Hana wasambila mu buta mwana

Mwana Israele wumosi wu beri tâka nkumbu Elkana wabâ na bakento bole, Hana na Penina; kâ Hana keri tomo zoloko. Penina, Hana keri seheselaka ntangu zazansoni mu bungu ti Hana kabâ na mwana ko, kâ Penina bala babingi babâ nandi. Mivu miamiansoni, Elkana kanda diandi keri nataka ku Shilo mu kwe sambila ku tabernakle. Tilumbu timosi, bu babâ ku Shilo, Elkana wamona ti Hana mu tiari kabâ. Yandi watâ: ‘Kudilandi Hana. Na nge ndiena. Nge nzololo.’

Ha manima, Hana waye sambila ha yandi kaka. Bu keri dilaka, yandi walomba kwe Yehova kamubakisa. Hana wasa kani: ‘Yehova, tala ti kungeni mwana wa bakala, mbo nikuhana wo, mpe mbo kakusarila luzingu lwandi lwalwansoni.’

Eli, mfumu-nganga-nzambi, wamona Hana weri dilaka, mpe wabanza ti malavu kanwa. Hana wamutêla: ‘Kâni mfumu, ka nwini’â malavu ko. Musamu wa mpasi we nani, mpe kwe Yehova nita wa zonzelaka.’ Eli wabakula ti wawubakana, mpe watâ kwe Hana: ‘Bîka Nzambi kakuhana bio bita dinga.’ Hana wamona bubote, mpe wayenda. Mu muvu wo, Hana wabuta mwana wa bakala, mpe wamutâ nkumbu Samwele. Ngano lendi banza nsayi yabâ na Hana?

Hana ka zimbakana kani di kasa kwe Yehova ko. Buna kwa Samwele bu kabîka mu nwa mabeni, Hana wamunata ngatu sala ku tabernakle. Yandi watâ kwe Eli: ‘Mwana ni wu ndieri sambirilaka. Nimudefese kwe Yehova luzingu lwandi lwalwansoni.’ Elkana na Hana, mivu miamiansoni beri kwe talaka Samwele, mpe tiyunga tia môna tialembo bâ na moko beri mu natinaka. Yehova wahana Hana bala batatu bakaka ba babakala na bala bole ba bakento.