Mu bungu dia nti kwe mpasi zazingi?

1, 2. Ntia tiyuvu bantu babîngi batiyulaka?

HATA didiemi mu mamba. Muntu na buta wuta kubula ha zandu: wulwekese mpe wuhondele bantu babingi. Mukento wufwiri mu bungu dia kansere (timbevo timosi tia ngolo), bala bandi ba batanu ka basiri â na nguri ko.

² Bu tulaka misamu mia mpasi, bantu babingi batiyulaka ti: “Mu bungu dia nti nza ye ya fuluka mu diki na mbi?” Mbo nge, tiyuvu tio tia weka tiyula?

3, 4. (a) Ngano ntia biyuvu Habakuke kayula? (b) Yehova ntia mvutu kamuhana?

³ Bibila ditele ti bantu babingi mpe beri na timinu tia ngolo mu Nzambi, batiyula tiyuvu tio. Mu tifwani, mbikuri Habakuke wayula kwe Yehova: “Mu bungu dia nti takunsongela misamu mia mbi? Mu bungu dia nti tabikila mbi? Mu bungu dia nti vwandi na miangu mita kunzungirila? Mu bungu dia nti bakana na kondo kwa tiwisa kufulukiri?”​—Habakuke 1:3.

⁴ Nzambi wahana Habakuke mvutu. Mu Habakuke 2:2, 3, Nzambi wamukanisina ti mbo kayirika misamu. Yehova bantu ba katomono zolo. Bibila ditele ti: “Beto kafwilaka tiari.” (1 Piere 5:7, NWT) Nzambi na beto, Nzambi mpasi yina kwingi kayinaka zo. (Izaya 55:8, 9) Kâ, mu bungu dia nti kwe mpasi zazingi?

MU BUNGU DIA NTI KWE MPASI ZAZINGI?

5. (a) Ngano ntia misamu milongi mia mabundu mitâka mu bungu dia mpasi? (b) Ngano Bibila nti ditulongesaka mu bungu dia mpasi?

⁵ Muntu bu wumonaka mpasi, bapastere, mipelo na milongi miakaka mbo mivulu tâka ti: “miamiansoni mia Nzambi.” Ntangu zakaka, mbo bavutu tâka ti Nzambi watikubikila misamu miamiansoni miturilaka bantu, mpe ka tulendi â tabakula ko mu bungu dia nti we bo. Mbo bavutu yikaka ti: bu fwaka muntu wa kula peleko mwana fioti, Nzambi mu tele mbila ku mazulu. Kâ mio miamiansoni mia bungungu kwa miena. Yehova, kani kabwe ka lendi â katulumuna mpasi ko. Bibila ditele ti, Nzambi ka lendi â kasarila mbi na kondo kwa buderede ko.​—Yobe 34:10.

6. Mu bungu dia nti bantu babîngi batelaka ti Nzambi tulumunaka mpasi zeto?

⁶ Bantu babingi batâka ti, Nzambi tulumunaka mpasi zeto zazansoni. Mu bungu dia nti batelaka bo? Mu bungu ti babanzaka ti ni Nzambi we mfumu ya nza. Kâ talongokele mu timiko tia 3, mfumu ya nza ni Satana, Diabulu.

7, 8. Mu bungu dia nti nza ye ya fuluka mu mpasi?

⁷ Bibila ditele ti ‘mutoto wawansoni mu lutumu lwa nkwa mbi wena.’ (1 Za 5:19) Satana, mfumu ya nza, mutima ngolo we nandi. Ni yandi “tawubakasa (huna) mutoto wawansoni.” (Nzabukusu 12:9, NWT) Bantu babingi be ntiana yandi. Ntiangu mutoto we wa fuluka mu bungungu, mu diki na mu mbi.

⁸ Kâ nza ya fuluka ye mu mbi mu bungu dia misamu miakaka. Adame na Eva bakolama kwe Nzambi mpe basamburila masumu kwe bala bawu. Mu bungu dia masumu mo, ntiangu bantu bamwisaka bampwanazanawu mpasi. Mpe bazololo batuma bantu bakaka. Bantu bayika bakanaka bawu na bawu, mpe bayika nwanaka mizingu. (Ekleziaste 4:1; 8:9) Ntangu zakaka, mpasi mbo zitulumukaka mu bungu dia “misamu mia nzitukulu.” (Ekleziaste 9:11) Muntu wulendi bwila musamu mu bungu ti, huma ha mbi kena mu ntangu ya mbi.

9. Mu bungu dia nti tulendi bela na lukwikulu ti Yehova zebi ka mu bungu dia nti kabikilaka mpasi?

⁹ Kani kabwe, mpasi ka zitukaka kwe Yehova ko. Ka Yandi â ko tulumunaka mizingu, mbi na miangu. Ka Yandi â ko mpe tulumunaka midikutulu mia mutoto, bitembo bia ngolo mpe mvula zidiamisaka mahata. Kâ, lendi tiyula ti: “tala ti Yehova wena Nkwa Ngolo Zazansoni, mu bungu dia nti kabikilaka mpasi zi zazansoni?” Tuzebi ti Nzambi beto katomono zolo. Wuzololo tâ ti zebi ka mu bungu dia nti kabikilaka mpasi.​—1 Za 4:8.

MU BUNGU DIA NTI NZAMBI KABIKILAKA MPASI?

10. Ngano Satana ntia misamu kakwikisila Yehova?

¹⁰ Ku nsaba ya Edene, Satana wahuna Adame na Eva. Satana wakwikisila ti, Nzambi ntwarisi ya mbi yena. Mpe watâ kwe Adame na Eva ti, Nzambi tima tia tibote keri ba swekelaka. Satana wadinga bakwikila ti, yandi mbo kaketi bâ ntwarisi ya mbote, mpe ka beri â na nsatu lubakusu lwa Yehova ko.​—Mbatukulu 3:2-5; tala note ya 27.

11. Ngano ntia tiyuvu tuhanina mvutu?

¹¹ Adame na Eva bakolama kwe Yehova. Beri banzaka ti nswa wa sola mbote na mbi weri nawu. Kâ bawunakana. Ngano bwe Yehova kaketi songela ti Satana, Adame na Eva ka beri â na mpemba ko, mpe ni Yandi kwa zebi misamu mi yôkele bubote mu bungu dia beto?

12, 13. (a) Mu bungu dia nti Yehova kalembo honda Adame na Eve buna bu bakolama? (b) Mu bungu dia nti Yehova kabikila Satana kabâ mfumu ya nza, Mu bungu dia nti Yehova kabikila bantu batitwarisa bawu beni?

¹² Yehova ka honda Adame na Eva ko buna bu bakolama. Wabahana bweso bwa butana. Mpe wabikila bala ba Adame na Eva basola ntwarisi’awu bawu beni. Makani ma Nzambi meri ti mutoto wafuluka mu bantu ba sungama. Mbo wuyilama mpe, ni bu sa ti Satana wasa titantu.​—Mbatukulu 1:28; Izaya 55:10, 11.

¹³ Satana wakwikisila Yehova musamu ha meso ma bambazi. (Yobe 38:7; Daniele 7:10) Ntiangu Yehova kabikila Satana ntangu ngatu kasongela ti misamu mi katâ mia matieleka mieri. Yehova wabikila mpe bantu ntangu ngatu basongela tala ti lenda dia ba nawu mu titwarisa bawu beni. Ntiangu kababika batûla guvernema zawu mu lutumu lwa Satana.

14. Ngano ntangu yayôka, nti ya songela?

¹⁴ Tuka mafunda ma mvula, bantu bayela mu titwarisa bawu beni. Kâ, ka balendaka ko. Mpe wusongele ti Satana ngungu yena. Bantu nsatu lubakusu lwa Nzambi ye nawu. Mbikuri Yeremi watâ ti: “Ô Yehova, wa ntomono zaba ti muntu ka wulendi â wazaba nzila’andi yandi beni ko. Muntu wukwe yende ka wulendi â watitwarisa ko.”​—Yeremi 10:23.

MU BUNGU DIA NTI YEHOVA KAKÊLAKA TUKA NTAMA?

15, 16. (a) Mu bungu dia nti Yehova kalembo katurilaka mpasi tuka ntama? (b) Mu bungu dia nti Yehova keka lembo yirikila misamu mia tulumuna Satana?

¹⁵ Mu bungu dia nti Yehova kalembo katurilaka mbi tuka ntama? Mu bungu dia nti kabikilaka mbi? Mu songela ti, luyalu lwa Satana lwa mbi lwena, ntangu yayingi yafwanakana. Bantu bayêla mu soba guvernema, kâ, ka zasobesa misamu ko. Ni bu sa ti bantu ba sianse na ba teknike bima bia nzitukulu bata sala, kondo kwa buderede, bumputu, mbi na mizingu funa mita funa. Wusongele ti, bantu ka bena na lenda dia titwarisa bawu beni ko, nsatu ye nawu ya lubakusu lwa Nzambi.

¹⁶ Yehova ka yirika misamu mia tulumuna Satana ko. Bu kaketi mia yirika, mbo kaketi bakisa Satana mu twarisa nza. Kani kabwe, ka lendi â kasika lutumu lwa Diabulu ko! Mpe, bantu mbo baketi kwikila ti lenda dia titwarisa bawu beni die nawu. Kâ, bungungu bwena. Yehova ka lendi â kabanata mu kwikila bungungu bwa mpila yo ko! Yehova ka hunaka ko.​—Bahebre 6:18.

17, 18. Ngano, Yehova bwe kakaturila mbi ya tulumuna Satana?

¹⁷ Bukolo bwa Satana na bwa bantu bwatulumuna mbi yayingi. Ngano Yehova lendi ya katula? Yee. Nzambi ka lembanaka musamu ko. Yehova zebi ka ntia ntangu kasongela ti mio mia mu kwikisila Satana mia bungungu kwa miena. Ha manima ma ntangu yo, mbo kasobesa mutoto mu paradi, buna bu kawayila wo. Bantu bô be mu “mpiema za mbambukulu” mbo bavumbuka kwe ba fwa. (Za 5:28, 29) Bantu ka bavutu â bêla ko mpe ka bavutu â fwa ko. Yezu mbo kayirika misamu miamiansoni mia tulumuna Satana. Yehova mbo kasarila Yezu mu ‘zimbakasa bisalu bia Diabulu.’ (1 Za 3:8) Nsayi yayingi ye neto mu bungu ti Yehova luvivululu lwe nandi mu beto. Tuheni ntangu ya longoka mu mu zaba na mu mu sola ngatu kabâ ntwarisi’eto. (Tanga 2 Piere 3:9, 10.) Mpe bu tumonaka mpasi, bakisa katubakisaka mu korela.​—Za 4:23; tanga 1 Bisi-Korente 10:13.

¹⁸ Yehova ka tu tumaka mu ngolo ko mu mu sola kabâ ntwarisi’eto. Wahana kwe bantu kabu dia toma di batâka: timpwanza tia sola. Tataleno ka bwe tulendi sarila kabu dio.

NGANO BWE SARILA TIMPWANZA TIA KU HANA NZAMBI?

19. Ngano ntia kabu Yehova katuhana? Mpe mu bungu dia nti tufweti zoloko kabu dio?

¹⁹ Timpwanza tia sola kabu diena dia ntalu dia tu hana Nzambi. Timpwanza tio, mbo tituswasikisaka na bibulu. Bibulu ka bilendi â biabonga nzengolo ya sola mbote na mbi ko. Kâ beto, tulendi sola luzingu lu tunata mpe tulendi bonga nzengolo ya tâ Yehova Nsayi. (Bingana 30:24-28) Beto twena mpe ba swaswana na masini masalaka kwa salu ti bamuwayila. Kâ beto, twena na timpwanza tia sola ka ntia mpila muntu tuzololo mu bâ, tia sola ndiku zeto na tia sola luzingu lu tunata. Yehova zololo taba na luzingu lwa nsayi.

20, 21. Ntia nsololo yiyôkele bubote lendi sa mu ntangu yi?

²⁰ Yehova zololo ti tamuzolo. (Matie 22:37, 38) Wena ntiana Tata dibâka mu nsayi bu mu telaka mwana’andi “Nge nzololo” mu mutima wumosi. Yehova bika katubikaka mu sola tala ti Yandi tusarila peleko ka tumusarila ko. Satana, Adame na Eva basola mu lembo mu sarila. Mbo nge, bwe sarila timpwanza tia kuhana Nzambi?

²¹ Bantu babingi basola mu tumama kwe Yehova mpe bakala Satana. Nge mpe, lendi sarila timpwanza tiaku mu sarila Yehova. (Bingana 27:11) Mu nza ya môna, Yehova mbo kakatula mpasi zazansoni. Ngano nti fweti sa mu baka luzingu mu nza ya môna? Timoko tita kwiza mbo tihana mvutu mu tiyuvu tio.