Binwani bia ngolo bia Yehova

Mutinu wa Siri, Bene-hadade, keri’â bîkaka ko mu nwanisa Israele. Kâ mbikuri Elize mutinu wa ku Israele keri lwengesaka ntangu zazansoni, ntiangu kalenda mu vûka. Buna Bene-hadade wabonga nzengolo ya bwila Elize. Yandi wawâ ti Elize ku hata dia Dotane kabâ, mpe watambika mukangu wa binwani wa Bisi-Siri mu mu bwila.

Bisi-Siri bayiza ku Dotane mu mpimpa. Tilumbu tialanda mu pari, tisari tia Elize tiadûka, mpe tiamona ti hata diadiansoni bazungurila dio kwe mukangu wa wunene wa binwani. Bunkuta bwatomo mu baka, mpe watâ mu ngolo: ‘Elize, nti tweka sa?’ Elize wamutêla: ‘Babingi bê na beto, yôka bô bê na bawu.’ Mu ntangu yo, Yehova wasongela kwe tisari tia Elize ti miongo mieri zungurilaka hata dio mia fuluka miabâ mu mabalu na bipusu bia muzingu bia tiya.

Binwani bia ku Siri bu biadinga mu bwila Elize, yandi wasambila: ‘Yehova, mulemvo’aku, ba honda meso.’ Hô nkatika bendo, ni bu sa ti mona beri monaka, binwani ka bieri’â vutu zabaka mbuka yi babâ ko. Elize watâ kwe binwani: ‘Hata luwubakane. Kundandeno, mpe mbo nilunata kwe muntu wu luta dinga.’ Bawu balanda Elize tii ku Samaria kweri bâka mutinu wa Israele.

Dieka bo, binwani biabakula ntia kûma babanata. Mutinu wa Israele wayula Elize: ‘Ngano mfweti ba honda?’ Ngano Elize wasarila bweso bo mu kârisa mbi kwe bantu badinga mu mu mwisa mpasi? Kâni. Elize watâ: ‘Kubahondandi. Ba hana bidia, mpe ba kârisa mu nzila’awu.’ Buna, mutinu wakubika salaka dia dinene, mpe wabakârisa ku hata diawu.