Ngamba yatumamana Nzambi

Yozefe, wumosi wabâ wa bala ba mansukina ba Yakobe. Bayaya bandi bamona ti yandi ni mwana weri tomo zoloko tata’awu. Mu mabanza ma nge, ngano nti beri monaka ku mutima? Timbanda tiabâ nawu, mpe Yozefe beri yinaka. Misamu miayizi tomo beba, Yozefe bu kabazonzela ndozi za nzitukulu zi kaloto. Bawu babanza ti musamu wo weri zolo tâka ti tilumbu tiaketi bâ kô bawu ti baketi fukama ha matu ma Yozefe. Tûka ntangu yîna, bawu bayizi vutu tomo mu yina!

Tilumbu timosi, bayaya bandi bu beri kêlaka bindongo penepene na hata dia Sisheme, Yakobe watambika Yozefe mu kwe ba tala. Bu bamona Yozefe weri kwizaka, bawu batâ: ‘Taleno, muntu’eto wulotoko ndozi. Tamuhondeno!’ Ha manima bawu babwila Yozefe, mpe bamulosa mu bulu dimosi dia mamba dia dila. Kâ Yuda watâ: ‘Kâni! Tamutekeno kwa, kabâ ngamba.’ Buna, bawu bamuteka mu ntalu ya mipata 20 mia arza kwe Bisi-Madiane beri kwe tâka nkari ku Ezipte.

Ha manima, bayaya ba Yozefe bavwika tinkuti tiandi mu menga ma nkombo, mpe batambika tio kwe tata’awu bu batâ: ‘Ngano ka tiena tinkuti tia mwana’aku ko?’ Yakobe wabanza ti tibulu tia ku sangi tiahonda mwana’andi. Yandi watomo bâ mu tiari. Ka kwabâ muntu ko weri lendaka mu mu tindisa.

Ku Ezipte, Yozefe bamuteka, mpe wayizi bâ ngamba kwe bakala dimosi dia nsangu di beri tâka nkumbu Potifare. Kâ, Yehova na Yozefe kabâ. Potifare wamona ti Yozefe bubote keri salaka, mpe muntu wu balendi sikirila wabâ. Buna Potifare wamulomba mu kipaka bimvwama biandi biabiansoni.

Mukento wa Potifare wamona ti Yozefe wa toma wabâ, mpe ngolo zazingi zabâ nandi. Lumbu basiri lumbu, Yozefe keri lombaka mu vukasa nitu na yandi. Ngano Yozefe nti kasa? Yandi wakala mpe wamutêla: ‘Kâni! Musamu wo wa mbi wena. Mfumu’ani me kasikirilaka, mpe nge ni mukento’andi. Namana vukasa nitu na nge, mbo niyirika masumu ha meso ma Nzambi!’

Tilumbu timosi, mukento wa Potifare wayêla mu tuma Yozefe mu ngolo mu vukasa nitu na yandi. Yandi wamubwila mu tinkuti, kâ Yozefe wadioka. Potifare bu kakâla ku nzo, mukento’andi wahuna ti Yozefe wadinga mu vukasa nitu na yandi. Buna, Potifare wabaka nkesi, mpe watûla Yozefe ku boloko. Kâ Yehova ka zimbakana Yozefe ko.