Landa mpila ya banzila ya Yehova na ya Yezu

1-2. Luzolo mu Yehova bwe luta zolo tâ, mpe bwe Yezu kasongela lo?

YEZU wabangula ntia ntumunu yitomono yôka mfunu mu ntumunu za Nzambi bu katâ: ‘Zolo Yehova Nzambi’aku mu mutima’aku wa mukaka, mu tilundi tiaku tia mukaka, mu ngolo zaku zazansoni, mu mbanzulu zaku zazansoni.’ (Like 10:27) Ntiangu tuzololo Yehova mu bio biabiansoni bie neto na mu mpila’eto ya bêla. Luzolo lweto mu Yandi mbo lutarilaka nsatu zeto, mpila’eto ya yirikila misamu na ngolo zeto. Mbo lutarilaka mpe mpila’eto ya banzila. Wa matieleka, ka tulendi’â tatomo bakula mbanzulu za Yehova ko mu mpila ya lunga. Kâ tulendi tomo bakula mbanzulu za Nzambi bu tulongoka ‘mbanzulu za Kristo,’ mu bungu ti Yezu wasongela mbanzulu za Tata’andi mu mpila ya lunga.—1 Kor. 2:16.

² Yezu wazolo Yehova mu mbanzulu zandi zazansoni. Yezu mio mieri mu lombaka Nzambi mu yirika mia kazaba, mpe wabonga nzengolo mu yirika mio ni bu sa ti mpasi kaketi mona. Mu bungu ti watûla mabanza mandi mamansoni mu ndungananu ya luzolo lwa Tata’andi, Yezu ka bika na kani tima ko tiamukabakasa mu lungisa kani dio.

3. Ntumwa Piere nti kalongoka mu Yezu, mpe ntia musamu katindisa Bakristo bakaka mu yirika? (1 Piere 4:1)

³ Piere na ntumwa zakaka babwa bweso bwa nzitukulu bwa yôkesa ntangu na Yezu mpe bwa longoka bwe keri banzilaka. Piere bu katsoneka mukanda’andi wa ntete mu lubakusa lwa mpeve santu ya Nzambi, watindisa Bakristo mu bâ na mbanzulu zimosi na Yezu Kristo. (Tanga 1 Piere 4:1.) Mu zu di kasarila mu tsoneka mukanda’andi ha mbatukulu, Piere watsoneka: ‘Kubameno.’ Wasarila ntêlo yizonzelaka binwani bita kubama na binwanu biawu mu bungu dia muzingu. Buna tala ti Bakristo balongokele mu banzila ntiana bweri banzilaka Yezu, mbo babaka bio bie nawu nsatu mu nwana na nza yita twarisa Satana, mpe na nsatu ya yirika mbi.—2 Kor. 10:​3-5; Efz. 6:12.

4. Bwe timoko ti tilendi tu bakisila mu landa malongi ma Piere?

⁴ Mbo tutaluzula mpila ya banzila ya Yezu mpe mbo tumona bwe tulendi landila tifwani tiandi. Mbo tudzukula bwe 1) tulendi landila mpila ya banzila ya Yehova, yitubakisa beto bansoni mu banza ntiana yandi, 2) tulendi bêla ba kuluka, mpe 3) tulendi bêla na mbanzulu za mbote bu tusikamana mu Yehova mu lusambulu.

LANDA MPILA YA BANZILA YA YEHOVA

5. Bwe Piere kalembo landila mbanzulu za Yehova?

⁵ Tabongeno tifwani tia Piere mu ntangu yi kalembo landa mabanza ma Yehova mu misamu miakaka. Yezu watâ kwe ntumwa zandi ti wafweti kwenda ku Yerusaleme, ku baketi mu kangila kwe mfumu za mabundu, mpe ku baketi mu mwisina mpasi na ku baketi mu hondela. (Mat. 16:21) Kampe musamu wa mpasi weri kwe Piere mu tambula ti Yehova kahana nzila ti Yezu muntu wu beri silaka tivuvu ku Israele, mpe weri Masiya wu bakanisina, bamuhonda. (Mat. 16:16) Bu bayenda ha ndeko, Piere watâ kwe Yezu: “Mfumu, kuzonzelandi bo, misamu mio ka mikuturila ko.” (Mat. 16:​22, NWT) Yezu na Piere ka beri’â mbanzulu zimosi ko mu musamu wo mu bungu ti Piere keri’â na mbanzulu za Yehova ko.

6. Mu ntia mpila Yezu kasongela ti mbanzulu zandi zakwelana na mbanzulu za Yehova?

⁶ Mbanzulu za Yezu zakwelana na mbanzulu za Tata’andi die ku zulu. Yezu watâ kwe Piere: ‘Yôka ku manima mani, Satana! Nge nguria kuba diena mu nzila’ani, mu bungu ti mbanzulu zaku ka zena za Nzambi ko, kâ za bantu.’ (Mat. 16:23) Yezu wazaba ti mu sarila luzolo lwa Yehova wafweti mona mpasi mpe wafweti fwa, buna Yezu wakala malongi ma Piere ni bu sa ti kampe Piere lubakusu keri yêlaka mu mu hana. Mu mpila yo Piere wabakula ti wafweti banzila buna bubanzilaka Nzambi. Malongi ma mfunu mena mpe beto ma tufweti longoka.

7. Bwe Piere kayizi songela ti wazolo mu bâ na mbanzulu zimosi na Yehova? (Tala tifwani tia ntete.)

⁷ Ha manima, Piere wasongela ti wazolo mu banzila ntiana bu banzilaka Yehova. Ntangu yafwana ngatu bantu ba makanda mamansoni babâ mu kanda dia Yehova. Nzambi watuma Piere mu kwe samunina Korneye, weri muntu wa ntete mu bantu balembo bâ Bayuda mu bâ Mukristo. Vula-vula Bayuda ka beri’â zolo ko mu bâ tintwari na bantu balembo bâ Bayuda. Buna Piere nsatu yeri nandi ya delakasa mbanzulu zandi ngatu kabâ na lenda dia samuna kwe bantu balembo bâ Bayuda. Piere bu kabakula luzolo lwa Nzambi mu musamu wo, wadelakasa mbanzulu zandi. Ntiangu mu ntangu Korneye yi katumisa Piere, ka kala ko mu kwenda. (Bis. 10:​28, 29) Wasamunina Korneye na kanda diandi, mpe babaka bateme.—Bis. 10:​21-23, 34, 35, 44-48.

8. Bwe tulendi songela ti mbanzulu zeto zidelakane na za Yehova? (1 Piere 3:​8, tala note)

⁸ Ha manima ma mivu, Piere watindisa mpangi zandi zabâ Bakristo mu bâ na mbanzulu zimosi. (Tanga 1 Piere 3:8 mpe tala note.) Tulendi bâ na mbanzulu zimosi na mpangi zeto tala ti tulendi mbanzulu za Yehova zi tulongokaka mu Bibila. Mu tifwani, Yezu watindisa milongoki miandi mu tûla Timfumu ha tibuka tia ntete mu luzingu lwawu. (Mat. 6:33) Na mabanza mo, mpangi yimosi mu timvuka yilendi bonga nzengolo ya bâ mupasuri-nzila peleko ya sarila Yehova mu tisalu tia ntangu zazansoni mu mpila yakaka. Kani tamutindisa mu kipa kwa bubote bwa yandi beni, tufweti mu zonzela mu mpila yitindisaka mu nzengolo ya mbote yi kabongele, mpe tufweti mu bakisa.

BÂ WA KULUKA

9-10. Bwe Yezu kasongela kuluka kwa nzitukulu?

⁹ Mu mpimpa ya mansukina ntete lufwa lwandi, Yezu walongesa kwe Piere na kwe ntumwa zakaka malongi ma mfunu matariri tifu tia kuluka. Yezu watambika Piere na Za mu kwe kubika bima mu bungu dia ndia ya mansukina yi baketi dia na Yezu ntete lufwa lwandi. Kampe mu bima bi bakubika mweri na ndonga ya yinene na serviette ngatu bantu ba batumisa basukula malu ntete badia. Kâ nani waketi bâ wa kuluka mu sukula malu ma bantu bakaka?

¹⁰ Yezu ka kekama ko mu sala tisalu tio, wasongela ti wa nkatika wa kuluka weri. Kampe bantumwa bayizi yituku mu mona Yezu weri salaka tisalu tiafweti sala tisari. Yezu wakatula tinkuti tia zulu, wazinga serviette mu luketo, watûla mamba mu ndonga, mpe wabatika mu ba sukula malu. (Za 13:​4, 5) Kampe ntangu yafwanana mu sukula malu ma bantumwa 12, mu kati na Yuda, waketi mu teka. Kâ, na kuluka kwakwansoni Yezu wasala tisalu tio. Na luvivululu lwalwansoni Yezu wabangula: ‘Musamu wu niluyirikiri wa luzebi? Ebu lukuntâka ti meno ni ‘Mulongi na Mfumu,’ nzonzolo’eno ya mbote yena, ni bo ndiena. Tala ti meno nilusukuri malu, me ndie Mfumu na Mulongi, beno mpe lufweti tisukula malu beno na beno.’—Za 13:​12-14.

11. Bwe Piere kasongela ti walongoka mu bâ wa kuluka? (1 Piere 5:5) (Tala mpe tifwani.)

¹¹ Piere wabaka malongi mu kuluka kwa Yezu. Yezu bu kakâla ku zulu, Piere wasa timangu bu kawasisa bakala dimosi dieri na malu ma fwa tûka mbutukulu’andi. (Bis. 1:​8, 9; 3:​2, 6-8) Bantu babingi bamona timangu tio, bayiza kwe Piere. (Bis. 3:11) Kâ, Piere ka zolo’â ko ti bamusa nsangu, ni bu sa ti mu tikulu ti bamukurisila bantu lwaka lweri nawu mu bâ muntu wa mfunu ha kati diawu. Na kuluka kwakwansoni, Piere wakala bamusa nsangu mpe wahana mukembo kwe Yehova na kwe Yezu bu katâ: ‘Ni mu bungu dia nkumbu ya yandi [Yezu], na timinu tieto mu yandi, ntiangu muntu wo wu luta mona na wu luzebi kabakiri lutindusu.’ (Bis. 3:​12-16) Ntêlo za sarila Piere mu mukanda wumosi wu katsoneka kwe Bakristo zitariri mfunu ya lwata kuluka, zilendi tu bambula mpila Yezu yi kalwatila serviette mu luketo mu sukula malu ma bantumwa.—Tanga 1 Piere 5:5.

12. Ntiana Piere, bwe tulendi tatamana mu lwata tifu tia kuluka?

¹² Tulendi landa tifwani tia Piere bu tutatamana mu longoka mu bâ ba kuluka. Bambuka ti kuluka kwa matieleka ka kusukinaka ko kwa mu bâ na nzonzolo ya mbote. Ntêlo Piere yi kasarila mu bungu dia kuluka yisongele ti kuluka mbo kutarilaka “mpila yi tutibanzilaka na yi tubanzilaka bantu bakaka.” Bisalu tusalaka mu bungu dia bantu bakaka mu bungu ti Yehova na bantu tuzololo, ka wena ko ti tuzololo bantu batusa nsangu. Mbo tusongela ti ba kuluka twena tamana sarila Yehova na mpangi zeto na nsayi yayansoni, ni bu sa ti bantu bakaka ka bata mona mio mi tuta yirika ko.—Mat. 6:​1-4.

BÂ NA ‘MBANZULU ZA MBOTE’

13. Bâ na ‘mbanzulu za mbote’ bwe wuta zolo tâ?

¹³ Bâ na ‘mbanzulu za mbote’ bwe wuta zolo tâ? (1 Pi. 4:7) Mukristo we na mbanzulu za mbote miamiansoni mi kalenda kasaka mu bonga nzengolo za mbote zikwelanaka na mabanza ma Yehova. Mukristo wa mpila yo zebi ti ka kwena tima ko titomono yôka mfunu tindiku tiandi na Yehova mu luzingu lwandi. Mabanza ma delakana me nandi mu yandi beni, zebi ti misamu miamiansoni ka zebi’â mio ko. Mbo kasongelaka ti Yehova kasikirilaka bu kavulu pusanaka kwe yandi mu lusambulu na kuluka kwakwansoni.a

14. Mu bwe Piere kazimbakana mu sikirila Yehova?

¹⁴ Mpimpa ya mansukina ntete lufwa lwandi, Yezu walwengesa milongoki miandi: ‘Mpimpa yi, beno bansoni mbo lumana tâ kuba mu bungu dia meno.’ Na lukwikulu lwalwansoni Piere wavutula: ‘Babansoni ni bamana tâ kwa kuba mu nge, meno kani kabwe ka nitâ kuba ko!’ Mu mpimpa yo Yezu walonga milongoki miandi: ‘Bêno na meso ma tia mpe tatamaneno mu lusambulu.’ (Mat. 26:​31, 33, 41) Tala ti Piere walanda malongi mo, kampe mbo kaketi bâ na butindi bwatâ ti yandi ndiku ya Yezu yeri. Kani kasila bo, Piere wakala Yezu, ha manima watomo nionga.—Mat. 26:​69-75.

15. Bwe Yezu kalundila mbanzulu za mbote mu mpimpa’andi ya mansukina?

¹⁵ Yezu, Yehova keri tomo sikirilaka. Ni bu sa ti wa lunga weri, wasambila mbala zazingi mu mpimpa ntete lufwa lwandi. Musamu wo wamuhana butindi mu yirika misamu Yehova mi kazolo ti yandi kayirika. (Mat. 26:​39, 42, 44; Za 18:​4, 5) Ntembe kâni, kani kabwe Piere ka zimbakana ko ti Yezu wasambila mbala zazingi mu mpimpa ya mansukina yi kayôkesa ha mutoto.

16. Bwe Piere kasongela ti wayizi kurisa lenda dia bâ na mbanzulu za mbote? (1 Piere 4:7)

¹⁶ Ntangu bu yeri kwe yôke, Piere wayizi longoka mu tomo sikirila Yehova mu nzila ya lusambulu. Yezu bu kavumbuka kwe ba fwa wahana lukwikulu kwe Piere na kwe ntumwa zakaka ti mbo baketi baka mpeve santu ngatu balungisa tisalu tiawu tia samuna. Kâ, Yezu wabalomba bakêla ku Yerusaleme tii ntangu yaketi tula musamu wo. (Like 24:49; Bis. 1:​4, 5) Bu beri kwe kêle, ngano Piere nti kasa? Yandi na mpangi zandi ‘batatamana mu lusambulu.’ (Bis. 1:​13, 14) Ha manima, mu mukanda’andi wa ntete watindisa mpangi zandi mu bâ na mbanzulu za mbote, na mu sikirila Yehova mu nzila ya lusambulu. (Tanga 1 Piere 4:7.) Piere wayizi bâ mpangi ya yela, wayizi bâ na mbanzulu za mbote mpe lenda dieri nandi dia bakisa na dia tindisa mpangi zandi.—Nga. 2:9.

17. Ni bu sa ti ka ntia lenda die neto, nti tufweti tatamana mu sa? (Tala mpe tifwani.)

¹⁷ Mu bâ na mbanzulu za mbote tufweti vulu pusanaka kwe Yehova mu lusambulu. Mbo tubakulaka ti tufweti tatamana mu sambila Yehova mu baka lubakusu ni bu sa ti mbo tubanzaka ti lenda die neto dia yirika misamu miakaka. Ntiangu bu tubongaka nzengolo za mfunu, Yehova tusambilaka katutwarisa, na lukwikulu ti mio miyôkele bubote mu beto mia kazebi.

18. Bwe tulendi tomo sila keba mu mpila ya banzila ya Yehova?

¹⁸ Diangana tonda tutondaka mu bungu ti Yehova watusala na lenda dia landa bifu biandi. (Mba. 1:26) Wa matieleka, ka tulendi’â talanda tifwani tia Yehova ko mu mpila ya lunga. (Iza. 55:9) Kâ ntiana Piere, tuzololo mu tatamana mu landa mpila ya banzila ya Yehova, mu bâ ba kuluka na mu bâ na mbanzulu za mbote.