TIMOKO 34
Bwe tulendi songela luzolo lweto mu Yehova?
Ngano wayika tomo zoloko Nzambi tûka bu wabatika mu longoka Bibila? Ngano zololo watatamana mu kurisa tindiku tiaku na Yandi? Tala ti ni bo wena, Yehova bu kamona luzolo lwaku mu Yandi luta kwe kuri, Yandi mpe mbo katomo ku zolo mpe mbo katomo ku kipa. Bwe lendi mu songela ti Yandi zololo?
1. Bwe tulendi songela kwe Yehova ti Yandi tuzololo?
Luzolo lweto tusongelaka mu Yehova bu tumutumamanaka. (Tanga 1 Za 5:3.) Yehova ka tumaka muntu mu ngolo ko mu mu tumamana. Kâ, beto bansoni kahanaka bweso bwa sola tala ti Yandi tutumamana peleko kâni. Mu bungu dia nti? Yehova zololo ti ‘tatumamaka mu mutima wumosi.’ (Bisi-Rome 6:17, NWT) Wuzololo tâ, Yandi zololo ti tamutumamanaka mu bungu ti Yandi tuzololo. Misamu mia mu lweka 3 na 4 mu buku di, bayizi mia tsoneka mu ku bakisa mu songela luzolo lwaku mu Yehova bu kwe yiriki misamu mimutâka nsayi, mpe bu kwe dioke misamu mimufwemesaka.
2. Mu bungu dia nti wulendi bâ mpasi mu songela luzolo lweto mu Yehova?
“Mpasi za muntu wa sungama zazingi zena.” (Mikunga 34:19) Nitu’eto ya masumu tutelamanaka. Tulendi bwabana mpe na mbaya, titantu na nkwamusu zakaka. Bu tubwabanaka na mpasi, wulendi bâ musamu wa mpasi mu yirika misamu mi tu lombaka Yehova. Mu bungu ti ka wubâka mpasi ko mu lembo yirika misamu mi lombaka Yehova. Bu yirika misamu mi ku lomba Yehova na kwikama kwakwansoni, mbo songela ti Yandi zololo yôka bima biakaka. Mpe mbo songela ti wa kwikama wena kwe Yandi. Ha manima, Yandi mbo kabâ wa kwikama kwe nge. Kani kabwe, kakuyambirika ko.—Tanga Mikunga 4:3.
YIKA NDILU
Longoka bwe lendi têla Yehova nsayi bu mu tumamana, mpe nti bilendi ku bakisa mu tatamana mu bâ wa kwikama kwe Yandi.
3. Musamu wuta ku tarila
Mu mukanda wa Yobe, mbo tumonaka nti Satana wakwikisila Yobe na bantu babansoni basarilaka Yehova. Tangeno Yobe 1:1, 6–2:10, mpe zonzeleno biyuvu ebi:
Mu mabanza ma Satana, mu bungu dia nti Yobe keri tumamaka kwe Yehova?—Tala Yobe 1:9-11.
Bwe Satana kabanzaka mu bungu dia bantu babansoni, na nge mpe?—Tala Yobe 2:4.
Tangeno Yobe 27:5b, mpe zonzeleno tiyuvu eti:
Bwe Yobe kasongela ti Yehova keri tomo zoloko?
Yobe wasongela luzolo lwandi mu Yehova bu katatamana mu bâ wa kwikama
Luzolo lweto tusongelaka mu Yehova bu tutatamanaka mu bâ ba kwikama kwe Yandi
4. Yangirika mutima wa Yehova
Tangeno Bingana 27:11, mpe zonzeleno biyuvu ebi:
Bwe Yehova kamonaka bu sarilaka ndwenga na bu mu tumamanaka? Mu bungu dia nti?
5. Lendi bâ wa kwikama kwe Yehova
Luzolo lweto mu Yehova mbo lututumaka mu mu zonzela kwe bantu bakaka. Kwikama kweto mu Yandi mbo kututumaka mu sarila bo, ni bu sa ti musamu wa mpasi wena. Taleno VIDEO, mpe zonzeleno biyuvu bita landa.
Ngano musamu wa mpasi wubâka kwe nge mu zonzela Yehova kwe bantu bakaka?
Mu video, nti biabakisa Grayson mu telamana bunkuta bwandi?
Ka wubâka musamu wa mpasi ko mu bâ ba kwikama kwe Yehova bu tuzoloko misamu mi kazoloko mpe bu tuyinaka misamu mi kayinaka. Tangeno Mikunga 97:10, mpe zonzeleno biyuvu ebi:
Mu misamu mi walongokele, ntia bima Yehova kazoloko? Ntia bima kayinaka?
Bwe lendi longokela mu zolo misamu mia mbote na mu yina mia mbi?
6. Ndandu tubakaka bu tutumamaka kwe Yehova
Tumama kwe Yehova musamu wena wuyôkele bubote. Tangeno Izaya 48:17, 18, mpe zonzeleno biyuvu ebi:
Ngano tulendi kwikila ti, ntangu zazansoni Yehova mbo kazabaka mio miyôkele bubote mu bungu dia beto? Mu bungu dia nti?
Ndongokolo’aku ya Bibila na ya Yehova, Nzambi ya matielaka, ntia ndandu yakunatinini?
TALA TI BAKUTÊLELE: “Nsalulu zani ka zena mfumu ko kwe Nzambi.”
Ntia verse lendi sarila mu songela ti nsalulu zeto zilendi yangirika Yehova peleko kâni?
MU BUKUFI
Luzolo lwaku songelaka mu Yehova bu mu tumamanaka na bu tatamanaka mu bâ wa kwikama kwe Yandi ni bu sa ti musamu wa mpasi wubâka.
Biyuvu bia mbambukulu
Nti longokele mu tifwani tia Yobe?
Bwe kwizi songela luzolo lwaku mu Yehova?
Nti bikubakisa mu tatamana mu bâ wa kwikama kwe Yehova?
ZABA BIAKAKA
Dzukula bwe lendi bêla wa kwikama kwe Yehova na mu timvuka.
Longoka misamu mia kwikisila Satana kwe bantu.
“Yobe tatamane mu bâ wa kwikama” (La Bible: Quel est son message? lweka 6)
Longoka bwe bantwenia mpe balendi songela luzolo lwawu mu Yehova.
Bwe ntwenia yita bwabana na nkwamusu za ntwenia zakaka yilendi tatamana mu bâ ya kwikama kwe Nzambi?