Ntsia mpila bakuluntu babakishilaka tsimvuka e?

Mu nkubukulu’eto, katwena na mfumu za dibundu ko zitufutaka mu bungu dia salu tsiawu. Ntsiana mu ntangu ya batsika tsimvuka tsia bakristo, minkengi mio mifwanakane babieka mu “vunga tsimvuka tsia Nzàmbi.” (Bisalu 20:28) Bakuluntu bango bena bantu bena tsiwisa tsia tsibote na Nzàmbi. Tsimvuka batwarisaka mpe bavungaka, “ka mu mfwemoso’ako, kâ peleko mu luzolo, bo buzololo wo Nzàmbi; ka mu bungu dia ndandu ya nsoni’ako, kâ peleko mu tsimina.” (1 Piere 5:1-3) Ngâna ntsia salu batusarilaka e?

Beto basarisaka mpe bakengelelaka. Bakuluntu tsimvuka batwarisaka mpe bataninaka ngâti tsiaba na ngwisani ya mbote na Yehova. Mbo bazebi ti Nzàmbi wubaheni dema dio diadinene, bakuluntu kabayalaka kanda dia Nzàmbi ko, kâ peleko mbobasaka ti twaba bubote mpe mu nsayi. (2 Bisi-Korente 1:24) Ntsiana kwa mvungi katomokipaka dimeme dimoshi dimoshi, bakuluntu mpe mbobasaka ngolo mu zaba mpangi moshi moshi ya tsimvuka.​—Bingana 27:23.

Beto balongesaka kabwe tulenda sarila luzolo lwa Nzàmbi. Kontso lumingu, bakuluntu tukutakanu twa tsimvuka batwarisaka mu tsindisa tsiminu tsieto. (Bisalu 15:32) Babakala bango basalaka salu mu ntsima moshi salu tsia samuna batwarisaka, mbo basalaka neto mpe batuhanaka formasio mu m’samu miamiansoni mia salu tsia samuna.

Moshi moshi ha katsi dieto batsindisaka. Mu tubakisa mu kurisa tsindiku tsieto na Yehova, bakuluntu ba tshimvuka tsieto balenda kwizi tutala ku nzo zeto peleko balenda moka neto ku Nzo ya Kimfumu mu tuhana lubakusu mpe butsindi butukiri mu Matsonoko.​—Zaki 5:14, 15.

Katula salu tsi basalaka mu tsimvuka, bakuluntu babingi bisalu bia tsinsuni bienawu na dema dia kanda dienawu. Bafweti mpe baka ntangu ya banzila mio miamiansoni. Bufwanakane twajitisa mpangi zango zitasala salu tsia ngolo.​—1 Bisi-Tesalonike 5:12, 13.

• Bakuluntu ba tsimvuka salu tsiawu ni tsie?

• Ntsia mpila bakuluntu bakipilaka moshi na moshi ha katidieto e?