Yehova ka zimbakana Yozefe ko

Yehova ka zimbakana Yozefe ko. Yozefe bu kabâ ku boloko, Farao, mfumu ya ku Ezipte, waloto ndozi zi beri lembo lendaka mu bangula. Tisari tiandi timosi tiamutêla ti Yozefe lenda diabâ nandi dia bangula ndozi. Buna, Farao walomba ti banata Yozefe.

Farao wamuyula: ‘Ngano lendi kumbangurila ndozi zani?’ Yozefe wamuvuturila: ‘Bidia biabingi bibâ ku Ezipte mvula za 7, ha manima ka ku vutu’â bâ bidia ko mvula za 7. Buna, fweti sola muntu we na mayela, wulendi kutakasa bidia. Dieka bo, bantu ka bafwa mu nsatu ko.’ Farao wamutêla: ‘Ni nge nsolele! Ni nge bâ muntu wuyôkele ngolo ku Ezipte ha manima mani!’ Ngano Yozefe bwe kalendela mu bangula ndozi kwe Farao? Yehova wamubakisa.

Mu mvula 7 zalanda, Yozefe wakutakasa bidia. Ha manima, nsatu yakota ha mutoto wawansoni ntiana bwa tâ Yozefe. Bantu mu nsi zazansoni beri tûkaka mu kwizi sumba bidia kwe yandi. Tata’andi, Yakobe, wabaka nsangu ti bidia biabâ ku Ezipte. Buna yandi walomba kwe bala bandi ba 10 mu kwe sumba bidia ku Ezipte.

Bala ba Yakobe baye monekena Yozefe. Mbala mosi, Yozefe wababambukila, kâ bawu ka bamubambukila ko. Bawu bayizi fukama ha matu mandi ntiana mu ndozi yi kaloto bu kabâ ntwenia. Yozefe wadinga mu zaba tala ti mpangi zandi yandi kwa zeri yinaka. Yozefe wabatêla: ‘Beno nsi’eto kwa lwizi tala mu mayela. Beno, misamu mi tulembolo na mio ngolo lwizi tala.’ Bawu batâ: ‘Kâni! Ku Kana tutûkiri, beto mpangi 12 twena. Mpangi’eto yimosi yafwa, mpe mpangi’eto ya mansukina na tata’eto kasîri.’ Buna, Yozefe wabatêla: ‘Mbo nilukwikila tala ti lukêri na mpangi’eno ya mansukina.’ Buna bawu bakâla kwe tata’awu.

Bidia bu biayizi manisa, Yakobe wavutu lomba kwe bala bandi mu kâla ku Ezipte. Buna bawu banata Benyamine, mpangi’awu ya mansukina. Yozefe wabatonta. Yandi wasweka kopa diandi dia arza mu nkutu ya bidia yabâ kwe Benyamine, mpe wabakwikisila ti laba balaba dio. Bisari bia Yozefe biamona kopa mu nkutu ya Benyamine. Mpangi zandi zatomo yituku. Bawu balomba kwe Yozefe kabasemba, kani kasemba Benyamine.

Dieka bo, Yozefe wabakula ti mpangi zandi zasoba. Buna, Yozefe ka lenda ko mu tizabirila ntangu yayingi. Yandi wabatika mu dila mpe wabatêla: ‘Meno ni Yozefe, mpangi’eno. Ngano tata’ani wa moyo kwa watiri?’ Mpangi zandi zatomo yituku. Yozefe watomo ba têla: ‘Ka lubândi na mutima lwaka bu lwakunteka. Nzambi wakuntambika kwawu ku, ngatu navukisa luzingu lwa bantu. Buna, seno manzangu, nateno tata’ani kwawu ku.

Bawu bakâla kwe tata’awu mpe bamuhana nsangu zo za mbote. Ha manima, bawu bamunata ku Ezipte. Ha manima ma mvula zazingi, Yozefe na tata’andi bavutu monana.