, kâ tufweti bambukaka ti bantu ba tusolaka mu yôkesa ntangu nawu, mbo batusobesaka mu mpila ni mpila. (1 Kor. 15:33) Tamana sa keba mu beto beni, ntiana bwa tu lwengesa Yezu, mbo tukala mu sa tindiku na bantu balembo sarilaka mitieno mia Yehova. (2 Kor. 6:15) Diangana, mbo tumona mutambu mpe ka tubwa mo ko.

SARILA NTANGU’AKU MU MPILA YIYÔKELE BUBOTE

12. Ngano milongoki mia Yezu nti miafweti sa bu baketi kwe kêle nsuka ya nza yi?

¹² Milongoki mia Yezu ka miaketi’â zinga moko ko mu ntangu yi baketi kêla nsukunu ya nza yi. Yezu wabahana tisalu. Wabatuma mu samuna nsangu za mbote ‘ku Yerusaleme, ku Yude yayansoni na ku Samaria, na tii mu mbuka ze nkatika mala za mutoto.’ (Bis. 1:6-8) Diangana milongoki mia Yezu tisalu tia tinene babaka! Bu basa miamiansoni mu samuna kwe bantu, basarila ntangu’awu mu mpila yiyôkele bubote.

13. Mu bungu dia nti tufweti sarila ntangu’eto mu mpila yiyôkele bubote? (Bisi-Kolose 4:5)

¹³ Tanga Bisi-Kolose 4:5. Mu sa keba mu beto beni, tufweti banza mu mpila yi tusarilaka ntangu’eto. “Misamu mia tâ-pulukusu” milendi tu turila beto bansoni. (Ekl. 9:11) Luzingu lweto lulendi kwizi kulu suka.

14-15. Bwe tulendi sarila ntangu’eto mu mpila yiyôkele bubote? (Bahebre 6:11, 12)

¹⁴ Tulendi sarila ntangu’eto mu mpila yiyôkele bubote bu tasarila luzolo lwa Yehova na bu tuyika ngolo tindiku tieto na Yandi. (Za 14:21) Tufweti bâ “ba kangama, ba kwikama, ntangu zazansoni [tabâka] na tima tia sala mu tisalu tia Mfumu.” (1 Kor. 15:58, NWT) Buna, bu tula nsuka—nsuka ya luzingu lweto peleko nsuka ya nza yi ya mbi—ka tubâ na lwaka ko.—Mat. 24:13; Rom. 14:8.

¹⁵ Lumbu ti, Yezu mbo katatamanaka mu twarisa milongoki miandi bu basamunaka Timfumu tia Nzambi ha mutoto. Walungisa kani diandi. Mu nzila ya organizasio ya Yehova, Yezu mbo katukubikaka mu samuna, mpe mbo katuhanaka bisalulu bie neto nsatu mu mwangasa nsangu za mbote. (Mat. 28:18-20) Mbo tusalaka tisalu tia tu hana Yezu bu tusaka miamiansoni mu samuna na mu longesa bantu bakaka, na bu tubâka na meso ma tia bu tukwe kêle ti Yehova katûla nsuka mu nza yi ya mbi. Bu tusarila malongi me mu Bahebre 6:11, 12, mbo tusikama mu tivuvu tieto “tii ku nsuka.”—Tanga.

16. Ntia nzengolo bongele?

¹⁶ Yehova watisolela tilumbu na heure yi katûla nsuka mu nza yi ya Satana. Lumbu tio bu titula, Yehova mbo kalungisa mbikululu ze mu Zu diandi. Ntangu zakaka, tulendi mona ti nsuka ya nza yi ka yita kulu tula ko. Kâ, tilumbu tia Yehova ka tilandila ko! (Hab. 2:3) Bika tabonga nzengolo ya tatamana mu ‘sungamana Yehova,’ bu tukwe kêle ‘Nzambi ya mvukulu’eto na luvivululu lwalwansoni.’—Mika 7:7.