Nkumbu ya Yehova mfunu ye kwe beto

1-2. Bwe tuzabiri ti nkumbu ya Yehova mfunu ye kwe Yezu?

NKUMBU ya Yehova nkatika mfunu ye kwe Yezu. Ka kwena muntu ko watomo zabikisa nkumbu ya Yehova yôka yandi. Ntiana bu ta mweni wo mu timoko tiayôkele, Yezu wakubama weri mu fwa mu bungu dia nkumbu ya Yehova na mu zabikisa tia mpila Nzambi kena. (Mak. 14:36; Ebr. 10:​7-9) Ha manima ma muyâlu’andi ma mvula 1000, Yezu mbo kakârisa lutumu lwalwansoni kwe Tata’andi mu bungu ti zololo ti mukembo wawansoni wakâla kwe Tata’andi. (1 Kor. 15:​26-28) Miamiansoni mia yirika Yezu mu bungu dia Yehova, mbo misongelaka ti Yandi katomo zolo.

² Yezu wayiza ha mutoto mu nkumbu ya Tata’andi. (Za 5:43; 12:13) Yandi wazabikisa nkumbu ya Tata’andi kwe milongoki miandi. (Za 17:​6, 26) Mu nkumbu ya Yehova keri longesaka mpe keri silaka bimangu. (Za 10:25) Bu kasambila Yehova mu kengerela milongoki miandi, walomba kwe Yehova kasila bo ‘mu bungu dia Nkumbu’andi.’ (Za 17:11) Wa matieleka, nkumbu ya Yehova nkatika mfunu yena kwe Yezu yôka bima biabiansoni. Buna bwe muntu kalendi têla ti Mukristo wena tala ti ka zebi’â ko peleko ka sarilaka nkumbu ya Yehova ko?

3. Nti tuzonzela mu timoko ti?

³ Mu bungu ti Bakristo ba matieleka twena, tifwani tia Yezu tulandaka, bu tusongelaka luzolo na buzitu mu bungu dia nkumbu ya Yehova. (1 Pi. 2:21) Mu timoko ti, mbo tumona mu bungu dia nti Yehova kahana nkumbu’andi kwe bô basamunaka “nsangu za Timfumu”. (Mat. 24:14) Mbo tuzonzela mpe bwe nkumbu ya Yehova yita zolo tâ mu muna muntu mu beto.

“KANDA MU BUNGU DIA NKUMBU’ANDI”

4. a) Ntia ntumunu Yezu kahana kwe milongoki miandi ntete kakâla ku zulu? b) Ntia tiyuvu tuzonzela?

⁴ Ntete kakâla ku zulu, Yezu watâ kwe milongoki miandi: ‘Mbo lubaka ngolo, mpeve santu bu yilukwizila, mpe mbo lubâ mbangi zani ku Yerusaleme, ku Yude yayansoni na ku Samaria, na tii mu mbuka ze nkatika mala ha mutoto.’ (Bis. 1:8) Buna milongoki mbo miaketi samuna nsangu za mbote kwakwansoni, ka ku Israele’â ko kwa. Bantu ba makanda mamansoni, mbo baketi baka bweso mu kwizi bâ milongoki mia Yezu. (Mat. 28:​19, 20) Kâ, Yezu têle: ‘mbo lubâ mbangi zani.’ Ngano milongoki mia môna nsatu yeri nawu ya zaba nkumbu ya Yehova, peleko wafwanana babâ kwa mbangi za Yezu? Misamu mi bazonzelaka mu Bisalu tikapu 15 mbo mi tu bakisa mu baka mvutu ya tiyuvu tio.

5. Bwe bantumwa na bakuluntu ba ku Yerusaleme basongela ti bantu babansoni nsatu ye nawu ya zaba nkumbu ya Yehova? (Tala mpe tifwani.)

⁵ Mu muvu wa 49 M.B., bantumwa na bakuluntu ba ku Yerusaleme, bavukana mu taluzula tala ti bantu balembo bâ Bayuda bafweti ba zenga masutu ntete babâ Bakristo. Ku nsuka ya timoko, Zaki, mpangi ya Yezu watâ: ‘[Piere] watomo tâ bwe, mbala ya ntete, Nzambi kakipila makanda, mu dukisa ha kati diawu kanda mu bungu dia Nkumbu’andi.’ Ngano Zaki nani keri zonzelaka? Bu kazonzela mbikuri Amose, yandi wavutu yika: “Ngatu bantu basîri batomo dinga Yehova, bawu na bantu ba makanda, bantu ba batâ mbila mu Nkumbu’ani, Yehova têle bo.” (Bis. 15:​14-18, NWT) Milongoki mia môna mbo miaketi longoka mu zaba Yehova kâ mpe mbo baketi ‘batâ mbila mu Nkumbu’andi.’ Wuzololo tâ, mbo baketi zabikisa nkumbu ya Nzambi kwe bantu bakaka mpe bantu mbo baketi zaba ti ni bawu bamonekesaka nkumbu yo.

6-7. a) Mu bungu dia nti Yezu kayiza ha mutoto? b) Ntia musamu wakaka wa mfumu watuma Yezu mu kwiza ha mutoto?

⁶ Nkumbu ya Yezu yizololo tâ “Yehova ni mvukisi,” mpe Yehova wasarila Yezu mu vukisa bô babansoni bê na timinu mu Yandi na mu mwana’andi. Yezu wayiza ha mutoto mu kwizi tihana mu bungu dia bantu. (Mat. 20:28) Bu kafuta nkûlulu wavûkisa bantu mpe wabahana lenda dia baka luzingu lwa mankululu.—Za 3:16.

⁷ Mu bungu dia nti bantu beri na nsatu nkûlulu? Ni mu bungu dia musamu wayôka ku nsaba ya Edene. Tiana bu ta têle wo mu timoko tia yôkele, bibuti bieto bia ntete, Adame na Eva, bakolamana Yehova mpe bahombesa lenda dia bâ na luzingu lwa mankululu. (Mba. 3:​6, 24) Kâ, Yezu wayiza ha mutoto mu bungu dia tima tiyôkele mfunu yôka mvukulu ya bala ba Adame na Eva. Ni mu bungu dia nkumbu ya Yehova yi bavweza. (Mba. 3:​4, 5) Mvukulu ya bala ba Adame na Eva tintwari yeri na tiyuvu tia nguri—santukisa nkumbu ya Yehova. Yezu weri muntu wafwanana mu songela wo, mu bungu nti wamonekesa Yehova mpe watomo sa mio miamiansoni mieri mu lombaka Yehova.

8. Bô babansoni beri landaka Yezu ntia musamu bafweti bakula?

⁸ Bakristo babansoni, bafweti tambula ti Yehova Tata dia Yezu, ni Yandi we mvukisi’awu. (Za 17:3) Mpe ntiana Yezu, mu nkumbu ya Yehova baketi bazabila. Bafweti bakula mpe mu bungu dia nti we mfunu mu santukisa nkumbu yô. Ni bo baketi sila ngatu bavûka. (Bis. 2:​21, 22) Ntiangu milongoki miamiansoni mia kwikama mia Yezu mia fweti longoka mpe mu zaba Yehova. Ka wena musamu wa nzitukulu ko mu mona mu bungu dia nti Yezu kamanisina lusambulu lwandi lwe mu Za tikapu 17 mu nzonzolo eyi: ‘Nkumbu’aku ya nabazabikisi, mboko ya nizabikisa, ngatu luzolo lu wakunzololo, lwabâ mu bawu, mboko meno mu bawu.’—Za 17:26.

“BENO MBANGI ZANI ZENA”

9. Bwe tulendi songela ti nkumbu ya Yehova mfunu yena kwe beto?

⁹ Mu mio miamiansoni mia tuzonzele, wa matieleka mu landa Yezu tufweti santukisa nkumbu ya Yehova. (Mat. 6:​9, 10) tufweti bongelaka nkumbu ya Yehova ntiana nkumbu yiyôkele mfunu yôka nkumbu zazansoni. Mpe tufweti songela ti ni bo tumwinaka wo. Buna bwe tulendi santukisa nkumbu ya Yehova, mpe tulendi songela ti misamu miamiansoni mia tâ Satana mu bungu dia Yehova ka miena mia matieleka ko?

10. Ntia misamu tutangaka mu buku dia Izaya 42 tii 44? (Izaya 43:9; 44:​7-9) (Tala mpe tifwani.)

¹⁰ Mu Izaya 42 tii 44 mbo tulongokaka bwe tulendi santukisa nkumbu ya Yehova. Mu bikapu bio Yehova lombele kwe bantu balembo mu sarilaka, mu songela tala ti Nzambi zawu za matieleka zena. Ntiana kwa ku tribinale, mbo katâ lomba tala ti mbangi (témoins) ze kô zilendi kwizi singasa musamu wo, kâ ka kwena muntu ko!—Tanga Izaya 43:9; 44:​7-9.

11. Yehova bwe kata tâ kwe kanda diandi ntiana bu basongele wo mu Izaya 43:​10-12?

¹¹ Tanga Izaya 43:​10-12. Yehova watâ mu bungu dia kanda diandi: ‘Beno mbangi zani zena, [. . .] mpe meno ni Nzambi.’ Yehova balombele mu hana mvutu mu tiyuvu eti: ‘Ngano Nzambi ya kaka ye kô?’ (Iza. 44:8) Diangana, bweso bwe neto bwa hana mvutu mu tiyuvu tio. Mu nzonzolo’eto na mu nsalulu zeto, timbangi tuhanaka ti Yehova ni Nzambi ya yimosi ya matieleka. Nkumbu’andi yiyôkele nkumbu zazansoni. Mpila’eto ya bêla mbo yisongelaka ti Yehova tu tomono zolo mpe ba kwikama twena kwe yandi—ni bu sa ti Satana mpasi kata tu mwisa peleko beto kata yêla mu kabakasa. Mu mpila yo, bweso bwe neto bwa santukisa nkumbu ya Yehova.

12. Bwe mbikululu ya Izaya 40:​3, 5 ya lungana?

¹² Bu tunwaninaka nkumbu ya Yehova, tifwani tia Yezu tulandaka. Izaya wabikula ti, muntu weri ko waketi “sarisa nzila [peleko “kubika,” tala mpe note] ya Yehova.” (Iza. 40:3) Ngano bwe waketi lungana? Za Tibatisi wasarisa nzila ya Yezu, wayiza mu Nkumbu ya Yehova mpe wazonzela mu Nkumbu ya Yehova. (Mat. 3:3; Mak. 1:​2-4; Like 3:​3-6) Mbikululu yo yavutu tâ: ‘Mukembo wa Yehova mbo wumoneka.’ (Iza. 40:5) Ngano bwe wamonekena? Mu bungu ti Yezu watomo monekesa Yehova bu kayiza ha mutoto, mbo weri monekaka ntiana’eti Yehova yandi beni wayiza ha mutoto.—Za 12:45.

13. Bwe tulendi landila tifwani tia Yezu?

¹³ Ntiana Yezu beto mpe Mbangi za Yehova twena. Nkumbu’andi tulwataka mpe mbo tuzonzelaka misamu miandi mia mbote kwe bantu babansoni ba tubwabanaka na bo. Kâ, mu bâ Mbangi ya Yehova ya mbote, tufweti zabikisa kwe bantu mio miamiansoni mia sa Yezu mu zabikisa Nkumbu ya Yehova. (Bis. 1:8) Yezu ni Mbangi ya Yehova ya ntete, mpe beto tifwani tiandi tulandaka. (Nza. 1:5) Kâ, bwe tulendi songela ti Nkumbu ya Yehova mfunu yena kwe beto?

NKUMBU YA YEHOVA BWE YITA ZOLO TÂ KWE BETO?

14. Ntiana bu ta wasongela Mikunga 105:3 bwe tumwinaka nkumbu ya Yehova?

¹⁴ Masika tusaka mu Nkumbu ya Yehova. (Tanga Mikunga 105:3.) Yehova nkatika nsayi yi bâka nandi bu tutisîkaka mu Yandi. (Yer. 9:​23, 24; 1 Kor. 1:31; 2 Kor. 10:17) “Tilwona” mu Yehova wuzololo tâ, bâ na lukûta mu Yehova mu bungu ti ni yandi we Nzambi’eto. Nkatika nsayi ye neto yatâ kwe bantu ti Yehova Nzambi ya santu yena, mpe miamiansoni mi kasaka mia delakana miena. Kani kabwe ka tufweti’â tabâ na nsoni ko mu tâ kwe bampwana’eto ba ku tisalu, ba ku lukolo, ba ku nzo, peleko kwe bantu ba kaka ti beto Mbangi za Yehova twena! Satana zololo ti tabîka mu zonzela nkumbu ya Yehova kwe bantu bakaka. (Yer. 11:21; Nza. 12:17) Diangana, Satana na bantu bandi bazololo mu zimbakasa nkumbu ya Yehova. (Yer. 23:​26, 27) Mu bungu ti nkumbu ya Yehova tuzololo, tuzololo tâ mu kembela “ntangu zazansoni.”—Mik. 5:11; 89:16.

15. Bingula nkumbu ya Yehova bwe wuta zolo tâ?

¹⁵ Nkumbu ya Yehova tutatamana mu bingula. (Yoel. 2:32; Rom. 10:​13, 14) Mu bingula nkumbu ya Yehova ka wufwanane’â ko kwa tazaba yo peleko tasarila yo. Nzambi tulongokaka mu zaba ntiana kwa muntu wa matieleka, wu tukwikilaka mpe kwe tukwendaka mu baka lubakusu na malongi. (Mik. 20:7; 99:6; 116:4; 145:18) Nkumbu’andi mpe na bifu biandi tuzonzelaka kwe bantu bakaka, mbo tubalwengesaka mu soba ndiatulu’awu ngatu Yehova ka batambula.—Iza. 12:4; Bis. 2:​21, 38.

16. Bwe tulendi songela ti Satana ngungu yena?

¹⁶ Bakubama twena mu mona mpasi mu bungu dia nkumbu ya Yehova. (Zaki 5:​10, 11) Bu tubâka ba kwikama kwe Yehova ntono mpasi, songela tusongelaka ti Satana ngungu yena. Mu ntangu ya Yobe, Satana watâ mu bungu dia bisari bia Yehova ti: “Biabiansoni bie na muntu mbo kahana bio mu bungu dia luzingu lwandi.” (Yobe 2:4) Satana wasingasa ti bantu Yehova basarilaka tala ti mu nsayi bêna. Kâ bamana bwabana na nkwamusu, mbo bayambirika Yehova. Yobe wasongela na kwikama kwakwansoni ti musamu wo ka weri’â wa matieleka ko. Lumbu ti mpe tulendi bâ bakangama kwe Yehova ni bu sa ti luzingu lweto lukotele mu ntontolo, peleko Satana yêlele mutu nôkesa. Kani ka bwe ka tubîka mu sarila Yehova ko. Tulendi bâ na lukwikulu ti, Yehova mbo katukengerela mu bungu dia nkumbu’andi.—Za 17:11.

17. Bwe tulendi hanina mukembo mu nkumbu ya Yehova ntiana bu ta wa songela 1 Piere 2:12?

¹⁷ Nkumbu ya Yehova tuzitisaka. (Bin. 30:9; Yer. 7:​8-11) Mu bungu ti bantu bazebi ti beto Mbangi za Yehova twena, mio mi tuyirikaka milendi kembesa nkumbu ya Yehova peleko kani. (Tanga 1 Piere 2:12.) Ntiangu, tuzololo tasa mio miamiansoni mi tulenda mu kembela Yehova mu nzonzolo’eto na mu ndiatulu’eto. Tamana sila bô ni bu sa ti ka twena ba lunga ko, mbo tutatamana mu hana mukembo mu nkumbu ya Yehova.

18. Mu ntia mpila ya kaka tulendi songela ti nkumbu ya Yehova mfunu yena kwe beto? (Tala mpe note.)

¹⁸ Nkumbu ya Yehova tukembelaka ntono mio mi banzaka bantu mu bungu dia beto. (Mik. 138:2) Mu bungu dia nti we nguria mfunu? Mu bungu ti bu tuyirikaka misamu mitâka Yehova nsayi, bantu ka bavulu’â mia zoloko ko, mpe mbo batâka bubi mu bungu dia beto.a Yezu bu ka fwa bantu mbo beri mu bongelaka ntiana timpumbulu mpe mbo beri mu seheselaka, k Yezu wakubama weri mu fwa mu mpila yo ngatu Yehova kakemboso. Keri’â monaka ‘nsoni’ ko mu bungu ti keri’â belokelaka lwaka ko mu misamu mieri tâka bantu mu bungu dia yandi. (Ebr. 12:​2-4) Kani diandi dieri dia sarila luzolo lwa Tata’andi.—Mat. 26:39.

19. Kwe nge nkumbu ya Yehova bwe yita zolo tâ mpe mu bungu dia nti?

¹⁹ Sîka tutisîkaka bu tusarilaka Yehova, mpe nsayi yibâka neto bu batutâka Mbangi za Yehova. Mu bungu ti nkumbu ya Yehova nkatika mfunu yena kwe beto, mbo tutatamana mu kembela yo ni bu sa ti bantu yina batuyinaka. Nkumbu ya Yehova nkatika mfunu yena kwe beto, yôka ya beto beni. Tatatamaneno mu kembela nkumbu ya Yehova ni bu sa ti Satana lendi dinga mu tu kabakasa. Mu mpila yo mbo tusongela ti nkumbu ya Yehova nkatika mfunu yena kwe beto ntiana bu ye kwe Yezu.