Yehova zonzele kwe Samwele

Mfumu-nganga-nzambi Eli, bala bole ba babakala babâ nandi beri salaka ku tabernakle. Nkumbu zawu Hofni na Finease. Bawu ka beri’â tumamanaka misiku mia Yehova ko, mpe bantu beri mwisaka mpasi. Bala ba Israele bu beri nataka mikayulu kwe Yehova, Hofni na Finease misunia mia mbote beri bongaka mu bungu dia bawu beni. Eli wawâ misamu mieri yirikaka bala bandi, kâ ka sa tima ko. Ngano Yehova mbo kaketi bîka ti musamu wo watatamana?

Ni bu sa ti Hofni na Finease ba kula babâ yôka Samwele, yandi ka landa tifwani tiawu ko. Yehova wayangalala mu Samwele. Mpimpa yimosi, Samwele bu kabâ ku tolo, wawâ zu dimosi diamutâ mbila mu nkumbu’andi. Samwele wavumbuka, wayenda kwe Eli, mpe watâ: ‘Wu ni meno!’ Kâ Eli watâ: ‘Ka nikutêla mbila ko, yenda sêka.’ Samwele wakâla ku mfulu. Zu diango diavutu mu tâ mbila. Samwele bu kawâ zu diango mbala ya ntatu, Eli wabakula ti Yehova weri tâka Samwele mbila. Yandi watâ kwe Samwele ti tala ti wavutu wâ zu diango, wafweti tâ: ‘Yehova zonza. Tisari tiaku Nge tita wâ.’

Samwele wakâla ku mfulu. Ha manima, yandi wawâ: ‘Samwele! Samwele!’ Yandi watâ: ‘Zonza, mu bungu ti tisari tiaku Nge tita wâ.’ Yehova wamutêla: ‘Têla Eli ti mbo nimusemba, yandi na kanda diandi. Yandi zebi ti bala bandi misamu mia mbi bayirikaka ku tabernakle’ani, kâ ka saka tima ko.’ Mu pari tialanda Samwele wazibula mielo mia tabernakle ntiana bu keri toko saka. Bunkuta bwabâ nandi bwa tâ misamu mia mu têla Yehova kwe mfumu-nganga-nzambi. Kâ Eli wamutâ mbila, mpe wamuyula: ‘Mwana’ani, Yehova nti kakutêlele? Kuntêla miamiansoni.’ Buna Samwele watâ misamu miamiansoni kwe Eli.

Samwele bu keri kwe kuri, Yehova watatamana mu bâ na yandi. Mu nsi yayansoni, bala ba Israele bazaba ti Yehova wasola Samwele mu bâ mbikuri na mfundisi.