Bwe timvuka tilandilaka mabanza ma Yehova mu bankwa masumu

1. Yehova nti kazoloko mu bungu dia bantu babansoni?

YEHOVA wayirika bantu na timpwanza tia sola. Kabu ni dio sarilaka bu bongaka nzengolo. Nzengolo yiyôkele mfunu yi lendi bonga muntu ni mu tihana kwe Yehova na mu bâ mu kanda dia bisari biandi. Yehova zololo ti muna muntu wabonga nzengolo yo. Mu bungu dia nti? Mu bungu ti bantu kazoloko, mpe zololo misamu miyôkele bubote mu bungu dia bawu. Yandi zololo ti bawu babâ ndiku zandi mpe bazinga mankululu.—Lub. 30:​19, 20; Nga. 6:​7, 8.

2. Yehova nti kazoloko mu bungu dia bô beka lembo soba mabanza? (1 Za 2:1)

² Kâ, Yehova ka tumaka muntu mu ngolo ko mu mu sarila. Yandi muna muntu kabikaka mu sola misamu mi kayirika. Nti bilendi tûla tala ti Mukristo wa batusu wuyirikiri masumu ma manene? Tala ti ka sobele’â mabanza ko bafweti mu katula mu timvuka. (1 Kor. 5:13) Ntono musamu wo, Yehova tivuvu titomo bâka nandi ti muntu wuyirikiri masumu mbo wukâla kwe Yandi. Diangana, wo ni musamu wumosi wa mfunu wasa ti Yehova kahana nkûlulu—lemvokela masumu ma bantu basobaka mabanza. (Tanga 1 Za 2:1.) Yehova mu luzolo lwandi, bantu bayirika masumu ma manene kalemberelaka mu soba mabanza.—Zka. 1:3; Rom. 2:4; Zaki 4:8.

3. Nti tuzonzela mu timoko ti?

³ Yehova beto katêlaka mabanza mandi mu bungu dia masumu na mu bungu dia bantu bayirikaka masumu ma manene. Mpe, Yandi zololo tabâ na mabanza mandi mu musamu wo. Timoko ti mbo tizonzela mpila yi tulendi bwa sila. Bu kwe tangi timoko ti, dinga 1) bwe bayirikila musamu wa masumu ma manene mu timvuka tia Korente mu mbandu ya ntete, 2) ntia lutwalusu ntumwa Paulo kahana, muntu wayirika masumu ma manene bu wasoba mabanza, mpe 3) tinsamu tio nti tita tu longesa mu mpila Yehova yi kabongelaka bantu bayirikaka masumu ma manene.

MPILA YI BAYIRIRIKILA MUSAMU WA MASUMU MA MANENE MU MBANDU YA NTETE

4. Mu mbandu ya ntete, ntia musamu wayôka mu timvuka tia Korente? (1 Bisi-Korente 5:​1, 2)

⁴ Tanga 1 Bisi-Korente 5:​1, 2. Mu nzietolo’andi ya ntatu ya tisalu tia misionere, Paulo wayizi wâ nsangu za mbi zeri tarilaka timvuka tia môna tia ku Korente. Mpangi yimosi ya bakala yeri vukasaka nitu na mukento wa tata’andi. Ndiatulu yo yatomo fwemesa bantu, mpe “ka beri’â ya monaka ko kwe bantu ba makanda”! Bantu mu timvuka batambula ndiatulu yo, kâ mpe nsayi yabâ nawu mu bungu dia musamu wo. Kampe bakaka beri banzaka ti musamu wo wasongela ti Nzambi ndemvokolo yayingi ye nandi, mpe bantu bayirikaka masumu ma manene katomo bakulaka. Kâ Yehova ka tambulaka nsalulu za mbi ko mu kanda diandi. Ndiatulu yo yatomo fwemesa bantu beri lembo sarilaka Yehova, mpe yabatuma mu zonzela timvuka mu mpila ya mbi. Muntu wo bu waketi tatamana mu bâ mu timvuka, bantu bakaka mpe mbo baketi landa ndiatulu’andi. Dieka bo, nti Paulo kalomba kwe timvuka mu sa?

5. Nti Paulo kalomba kwe timvuka tia Korente mu sa, mpe bwe keri zolo tâka? (1 Bisi-Korente 5:13) (Tala mpe tifwani.)

⁵ Tanga 1 Bisi-Korente 5:13. Mu lutumu lwa mpeve santu, Paulo watsoneka mukanda wu kalombela ti muntu wo wayirika masumu ma manene mpe walembo soba mabanza bafweti mu katula mu timvuka. Ngano Bakristo ba kwikama bwe baketi mu bongela? Paulo wabalomba mu bika mu sa tindiku na yandi. Bwe weri zolo tâka? Paulo wabangula ti ntumunu yo yazolo tâ ti ‘ka badiandi na muntu wa mpila yo.’ (1 Kor. 5:11) Zakala mu dia na muntu kulendi sa ti tabâ nkatika ndiku na yandi. Diangana, Paulo wasongela ti bantu mu timvuka ka bafweti’â sa tindiku na muntu wo ko. Musamu wo mbo waketi kengerela timvuka mu nsalulu yo mbi. (1 Kor. 5:​5-7) Mpe, bu baketi bika mu sa tindiku na muntu wo, mbo waketi mu tuma mu tomo bakula ti yandi watomo hengama na Yehova, mpe mbo kaketi bâ na nsoni zaketi mu tuma mu soba mabanza.

6. Ntia nsobolo mukanda wa Paulo wanata mu timvuka na kwe muntu wayirika masumu?

⁶ Bu kamana tambika mukanda’andi kwe Bakristo ba ku Korente, Paulo wabatika mu tiyula bwe bantu mu timvuka baketi wa bongela. Ha manima, Tite wanata nsangu zamutâ nsayi. Timvuka tiabongela mukanda wa Paulo mu mpila ya mbote (2 Kor. 7:​6, 7) Bawu balanda lutwalusu lwa Paulo. Mpe mu ngonda zalanda, ha manima ma mukanda wa Paulo, muntu wo wayirika masumu wayizi soba mabanza mu bungu dia ndiatulu’andi ya masumu! Yandi wasoba ndiatulu na mbanzulu zandi, mpe wabatika mu landa mitieno mia sungama mia Yehova. (2 Kor. 7:​8-11) Buna, Paulo nti kaketi lomba kwe timvuka mu sa?

BWE TIMVUKA TIERI BONGELAKA NKWA MASUMU YASOBA MABANZA

7. Muntu wayirika masumu ma manene nti kasa bu bamana mu katula mu timvuka? (2 Bisi-Korente 2:​5-8)

⁷ Tanga 2 Bisi-Korente 2:​5-8. Paulo watâ ti “nsembolo ya hana bantu babingi yafwana mu bungu dia muntu wo.” Wuzololo tâ ti nsembolo yayizi lungana mu bungu dia yandi. Ngano bwe? Nsembolo yamutuma mu soba.—Ebr. 12:11.

8. Paulo nti kavutu lomba kwe timvuka mu sa?

⁸ Diangana, Paulo watâ kwe timvuka: “Lufweti lemvokela mpe lufweti bomba” mpangi yahumuka, mpe “mu songeleno luzolo.” Paulo wazolo ti bantu mu timvuka ka batambulandi kwa ti kakâla mu kanda dia Yehova. Paulo wazolo ti bawu basongela kwe muntu wasoba mabanza, mu nsalulu zawu na mu nzonzolo’awu, ti yandi batomo lemvokela mpe yandi batomo zolo. Buna mbo baketi tomo songela ti bawu batambula ti kakâla mu timvuka.

9. Mu bungu dia nti waketi bêla musamu wa mpasi kwe bantu bakaka mu lemvokela nkwa masumu yasoba mabanza?

⁹ Ngano bantu bayizi kekama mu bwana nkwa masumu yo yasoba mabanza mu timvuka? Tinsamu ka titâka wo ko; kâ kampe. Nsalulu zandi zatulumuna misamu mu timvuka, kampe na kwe bantu bakaka. Kampe bantu bakaka bayizi banza ti ka wadelakana ko mu tomo bwana muntu wo mu timvuka, mu bungu ti ni bawu bayizi sarila ngolo mu bâ ba verela. (Tala Like 15:​28-30.) Mu bungu dia nti wabêla mfunu ti timvuka tiasongela nkatika luzolo kwe mpangi yo yakâla mu timvuka?

10-11. Nti biaketi tûla tala ti bakuluntu bakala mu lemvokela nkwa masumu yo yasoba mabanza?

¹⁰ Banza’eti misamu miaketi tûla, tala ti bakuluntu ka batambula ko ti muntu wo wasoba mabanza wakâla mu timvuka; peleko tala ti bu kakâla mu timvuka, bantu bakala mu mu songela luzolo. Yandi mbo kaketi kota mu “bunsana bwa yôka.” Kampe mbo kaketi mona ti ka keti’â vutu kâla mu timvuka ko. Yandi mbo kaketi bika ngolo zi keri sarilaka mu kârisa tindiku tiandi na Nzambi.

¹¹ Tala ti bakuluntu bakala mu lemvokela nkwa masumu yo yasoba mabanza, mbo baketi bebesa tindiku tia bawu beni na Yehova. Mu bungu dia nti? Mu bungu ti ka baketi’â monekesa ndemvokolo ya Yehova ko, kâ mbo baketi songela mutima ngolo wa Satana. Diangana, mbo baketi bâ bisalulu bia Diabulu bi kaketi sarila mu fukisa muntu wo mu timpeve.—2 Kor. 2:​10, 11; Efz. 4:27.

12. Bwe timvuka tiaketi landila tifwani tia Yehova?

¹² Bwe timvuka tia Korente tiaketi landila tifwani tia Yehova mpe tiaketi lembo landila tifwani tia Satana? Bu baketi landa mpila Yehova yi kabongelaka nkwa masumu yisobele mabanza. Tala misamu mia tâ bitsoniki biakaka bia Bibila mu bungu dia Yehova. Davide watâ ti Yandi “wa mbote wena, mpe zololo mu lemvokela.” (Mik. 86:5) Mika watsoneka: “Nani we Nzambi ntiana Nge, lemvokelaka makuba mpe zibikaka masumu?” (Mika 7:18) Mpe Izaya watâ: “Bika nkwa mbi kabika nzila zandi, mpe muntu wa mbi kabika mabanza mandi; bika kakâla kwe Yehova, Yandi mu fwila tiari, kwe Nzambi ya beto, mu bungu ti mbo katomo lemvokela.”—Iza. 55:7.

13. Mu bungu dia nti wabâ wa delakana ti bakârisa nkwa masumu yo yasoba mabanza mu timvuka? (Tala kaku tia “Ntia ntangu bakârisa muntu wa ku Korente mu timvuka?”)

¹³ Mu landa tifwani tia Yehova, bantu mu timvuka tia Korente batomo bwana muntu wo wasoba mabanza, mpe batomo mu songela luzolo. Bu balanda lutwalusu lwa Paulo lwa bwana muntu wo wasoba mabanza, bantu mu timvuka basongela “lutumamanu mu misamu miamiansoni.” (2 Kor. 2:9) Diangana, ngonda fioti kwa zayôka tûka ti bamukaturila mu timvuka, kâ nsembolo yamutuma mu tomo soba mabanza. Buna ka wabâ salu ko mu kêla ntangu yayingi ngatu bamukârisa mu timvuka.

LANDA BUDEREDE NA NDEMVOKOLO YA YEHOVA

14-15. Ntia malongi tuta baka mu mpila yi bayirikila musamu watulumuka ku Korente mu ntama? (2 Piere 3:9) (Tala mpe tifwani.)

¹⁴ Tinsamu tia mpila yi bayirikila musamu ku Korente mu ntama, bayizi tia tsoneka mu Bibila mpe bayizi tia lunda “mu tu longesa.” (Rom. 15:4) Tinsamu tio beto tilongesaka ti Yehova ka tambulaka nsalulu za mbi ko mu kanda diandi. Yandi ka tambulaka ko ti nkwa masumu yilembo sobaka mabanza yatatamana mu bâ mu timvuka, tintwari na bisari biandi bia kwikama. Yehova ndemvokolo ye nandi, kâ ka tambulaka vwandi ko; mitieno miandi ka misobaka ko. (Yude 4) Yehova kamana bika bankwa masumu mu timvuka, ka yibâ ndemvokolo ko mu bungu ti timvuka mbo titomo mona mpasi.—Bin. 13:20; 1 Kor. 15:33.

¹⁵ Kâ, tulongokele ti Yehova ka zololo’â ko ti kani muntu wumosi wafuka. Yandi zololo ti muna muntu wavuka, tala ti wufwanane. Yehova ndemvokolo kasongelaka kwe bantu basobaka mabanza mpe bazololo mu kârisa tindiku na Yandi. (Ezk. 33:11; tanga 2 Piere 3:9.) Buna, muntu wo wa ku Korente bu wasoba mabanza, mpe bu kabika nsalulu zandi za masumu, Yehova wasarila Paulo mu songela kwe timvuka ti bafweti mu lemvokela, mpe bafweti vutu mu bwana.

16. Ntia mabanza me naku mu bungu dia Yehova bu longokele mpila yi bayirikila musamu watulumuka ku Korente?

¹⁶ Tifwani tia mu timvuka tia Korente ya ntama titusongele ti Yehova luzolo lwe nandi, buderede na bunsungu. (Mik. 33:5) Ngano musamu wo ka wuta ku tuma ko mu tomo kembela Nzambi’eto? Diangana, bankwa masumu twena, mpe mulemvo’andi we neto nsatu. Buna muna muntu mu beto fweti tondaka mu bungu dia nkûlulu yisaka ti tabaka mulemvo wa masumu meto. Nkatika lutindusu lwena mu zaba ti Yehova tomono zolo kanda diandi mpe misamu miyôkele bubote kazoloko mu bungu dia bawu!

17. Nti bazonzela mu timoko tita landa?

¹⁷ Bwe bayirikilaka misamu mitariri nsalulu za mbi lumbu ti? Bwe bakuluntu mu timvuka balendi landila nsatu ye na Yehova ya nata muntu wuyirikaka masumu mu soba mabanza? Bwe timvuka tifweti sa bakuluntu bu babongaka nzengolo ya katula muntu mu timvuka peleko mu mu kârisa mu timvuka? Biyuvu bio mbo bazonzela bio mu timoko tita landa.