Bibaka bia ku Yerusaleme

Mu ntangu ya Ezdrase, Nehemi, tisari tia mutinu Artazersese, mwana Israele wabâ, weri bâka ku Suze, hata dimosi dia Baperse. Mpangi ya Nehemi ku Yuda yatûka na nsangu za mbi: ‘Bantu bakêri ku Yerusaleme ka bêna mu tidzunu ko. Bibaka na mielo bia mwangasa Bisi-Babilone ka beka’eti vutu bia tunga ko.’ Nehemi wafwema. Yandi wadinga mu kwenda ku Yerusaleme mu hana lubakusu. Buna Nehemi wasambila ngatu mutinu wamuhana nzila.

Ha manima, mutinu wamona ti Nehemi mu tiari kabâ. Yandi watâ: ‘Ka ndieka’eti ku mona mu tiari ko. Ngano nti kwa?’ Nehemi watâ: ‘Bwe nilembo bêla mu tiari, hata diani, Yerusaleme, bu die dia mwangana?’ Mutinu wayula: ‘Nti ndendi sa mu bungu dia nge?’ Hô nkatika bendo, Nehemi wasambila ku nsi’a mutima. Buna yandi watâ: ‘Mulemvo’aku, kungana nzila ndienda ku Yerusaleme mu vutu tunga bibaka.’ Mutinu Artazersese watâ kwe Nehemi ti lenda dia bâ nandi dia kwenda, mpe wadinga mu bâ na lukwikulu ti nzietolo mbo yaketi yôkela mu mpila ya mbote. Mutinu wamusola mpe mu bâ guvernere ya tizunga tia Yuda, mpe wamuhana mabaya mu yirika mielo mia Yerusaleme.

Nehemi bu katûla ku Yerusaleme, wataluzula bibaka. Ha manima, yandi wakutakasa mfumu na nganga-nzambi, mpe wabatêla: ‘Musamu wa mpasi wena. Tufweti batika tisalu.’ Bantu batambula, mpe babatika mu vutu tunga bibaka.

Kâ, mbeni zakaka za Bayuda zabasehesela mpe batâ: ‘Mubaku (renard) wulendi bwisa tibaka ti luta tunga.’ Bisari ka biakipa mitsotso mio ko, mpe batatamana mu tunga. Tibaka tiayizi bâ tia nkatika tia tila mpe tia ngolo.

Mbeni zayiza mu mpila zazansoni mu nwanisa Yerusaleme. Bayuda bu bawâ misamu mieri kubikaka mbeni zawu, bayizi bâ na bunkuta. Kâ Nehemi watâ: ‘Ka lubândi na bunkuta. Yehova na beto kena.’ Yandi watûla minkengi ha mielo mu kengerela bantu beri salaka, mpe mbeni zalembana mu ba nwanisa.

Mu bilumbu 52 kwa, ntungulu ya bibaka na mielo yamanisa. Nehemi wanata Balevite babansoni ku Yerusaleme mu kembela nsuka ya ntungulu. Yandi wakubika bitangi bia mikunga mu bikunku biole. Ha zulu tibaka, ni beri yôkasanaka mu zungana hata. Mpungi beri sikaka, sembale na harpe, mpe mikunga beri tangaka mu bungu dia Yehova. Ezdrase wayiza na tikunku timosi tia bantu, mpe Nehemi wayiza na tikunku tiakaka, tii bu babwabana ku Tempelo. Bantu babansoni—bakento, babakala na bala ba fioti—bahana mikayulu kwe Yehova mpe bakembela malaki. Bantu lenda dia bâ nawu dia wâ lwaza lwawu lwa nsayi ha titini tia nkatika mala.