Timfumu tizingila mankululu

Mpimpa yimosi, Nebukadenezare waloto ndozi ya nzitukulu. Ndozi yango yatomo mu susumuna, ni kalembana mu bwa tolo. Yandi watâ mbila nganga zandi mpe wabatêla: ‘Kumbangurileno ndozi yi ndotolo.’ Bawu batâ: ‘Tu têla ndozi yi lotolo, Ô mutinu.’ Kâ Nebukadenezare wabatêla: ‘Kâni! Lufweti kuntêla ndozi yi ndotolo; tala ti kâni mbo niluhonda.’ Bawu bavutu mu têla: ‘Tu têla ndozi yi lotolo, mpe mbo tukuhana mbangululu.’ Yandi watâ: ‘Beno bansoni me luta zolo huna. Kuntêleno ndozi yi ndotolo!’ Bawu batâ kwe mutinu: ‘Ka kwena muntu ko wa moyo wulendi sa tima tia mpila yo. Musamu wuta tu lomba ka wulendi’â wayilama ko.’

Nebukadenezare watomo baka nkesi, mpe walomba ti bahonda bantu babansoni ba ndwenga ba mu nsi ya Babilone. Ha kati diawu Daniele, Shadrake, Meshake na Abede-nego. Daniele walomba kwe mutinu kamuhana ntangu fioti. Ha manima, yandi na ndiku zandi basambila Yehova, mpe bamulomba kababakisa. Ngano Yehova nti kasa?

Mu timona-meso timosi, Yehova wasongela ndozi ya Nebukadenezare kwe Daniele mpe wamuhana mbangululu. Tilumbu tialanda, Daniele wayenda kwe tisari tia mutinu, mpe watâ: ‘Ka luhondandi na kani muntu wumosi wa ndwenga. Ndendi bangula ndozi ya mutinu.’ Tisari tio tianata Daniele kwe Nebukadenezare. Daniele watâ kwe mutinu: ‘Nzambi ku songele misamu mikwiza ku matu. Yi ni ndozi’aku: Tifwiti tia zangama wamweni tiabêle na mutu wa ore, ntulu’andi na moko mandi mu arza biabêle, moyo’andi na mabunda mu kwivre, mitanga miandi mu tisengo mia bêle, mboko malu mu tisengo ti bavukasa na tibuma. Ha manima, tari diadûkiri ku mongo wumosi, dia kosakase malu ma tifwiti tio. Tifwiti tiango tiamwangane mpe titembo tianeti mfumfula zandi. Tari diango diayizi bâ mongo wa zangama, mpe mongo wango wafulusi mutoto wawansoni.’

Ha manima, Daniele watâ: ‘Yi ni mbangululu ya ndozi’aku: Timfumu tia nge ni mutu wa ore. Ntulu na moko ma arza ni timfumu tilanda ha manima ma nge. Timfumu tilanda ha manima mbo tibâ ntiana kwivre, mpe mbo tiyâla mutoto wawansoni. Ha manima mandi, timfumu tiakaka tilanda; mbo tibâ ngolo ntiana tisengo. Mboko hana manima, mbo ku kwizi bâ timfumu tia kabana, lweka lumosi lwa ngolo ntiana tisengo, mboko lweka lwakaka lwa peta ntiana tibuma. Tari diayizi bâ mongo wa zangama ni Timfumu tia Nzambi. Timfumu tio mbo tikosakasa bimfumu biabiansoni mpe mbo tizingila mankululu.’

Nebukadenezare wakondama ha mutoto, ha matu ma Daniele. Yandi watâ: ‘Nzambi’aku yikuzabikisi ndozi yo. Ka kwena Nzambi ko ntiana Yandi.’ Kani kahonda Daniele, Nebukadenezare wamusola mu bâ mfumu ya bantu ba ndwenga na mfumu ya tizunga tia Babilone. Ngano mweni bwe Yehova kahanina mvutu mu lusambulu lwa Daniele?