Bawu ka bakondama ko

Nebukadenezare bu kaloto ndozi ya tifwiti, ntangu fioti ha manima, wayirika tifwiti tia zangama tia ore. Yandi watûla tio ku tibiti tia Dura mpe watâ mbila bantu babansoni ba mfunu ba nsi’andi, ha kati diawu Shadrake, Meshake na Abednego, mu vukana ha matu mandi. Mutinu watâ: ‘Buna kwa bu luwâ lwaza lwa mpungi, lwa harpe na lwa bisalulu biakaka bia mizike, lufweti kondama ha tifwiti tio! Wô lembo kondama, mbo bamulosa ku fure ya tiya.’ Ngano Bahebre bo ba batatu mbo baketi kondama ha tifwiti, peleko Yehova kwa baketi sambila?

Mutinu walomba basika mizike. Bantu babansoni bakondama, mpe basambila tifwiti tiango. Kâ Shadrake, Meshake na Abednego ka bakondama ko. Bantu babamona batâ kwe mutinu: ‘Bahebre bâ ba batatu bakariri mu sambila tifwiti.’ Nebukadenezare walomba ti babanata, mpe wabatêla: ‘Bweso bwakaka niluhana mu sambila tifwiti tio. Tala ti ka lusiri’â bo ko, mbo nilulosa mu fure ya tiya. Ka kwena nzambi ko yilendi lu vûkisa ha moko mani.’ Bawu bavutula: ‘Ka twena na nsatu ko watuhana bweso bwakaka. Nzambi’eto yilendi tu vûkisa. Kâ ni bu sa ti ka siri’â bo ko, Ô mutinu, ka tusambila tifwiti tio ko.’

Nebukadenezare watomo baka nkesi. Yandi watâ kwe bantu bandi: ‘Yikeno tiya twa fure ngolo mbala 7!’ Ha manima, yandi walomba kwe binwani biandi: ‘Kangeno bantu bo misinga mpe ba loseno mu kati!’ Fure tiya twingi kwa yabâ, binwani bu biapusana penepene, biafwa mbala mosi. Bahebre ba batatu babwa ku tiya. Kâ Nebukadenezare bu katala mu kati dia fure, wamona ti bantu bayà babâ mô beri kwe yende ha kati dia tiya, kani babâ batatu. Nebukadenezare wabaka bunkuta, mpe wayula kwe bisari biandi: ‘Ngano ka tulosele’â bantu batatu ko ku tiya? Bantu bayà nita mona, mpe wumosi ha kati diawu ntiana mbazi kena!’

Nebukadenezare wapusana penepene na fure mpe watâ mu ngolo: ‘Dûkeno, bisari bia Nzambi Yatomo Zangama!’ Bantu babansoni bayituku mu mona Shadrake, Meshake na Abednego balembo ya bu badûka mu fure. Mukanda wa nitu’awu, nsuki zawu na binkuti biawu ka biaya ko, mpe ka babâ na nsunga ya tiya ko.

Nebukadenezare watâ: ‘Nzambi ya Shadrake, Meshake na Abednego ya zangama yena. Yandi tambikiri mbazi mpe yibavûkisi. Ka kwena nzambi ko ntiana ya bawu.’

Ntiana Bahebre bo ba batatu, ngano wa kubama wena mu tatamana mu bâ wa kwikama kwe Yehova mu musamu ni musamu?