Paulo bamutambikiri ku Rome

Nzietolo ya ntatu ya Paulo mu tisalu tia samuna ku Yerusaleme yamanisina. Kûna, yandi bamukanga mpe bamutûla ku boloko. Mu timona-meso timosi mu mpimpa, Yezu wamutêla: ‘Mbo kwenda ku Rome mpe mbo samuna kûna.’ Paulo bamunata tûka ku Yerusaleme tii ku Sezare, ku kayôkesela mvula zole ku boloko. Bu bamufundisa ha meso ma guvernere Festuse, Paulo watâ: ‘Nzololo ti Sezare kakumfundisa ku Rome.’ Festuse watâ: “Mu bungu ti lombele ti Sezare kakufundisa, kwe Sezare kwenda.” Paulo bamutûla mu bato mu kwenda ku Rome, mpe mpangi zole zeri Bakristo zabâ na yandi, Like na Aristarke.

Mu mubu, titembo tia ngolo tiatulumuka, mpe tiasa bilumbu biabingi. Bantu babansoni babanza ti mbo baketi fwa. Kâ Paulo watâ: ‘Mbazi yimosi yakuntêlele mu ndozi: “Kubândi na bunkuta, Paulo. Mbo tûla ku Rome, mpe bô babansoni babâ na nge ka kwena tima ko ti batûrila.” Bêno na butindi! Ka tufwa ko.’

Titembo tiapupa bilumbu 14. Ha manima, bawu bamona mutoto. Tisanga (Île) tia Malte tiabâ. Bato yadiama, mpe yaburika; kâ bantu 276 babâ mu kati balenda mu tûla ha mutoto. Bakaka balenda mu tsaba mu mamba, bakaka basimbirila bibuku bia bato bieri kwe yangame mu mamba tii ku simu. Bisi-Malte babakipa, mpe babayirikila tiya ngatu bayetela.

Ngonda zitatu ha manima, binwani bianata Paulo ku Rome mu bato yakaka. Paulo bu katûla ku Rome, bampangi bayizi mu bwana. Bu kamona bampangi, Paulo watonda Yehova, mpe wabaka butindi. Ni bu sa ti Paulo ku boloko kabâ, bamuhana nzila ya bâ mu nzo yi beri futilaka mpe tinwani tieri mu kêlaka. Mvula zole kayôkesa mu nzo yo. Bantu yandi beri kwizi talaka; Timfumu tia Nzambi keri ba samuninaka, mpe Yezu keri ba zonzelaka. Paulo watsoneka mpe mikanda mu bungu dia bimvuka bia tizunga tia Azi na tia Yude. Diangana, Yehova watomo sarila Paulo mu mwangasa nsangu za mbote mu makanda.