Yakobe wabiarila fwa

Izake mvula 40 zabâ nandi bu kakwela Rebeka. Yandi keri tomo zoloko. Bala bole ba babakala babuta—mapasa.

Mwana wa ntete Ezawu beri mu tâka, mboko wa nzole Yakobe. Ezawu ku mbazi keri zoloko mu kwe zeba, mpe tisalu tia mbingu tia katomo zaba. Kâ Yakobe ku nzo keri vulu zakalaka.

Mu ntangu yina, mwana wa ntete lweka luyôkele bunene lwa fwa dia kanda keri biarilaka, ha manima ma lufwa lwa tata’andi. Mbongo zingi keri bakaka na misitu, yôka bala bakaka. Mu kanda dia Izake, mu fwa dio tima tiakaka tiabâ mô: Yehova mbo kaketi sarila mwana wa ntete mu lungisa makani ma kasa kwe Abrahame. Kwe Ezawu, makani mo ka mabâ mfunu ko; kâ kwe Yakobe makani mo nkatika mfunu mabâ.

Tilumbu timosi, Ezawu bu kamana sa mbingu tilumbu tia mukaka, wakota ku nzo wa fwatika. Yakobe bima bia toma keri lambaka. Ezawu bu kawâ nsunga ya toma, watâ: ‘Ntamana mbo nifwa mu nsatu! Kungana ndambu supu dio dia mbwaki!’ Yakobe watâ: ‘Ka wena musamu ko, kâ toko kunkanisina ti mbo kungana fwa diaku.’ Ezawu watâ: ‘Fwa diani ka ndiena na dio nsatu ko! Lendi dia bonga kwaku. Meno bidia kwa bie nani nsatu.’ Bwe ta banza? Ngano Ezawu musamu wa mbote kayirika? Diangana kâni. Ezawu wayizi kala tima tia nkatika ntalu mu bungu dia ndonga ya bidia.

Izake bu katomo nuna, ntangu yafwana kwe yandi mu sakumuna mwana’andi wa ntete. Kâ, Rebeka wabakisa Yakobe mu biarila lusakumunu lwango. Ezawu bu kabakula wo, watomo baka nkesi, mpe wadinga mu honda mpangi’andi. Mu bungu ti Izake na Rebeka bazolo mu kengerela Yakobe, bamutêla: ‘Yenda wabâ kwe nkazi ya nguri’aku, Labane, tii Ezawu bu kadzuna.’ Yakobe wawîla bibuti biandi mpe wadioka mu vukisa luzingu lwandi.