Mpēve ka bienā bivāngu ko bio biatoko lāma yé biasōfwa ĝazulu m’toto
Mpēve kô zē! Mu nza yacimpēve yô yilembomonekā, mpēve zambote ná zambi kô zē. Ngâno mpēve zango zē bāntu bō batokolāma yé basōfwa ĝazulu m’toto’e?
Kâni, ka bô bwâ ko. Bô mūntu bu kafwāka, kakwêndāka mu nza yacimpēve ko, nciâna bu bânzāka bântu bakā. Ambo bwe tuzābiri-wo’e? Bûngu Bîbila ni bô katâmatà. Bîbila die būku diamacyeleka dio ditūkiri kwe nkacika Nzâmbi yamacyeleka yâ-m’moshi, wô wē na nkûmbu Jehova. Ni Jehova wásala bāntu; tomonozāba kanso m’samu miô mitūrilā bāntu bô bu bafwāka.—Mikunga 83:18; 2 Timote 3:16.
Bîbila têle ci Nzâmbi wáyirika Adam, mūntu wantete, “mu mfūmfuta ya m’toto.” (Mbatukulu 2:7) Nzâmbi wám’tūla mu Paradîzo, nsaba ya Edêne. Wēci Adam wátumama kwândji mu nciēno wa Jehova, yâci káketiândji fwa ko; kongâ lolo wamōyo kwā kaciri ĝāzulu m’toto. Kâ bô Adam bu kásinuna nciēnoa Nzâmbi mu nko, Nzâmbi wám’tēla: “[Mbo] kāla mu m’toto, bûngu ni mô wátūka. Diānga nge wě mfūmfuta, ni mu mfūmfuta kwâ mpe vutukāla.”—Mbatukulu 3:19.
Ambo m’samu-wû mpilamoshi ni bwe’e? bānzêci, ambo Adam kwe keri ntete Jehova kam’sala mu mfūmfuta’e? keriā kûma ko. Keriândji ku mazulu ko môria mpēve yō yaketi kwîbutuka gâzulu m’toto. Keriā lāmā ko. Nciângu bô Jehova bu kátà ci Adam mu ‘m’toto kwā káketi vutukāla,’ m’samu-wû weri zolotā ci fwa káketifwa. Ká ketiā pepomoka ko mu kwênda mu nza yacimpēve. Ĝa lufwa, Adam wávutu kōndo jîngu, kásalā kó ko. Lufwa lwē kōndo kwa jîngu.
mbo ní bwe tutà mu bafwa bô bakā’e? Ngâno bâwu mpe kabashiriâ kó ko’e? Bîbila vuturi ci:
““Bâbonso [bāntu na bibulu] mbuka m’moshi kwā batâmakwēnda. Bâbonso mú mfūmfuta kwā bátūkiri, yé mú mfūmfuta kwā mpe batâmana vutu kāla.”—Ekleziaste 3:20.
““Bafwa . . . ka bazēbiâwu nákā m’samu m’moshi ko.”—Ekleziaste 9:5.
“Luzolo lwâwu mboko na djiki diâwu mboko mpe na cimpala ciâwu biwiri mana ĝombela.”—Ekleziaste 9:6.
“Ni salu, ni makani, ni nzābulu, ni ndwênga ka bienā kó ko ku Sheôle [mpiêma], mbuka yô yitâmakwēnda.”—Ekleziaste 9:10.
“[Mūntu] kêri mu m’totoândji; muna lumbu ciango mabānza mândji maĝōmbele.”—Mikunga 146:4.
Ngâno m’kapu-mî mpashi tâmiamona mu kwîkila’e? Tàla ni bô, bānzêci m’samu-wû: Mu kacidia makānda mamîngi, ni bakala bakā mbôngo mu sungamana kānda diândji. Wēci fwîri, kānda diândji dieka mu macimuna. Ntângu zakā m’kēntoândji mboko na bâla bândji bakôndolo mbôngo mu sūmba cîma cia djia. Kampe mpe m’tāntu mia bakala diango ni kānda diândji beka tânîmba. Ci-ciyūlêci: ‘Tàla bakala diango mōyo kwā kē mu nza yacimpēve, ambo múnci katâlembo kwêsungamane kānda diândji’e? Ambo múnci katâlembo kwêtabiri kānda diândji mu bāntu bababi’e?’ Wē bǒ būngu matsonoko mē mashîngana. Mūntu wango katâlāma ko, kenā na ndēnda ko ya sà nákā m’samu.—Mikunga 115:17.
Ngâno m’samu-wû mpilamoshi ci bafwa kabávutuâ lāma ko’e? Kâni, ka bō bwā ko. Lufutumuku mbo tulanda lwa-zônzela. Kâ wutâmazolo tà ci miô mitâyirika bafwa ka bazēbiâwu mio ko. Ka balendjiâwu ku mona ko, na wirikila ko, mboko mpe kúzōnzesa ko. Kufweniā bácîna ko. Ka balendjiā kúbakisa ko, yé ka balendjiā mpe kúnîmba ko..—Ekleziaste 9:4; Izaya 26:14.