Timfumu tie ntiana muti wa wunene

Mpimpa yimosi, Nebukadenezare waloto ndozi yamutâ bunkuta. Yandi watâ mbila bantu bandi ba ndwenga ngatu bamutêla bwe yeri zolo tâka. Kâ kani wumosi walenda mu bangula ndozi yo. Ha manima, mutinu wazonza kwe Daniele.

Nebukadenezare watâ kwe Daniele: ‘Mu ndozi’ani, muti mweniki. Muti wango wutomono kulaka, mpe wutûririki tii ku zulu. Ha mutoto wawansoni wuta monekaka. Makaya ma mbote ma bêleke nandi na mbutu zazingi. Bibulu biabiansoni mu mpeho’andi bita huminaka, mpe nuni mu bintala biandi zita yirikilaka mazanza. Ha manima mbazi yikokeleke ku zulu. Yandi têleke mu ngolo: “Bwiseno muti, zengeno bintala biandi. Kâ bîkeno tisinza tiandi na midza miandi mu mutoto, mpe zingeno wo misinga mia bisengo na mia kwivre. Mutima wa muti wo mbo wukwizi bâ mutima wa tibulu, ka wuvutu’â bâ mutima wa muntu ko; mpe ntangu 7 zimuyôkela. Makanda mamansoni mbo mazaba ti Nzambi ni Mfumu Yatomo Zangama, mpe lendi hana timfumu kwe wo wu kazololo.”’

Yehova wasongela kwe Daniele bwe ndozi yeri zolo tâka. Daniele bu kabakula ndozi yo, bunkuta bwamubaka. Yandi watâ: ‘Ô mutinu, nzololo ti ndozi yo yatarila mbeni zaku, kâ ni nge yita tarila. Muti wa wunene wu bazengeleke ni nge. Nge mbo hombesa timfumu tiaku, mpe mbo dia matiti ku musitu ntiana tibulu tia sangi. Kâ mu bungu ti mbazi yitêleke ti babîka tisinza na midza miandi, mbo vutu bâ mutinu.’

Mvula yimosi ha manima, Nebukadenezare ha zulu nzo’andi ya timfumu keri kwe yende, bu keri kwe sîki bumpala bwa Babilone. Yandi watâ: ‘Taleno hata di dia toma di natungiri. Diangana, meno wa nzitukulu ndiena!’ Bu keri zonzaka, zu diatûka ku zulu diamutêla: ‘Nebukadenezare! Bwawu bu hombese timfumu tiaku.’

Buna, Nebukadenezare wayizi bâ tilawuki, mpe wayizi bâ ntiana tibulu tia sangi. Yandi wakatuka ku nzo’andi ya timfumu mpe waye bâ na bibulu bia ku sangi. Nsuki za Nebukadenezare zakula ntiana nsala za mbemba, mpe nzala zandi zayizi bâ ntiana nzala za nuni.

Ha manima ma mvula za 7, Nebukadenezare wawasa, mpe Yehova wamusa mutinu wa Babilone. Buna Nebukadenezare watâ: ‘Nkembele Yehova, Nzambi ya ku mazulu. Bwawu bu nzebi ti Yehova ni Mfumu. Bantu bê na lulendo kabetolaka, mpe lendi hana timfumu kwe wo wu kazololo.’