TIMOKO TIA 8
Mubwenabwe Nzàmbi kabikilaka mbi na mpashi?
1. Mbi bwe yabatikila e?
Nzàmbi bikiri bantu batuma ntangu yayila mu songila ti kabalendâ bamanisa misamu mia bantu ko
Mu ntangu Satana yikata bungungu bwa ntete ni buna mbi yabatika ha zulu m’toto. Satana mbazi yambote yaba mbo bamusala. “Kâ kashikama mu matsieleka ko.” (Za 8:44) Wabanandi ngâ bamusambila, kâ peleko lusambulu Nzàmbi kwa lufwanakane. Wawuna m’kento wantete, Eve, Wamuwisa ngâ katumamana yandi ka Nzàmbi’ako. Adame walanda Eve mu kolamana Nzàmbi. nzengolo yikabonga ya tunatina mpashi na lufwa.—Tanga Mbatukulu 3:1-6, 19.
Satana mbokalomba kwe Eve kakolamana Nzàmbi, ni batika kuna keribatika mu tombokela luyalu lwa Nzàmbi. Bantu babingi ni be ku lweka lwa Satana bakariri Nzàmbi kaba Mfumu’awu. Ni bô Satana kayika “mfumu ya nza yi.”—Tanga Za 14:30; 1 Za 5:19.
2. Ngâna bima biasala Nzambi kabiabâ biasungama ko e?
Bisalu biabiansoni biasala Nzàmbi bialunga bieri. Bantu na mbazi basala Nzàmbi beri na ndendolo ya tumamana Nzàmbi mu miamiansoni. (Lubambu 32:4, 5) Nzàmbi watusala na tsimpwanza tsia sola mu sarila mbote peleko mbi. Tsimpwanza tsiango tsituheni ndila ya songila luzolo lweto kwe Nzàmbi—Tanga Zaki 1:13-15; 1 Za 5:3.
3. Mubwenabwe Nzàmbi katabika mpashi tii lumbuti e?
Mu bungu dia mwa ntangu Yehova wabika bantu batombokela luyalu lwandi. Mubwenabwe? Mu songila ti ngolo ni ngolo zibasa mu tsituma kondo kwa lubakusu lwa Nzàmbi, bantu kabalenda bamona bubote ko. (Ekleziaste 7:29; 8:9) Mu 6 000 ma mvula matumini bantu, wutomono moneka ti luyalu lwa bantu lulembane mu manisa mizingu, vwandi, bubelo na kondo kwa lunungu.—Tanga Yeremi 10:23; Bisi-Rome 9:17.
Mu luswaswanu na luyalu lwa bantu, luyalu lwa Nzàmbi mbo lunatina mambote kwe bô batamburi lo. (Izaya 48:17, 18) Ntamana Yehova mbo katula nsuka mu bimfumu biabiansoni bia bantu. Bantu bô batamburi ti Nzàmbi kabayala ni bawu kwa bazinga ha m’toto.—Izaya 11:9; Tanga Daniel 2:44.
Tala video Mu bungu dia nti Nzambi kata bikila mpasi?
4. Ntsia diambu mvivululu ya Nzàmbi yituzuburiri ndila e?
Satana watá ti, nakani muntu moshi kalenda kasarila Yehova mu luzolo lwa mutima moshi ko. Ngâna mbo tambula mu songila ti Satana wuna kwa kawuna e? Lenda bwa sa! Mvivululu ya Nzàmbi yiheni bantu babansoni ndila ya songila tala ti lutumu lwa Nzàmbi tutamburi peleko lutumu lwa bantu. Ni ndiatulu’eto yisongila kanani tusolele.—Tanga Yobe 1:8-12; Bingana 27:11.
5. Bwe tulenda solela Nzàmbi kaba Mfumu’eto e?
Mpila yatunatinaka luzingu lweto yisongele tala ti tuzololo Nzàmbi kaba Mfumu’eto
Mu songila ti Nzàmbi tusolele kaba Mfumu’eto, tu fweti tomba mu zaba mpe mu sarila nsambululu ya matsieleka yitukiri mu Zu dia Nzàmbi Bibila. (Za 4:23) Tulenda kala Satana katutuma tala ti katutakota mu misamu mia politike na mu mizingu ko, ntsiana bwasa Yezu.—Tanga Za 17:14.
Satana ngolo zandi kasarilaka mu tuma bantu ku nsalulu za nsoni mpe za mbi. Tamana kala nsalulu zîna, ndiku zeto zakaka na bishi kanda bakaka balenda tusehosolo peleko tuyimina ndila yango. (1 Piere 4:3, 4) Tu fweti sola : Ngâna mu mulonga wa bantu bô bazololo Nzàmbi tukota e? Ngâna mishiku miandi mia ndwenga mpe mia luzolo mia tutumamana e? Twamana bwasa mbo tu songesa ti Satana wuna kwa kawuna mbokata ti muntu kamana ba mu mpashi, kalenda katumamana m’samu mitaka Nzàmbi ko.—Tanga 1 Bisi-Korente 6:9, 10; 15:33.
Luzolo lwe na Nzàmbi mu bungu dia bantu lutusongese ti mbi na mpashi mbo ziwa. Bô bakwikiri ti ni bô wena mpe basolela Nzàmbi kaba mfumu’awu, mbo baba mu kiese ha zulu m’toto mankululu.—Tanga Za 3:16.