Tempelo mu bungu dia Yehova

Salomo bu kayizi bâ mutinu wa Israele, Yehova wamuyula: ‘Nti zololo nakuhana?’ Salomo watâ: ‘Me ntwenia yena, mpe ka nzebi’â misamu mi niyirikaka ko. Buna, kungana ndwenga ngatu natomo kipa kanda diaku.’ Yehova watâ: ‘Mu bungu ti lombele ndwenga, mbo nisa ti wabâ na ndwenga yôka bantu babansoni ha mutoto. Mbo nikuhana mpe bimvwama biabingi. Mboko tala ti kuntumamane, mbo bâ na luzingu lwa lula.’

Salomo wabatika mu tunga Tempelo. Yandi wasarila ore, arza, mabaya na matari ma ntalu. Mafunda ma bakento na babakala bazaba tisalu basala mu ntungulu ya Tempelo. Ha manima ma mvula 7, ntungulu ya Tempelo yawa mpe ya kubama yabâ ngatu bahana yo kwe Yehova. Ziku diabâ mu Tempelo, di beri haninaka mikayulu. Salomo wafukama ha ziku mpe wasambila Yehova: ‘Ô Yehova, Tempelo yi ka yena ya nkatika ya yinene ko mpe ka yena ya nkatika ya toma ko mu bungu dia Nge; kâ bîka watambula nsambululu’eto mpe wawâ tusambulu tweto.’ Ngano Yehova nti kabanza mu Tempelo na mu lusambulu lwa Salomo? Buna kwa Salomo kamanisa mu sambila, Yehova watambika tiya twatûka ku zulu twayoka mukayulu wabâ ha ziku. Dieka bo, Yehova wasongela ti watambula Tempelo. Bala ba Israele bu bamona musamu wo bayizi bâ mu nsayi.

Salomo wa zabakana wabâ mu bungu dia ndwenga zandi mu Israele yayansoni na mu nsi zakaka. Bantu yandi beri kwizi talaka mu baka lubakusu lwa yirikila misamu miawu. Mutinu wa ku Sheba mpe wayizi mu tonta bu kamuyula biyuvu bia mpasi. Bu kawâ mvutu zandi, mutinu wa Sheba watâ: ‘Misamu mi ndieri wâka mu bungu dia nge ka ndieri’â mia kwikilaka ko. Kâ bwawu bu mweni ti ndwenga ze naku ziyôkele misamu mi beri kuntêlaka. Nzambi’aku Yehova wakusakumuni.’ Luzingu lwa toma lwabâ mu bungu dia kanda dia Israele, mpe bantu babansoni mu nsayi babâ. Kâ, misamu mbo miaketi soba.