Mbazi ya Yehova yakengerela Ezekiase

Timfumu tia makanda ma 10 ma Israele tiayizi bâ mu lutumu lwa Bisi-Asiri. Buna Senakeribe, mutinu wa Asiri, wadinga mu kotela timfumu tia makanda ma mole ma Yuda. Yandi wabatika mu kotela mahata dimosi-dimosi. Kâ hata di katomo kekolo ni Yerusaleme. Senakeribe ka zaba ko ti Yehova Yerusaleme keri kengerelaka.

Ezekiase, mutinu wa Yuda, wafuta mbongo zazingi kwe Senakeribe ngatu kabîka Yerusaleme. Ni bu sa ti Senakeribe mbongo za kabonga, watambika binwani biandi bia ngolo mu nwanisa Yerusaleme. Bantu ba hata dio babaka bunkuta mu bungu ti Bisi-Asiri penepene babâ. Buna Ezekiase wabatêla: ‘Ka lubândi na bunkuta. Bisi-Asiri ngolo ze nawu, kâ Yehova mbo katuhana ngolo ziyôkele za bawu.’

Senakeribe watambika Rabshake, tinati-nsangu tiandi, ku Yerusaleme ngatu kasehesela bantu. Rabshake watelama mu ndeko ya hata mpe wabatika mu tâ nu ngolo: ‘Yehova ka lendi’â kalubakisa ko. Ezekiase ka lu hunandi. Ka kwena nzambi ko yilendi lu kengerela mu beto.’

Ezekiase wayula kwe Yehova nti kafweti sa. Yehova watâ: ‘Kubândi na bunkuta mu misamu mi ta tâ Rabshake. Senakeribe ka kotela Yerusaleme ko.’ Ha manima, Ezekiase wabaka mikanda mia tambika Senakeribe. Mikanda miatâ: ‘Tihaneno. Yehova ka lendi’â kaluvûkisa ko.’ Buna, Ezekiase wasambila: ‘Mulemvo’aku Yehova, tu vûkisa, ngatu babansoni bazaba ti Nge ni Nzambi ya matieleka.’ Yehova wamutêla: ‘Mutinu wa Asiri ka kwiza ku Yerusaleme ko. Mbo nikengerela hata diani.’

Senakeribe lukwikulu lwabâ nandi ti mbo kaketi kotela hata dia Yerusaleme. Kâ mpimpa yimosi, Yehova watambika mbazi ha mbuka yabâ binwani bia Bisi-Asiri mu ndeko ya hata. Mbazi yahonda binwani 185000! Mutinu Senakeribe wahombesa binwani biandi biayôka ngolo. Ka keti’â vutu sa bwakaka ko, ni kakâla ku hata diandi. Yehova wakengerela Ezekiase na Yerusaleme, ntiana bu kakanisina wo. Tala ti ku Yerusaleme wabâ, ngano mbo waketi tûla lukwikulu lwaku mu Yehova?