Hulda walungisa kani diandi

TALA ti ku ile ya Sangir Besar wabâ mu mivu miyôkele ku Indonésie, kampe wayizi mona mpangi zeto za zitatu za zikento ku la plage. Ba nguria ba zabakana bena ku plage yo mu bungu dia tisalu tiawu tia samuna—mbo babakisaka bantu mu bakula Bibila. Kâ bu beri samunaka, tima tiakaka beri saka.

Ntete-ntete, mbo beri kwendaka mu mamba mu baka matari ma manene, mpe mbo beri ma nangunaka. Matari makaka ma manene meri ntiana bale zi baburilaka foot. Ha manima, bakento bo mbo beri zakalaka ha chaise za fioti, mpe mbo beri sarilaka marto mu bula matari ngatu mabâ ma nguria ma fioti yôka meki ma nsusu. Bu beri mana silaka bo, mbo beri bongaka matari ma baburiri mu tûla mo mu kantine za plastike, mpe mbo beri nakaka escalier mu nata mo tii ku beri bêlaka. Kûna, mbo beri tûlaka matari mo mu sake za zinene zi balendi kotesa mu kaminio, ngatu basarila mo mu ntungulu za nzila.

Mosi mu mpangi zo ni Hulda. Luzingu lweri nandi mbo lweri mu hanaka nzila ya yôkesa ntangu yayingi mu tisalu tio yôka bampwana’andi. Vula-vula mbo keri sarilaka mbongo zi keri bakaka mu sumba bima bia mfunu bia bilumbu biabiansoni mu bungu dia kanda diandi. Kâ, wayizi batika mu sala mu lungisa kani diakaka dieri nandi. Tablette yeri nandi nsatu ngatu kabatika mu sarila JW Library^®. Hulda wazaba ti video na bima biakaka bia JW Library^® mbo biaketi mu bakisa mu tomesa tisalu tiandi tia samuna na mpila’andi ya bakurila Bibila.

Hulda wasa ngonda mosi na ndambu mu yôkesaka heure zole mu tisalu bilumbu biabiansoni mu pari, mu bula matari mamingi ngatu kafulusa kaminio yimosi ya fioti. Buna, wayizi baka mbongo za fwanana mu sumba tablette.

Hulda têle ti: “Ni bu sa ti wa nguria wa fwatika ndieri, mpe mu nitu mpasi ndieri monaka mu bungu dia matari, nayizi kulu zimbakana mpasi zo zazansoni, bu nayizi bâ na lenda dia sarila tablette yo ya môna, yakumbakisa mu bâ ngolo mu tisalu tia samuna na mu lembo mona mpasi zazingi mu kubama mu bungu dia tukutakanu twa Bakristo.” Têle mpe ti tablette yo yamubakisa mpe mu ntangu ya pandémie, mu bungu ti misamu miamiansoni mia timvuka mu apareye elektronike mieri yôkelaka. Mbo tuta yangalala tintwari na Hulda bu kalungisi kani diandi.