Nzambi wayirika mukento wa ntete na bakala dia ntete

Yehova watûla nsaba mu mbuka yi beri tâka Edene. Nsaba yango ya fuluka yabâ mu bifulu, miti na bibulu. Ha manima Nzambi wasala bakala dia ntete, Adame, mpe wamufula mwela mu mbombo. Ngano zebi nti biayôka ha manima? Bakala dio diayizi bâ muntu wa moyo! Yehova wahana kwe Adame tisalu tia kipaka nsaba yo, mpe wamulomba mu hana nkumbu kwe bibulu biabiansoni.

Yehova wahana musiku wa mfunu kwe Adame. Yandi watâ kwe Adame: ‘Lendi dia mbutu za miti miamiansoni mie ku nsaba, kâ kufweti’â wadia mbutu za muti wumosi ko. Tala ti diri mbutu za muti wo, mbo fwa.’

Ha manima, Yehova watâ: ‘Tibakisi niyirika mu bungu dia Adame.’ Yandi wabwisa Adame tolo twa ngolo, mpe Nzambi wasarila lubândi lumosi lwa Adame mu yirika mukento mu bungu dia Adame. Nkumbu’andi Eva yabâ. Adame na Eva bayizi bâ kanda dia ntete. Bwe Adame kamona ku mutima bu kamona mukento’andi? Adame wayizi tomo bâ mu nsayi, ntiangu katâ: ‘Taleno bi yirikiri Yehova na lubândi lwani! Muntu ntiana meno.’

Yehova watâ kwe Adame na Eva mu buta bala na mu fulusa mutoto. Yandi wazolo ti basa ti mutoto wawansoni wabâ paradi, wuzolo tâ nsaba ya toma ntiana nsaba ya Edene. Yehova wazolo ti bamona nsayi ya sala ha timosi. Kâ misamu ka miayôkela buna ko. Mu bungu dia nti? Mbo tumona wo mu tinsamu tita landa.