Watchtower BIBLIOTEKE YA MU INTERNET
Watchtower
BIBLIOTEKE YA MU INTERNET
Kilari
  • BIBILA
  • MIKANDA
  • TUKUTAKANU
  • w25 Ngonda ya 6 bin. 2-7
  • Malongi ma tulendi baka mu mbikululu ya Yakobe—Lweka 1

Ka kwena video ko yi bawukiri mu nsololo yi siri.

Video yibwabwane na nkwamusu.

  • Malongi ma tulendi baka mu mbikululu ya Yakobe—Lweka 1
  • Nzo ya Zangama ya Munkengi yita samuna timfumu tia Yehova (Ndongokolo)—2025
  • Mitu-diambu mia fioti
  • Mukanda wu delakane
  • RIBENE
  • SIMEONE NA LEVI
  • YUDA
  • Malongi ma tulendi baka mu mbikululu ya Yakobe—Lweka 2
    Nzo ya Zangama ya Munkengi yita samuna timfumu tia Yehova (Ndongokolo)—2025
  • Yakobe na Ezawu bawisane
    Ndongosolo zi lendi baka mu Bibila
Nzo ya Zangama ya Munkengi yita samuna timfumu tia Yehova (Ndongokolo)—2025
w25 Ngonda ya 6 bin. 2-7

TIMOKO TIA NDONGOKOLO 24

MUKUNGA 98 Matsonoko—kwe Nzambi matûka

Malongi ma tulendi baka mu mbikululu ya Yakobe—Lweka 1

“Kutakaneno nalutêla misamu milutûrila mu bilumbu bita kwiza.”—MBA. 49:1.

MABANZA MA NGURI

Malongi ma tulendi baka mu mbikululu ya Yakobe yitariri Ribene, Simeone, Levi na Yuda.

1-2. Yakobe nti kasa ntete kafwa, mpe mu bungu dia nti? (Tala mpe tifwani tia ntete.)

KAMPE mvula 17 zayôka tûka ntangu Yakobe, weri tisari tia kwikama tia Yehova, yi kakatuka ku nsi ya Kana mu kwenda ku Ezipte na kanda diandi. (Mba. 47:28) Yakobe nkatika nsayi yeri nandi mu vutu mona mwana’andi Yozefe, mu bungu ti mbo keri banzaka ti wafwa. Yakobe na bala bandi bavutu bâ tintwari. Kâ bwawu bu Yakobe zebi ti ntamana mbo kafwa. Buna wakutakasa kanda diadiansoni mu ba têla misamu mia mfunu.—Mba. 49:28.

2 Mu ntangu yîna, mfumu za makanda tifu tieri nawu tia kutakasa makanda mawu, mu ba têla misamu mia mfunu ntete bafwa. (Iza. 38:1) Mu lukutakanu lo, mfumu kanda mbo keri vulu solaka muntu waketi twarisa kanda ha manima ma lufwa lwandi.

Yakobe ha mfulu’andi ya lufwa, tahana mbikululu kwe bala bandi ba 12 (Tala paragrafe 1-2)


3. Nti tuta longoka mu Mbatukulu 49:​1, 2?

3 Tanga Mbatukulu 49:​1, 2. Lukutakanu lwa kanda dia Yakobe lwa swaswana lweri. Yakobe wazonzela misamu mia keti tûla mu bilumbu bia ku matu. Mu lukutakanu lo, Yehova wabakisa Yakobe mu zonzela misamu mia mfunu miaketi tûrila bala bandi na kanda diandi mu bilumbu bia ku matu. Ntiangu, nzonzolo ya Yakobe bavulu ya tâka: mbikululu’andi ha zulu mfulu’andi ya lufwa.

4. Yakobe nti kabikula, mpe nti tulendi longoka mu nzonzolo’andi? (Tala mpe Kaku “Kanda dia Yakobe.”)

4 Mu timoko ti, mbo tuzonzela misamu mia tâ Yakobe kwe bala bandi ba bayà: Ribene, Simeone, Levi, na Yuda. Mu timoko tita landa, misamu mia tâ Yakobe kwe bala bandi ba 8 tuzonzela. Ntiana bu tumona wo, Yakobe wabikula misamu miatûrila bala bandi kâ mpe na makanda mawu; ntangu bu yeri kwe yôke makanda mo mayizi bâ kanda dia Israele. Bu tutaluzula misamu miatûrila kanda dia Israele mu ntama, mbo tubakula bwe mbikululu ya Yakobe yayizi lungana. Mpe bu tutaluzula misamu mi katâ, malongi ma mbote tubaka matubakisa mu yangirika Tata’eto die ku zulu, Yehova.

Tablo yita songela kanda dia Yakobe. Yakobe bakento bole beri nandi, Lea na Rashele, na makangu mole, Bila na Zilpa. Bala ba kabuta na Lea ni Ribene, Simeone, Levi, Yuda, Izakare, Zebulone, na Dina. Bala ba kabuta na Rashele ni Yozefe na Benyamine. Bala ba kabuta na Bila ni Dane na Naftali. Bala ba kabuta na Zilpa ni Gade na Asere.

RIBENE

5. Nti Ribene keri kêlaka mu baka kwe tata’andi?

5 Yakobe watoko zonzela Ribene bu katâ: “Nge ni mwana’ani wa ntete.” (Mba. 49:​3, NWT) Mu bungu ti ni yandi weri mwana wa ntete, Ribene mbo keri kêlaka kabaka bimvwama biabingi yôka mpangi zandi. Kampe wakêla kabâ mfumu kanda ha manima ma lufwa lwa tata’andi mpe bweso bô, bwa tatamana mu bâ mu kanda diandi.

6. Mu bungu dia nti Ribene kalembo baka bimvwama bi bakaka mwana wa ntete? (Mbatukulu 49:​3, 4)

6 Kâ, Ribene kabaka bimvwama ko bi bakaka mwana wa ntete. (1 Nta. 5:1) Mu bungu dia nti? Mu bungu ti mu mivu miayôka wavukasa nitu na Bila weri makangu ma Yakobe. Bila, tisari tieri tia Rashele weri mukento wa Yakobe wafwa. (Mba. 35:​19, 22) Ribene mwana weri wa Lea weri mukento wakaka wa Yakobe. Kampe ni nsatu zandi za tinsuni zamutuma mu vukasa nitu mu ngolo na Bila. Peleko kampe wavukasa nitu mu ngolo na Bila ngatu Yakobe kayina Bila mpe katomo zolo Lea. Ni bu sa kabwe, musamu wo watomo niongesa Yehova na Yakobe.—Tanga Mbatukulu 49:​3, 4.

7. Nti biatûrila Ribene na bala bandi? (Tala mpe kaku “Mbikululu ya Yakobe ha zulu mfulu’andi ya lufwa.”)

7 Yakobe têle kwe Ribene: “Ku bâ wazangama ko.” Misamu mi katâ mialungana. Ka kwena tima ko tisongelaka ti mu bala babansoni ba Ribene wumosi weri ko wabâ mutinu, Nganga-Nzambi peleko mbikuri. Kâ, Yakobe wahana fwa kwe Ribene; mpe kanda dia Ribene diayizi bâ dimosi dia makanda ma ku Israele. (Yos. 12:6) Ribene wasarila bifu bia mbote mu misamu miakaka, mpe ka kwena tima ko tisongelaka ti wayizi vutu sarila bunsuza.—Mba. 37:​20-22; 42:37.

Mbikululu ya Yakobe ha zulu mfulu’andi ya lufwa

Ribene.

Mwana

Ribene

Mbikululu

“Ku bâ wazangama ko.”—Mba. 49:​4, NWT.

Ndungananu

Ka kwena mwana ko mu kanda dia Ribene wayizi twarisa kanda dia Israele.—1 Nta. 5:​1, 2.

8. Ntia malongi tulendi baka mu tifwani tia Ribene?

8 Ntia malongi tuta baka? Tufweti sarila ngolo mu kurisa tifu tia tiyimina na mu losa ndiatulu ya bunsuza. Tala ti disumu tuta zolo yirika, tufweti bonga ntangu ya dimbitila mu mpila nsalulu zeto zilendi niongesela Yehova, kanda dieto, na bantu bakaka. Tufweti bambuka mpe ti ‘bio bi mwangaka muntu, ni bio mpe katiaka.’ (Nga. 6:7) Ku lweka lwakaka mbo mitubambulaka tiari tia lemvokela tia Yehova. Ni bu sa ti Yehova ka kabakasaka nsembolo zinataka makuba meto ko, mbo kasakumuna ngolo zi tusaka mu yirika misamu mia mbote.

SIMEONE NA LEVI

9. Mu bungu dia nti Yakobe kalembo yangalala mu Simeone na Levi? (Mbatukulu 49:​5-7)

9 Tanga Mbatukulu 49:​5-7. Ha manima, Yakobe wazonza kwe Simeone na Levi, mio mi katâ miasongela ti ka yangalala mu ndiatulu’awu ko. Mvula zazingi ha manima, Sisheme weri Musi-Kana, wayizi vukasa nitu mu ngolo na mwana wa wukento wa Yakobe, Dina. Diangana, bala babansoni ba Yakobe bayizi nionga mu bungu dia musamu watûrila tibusi tiawu, kâ Simeone na Levi ka bazabirila nkesi zawu ko. Batambula mu sa tidzunu na bantu ba Sisheme tala ti babakala babansoni bazengoso masutu. Babakala bango bayizi tambula. Kâ mu ntangu yi beri monaka mpasi mu bungu dia mputa zeri nawu, Simeone na Levi ‘[babonga mbele zawu] bakota ku mumvuka na kondo kwa bunkuta mpe bahonda babakala babansoni.’—Mba. 34:​25-29.

10. Bwe mbikululu ya Yakobe mu bungu dia Simeone na Levi ya lungana (Tala mpe kaku “Mbikululu ya Yakobe ha zulu mfulu’andi ya lufwa.”)

10 Yakobe nkesi za nkatika zazingi zeri nandi mu bungu ti bala bandi ba bole bahonda bantu babingi. Wabikula ti fwa diawu mbo diaketi yangana ku nsi yayansoni ya ku Israele. Mvula 200 ha manima, mbikululu yô yayizi lungana mu ntangu kanda dia Israele diayizi kota ku nsi ya Kana. Kanda dia Simeone diayizi biarila bala bia mimvuka bia tizunga tia Yuda. (Yos. 19:1) Mpe kanda dia Levi diayizi biarila mimvuka lutangu 48 ku Israele ya mukaka.—Yos. 21:41.

“Mbikululu ya Yakobe ha zulu mfulu’andi ya lufwa”

Simeone.

Mwana

Simeone

Mbikululu

“Bika nabamwangasa mu Yakobe.”—Mba. 49:​7, NWT.

Ndungananu

“Kanda dia Simeone diayizi biarila bala bia mimvuka ku tizunga tia Yuda”.—Yos. 19:​1-8.

Levi.

Mwana

Levi

Mbikululu

“Bîka nabayangasa ku Israele.”—Mba. 49:​7, NWT.

Ndungananu

Kanda dia Levi diayizi biarila mimvuka lutangu 48 ku Israele ya mukaka.—Yos. 21:41.

11. Ntia misamu mia mbote kanda dia Simeone na dia Levi diayirika?

11 Kanda dia Simeone na dia Levi ka bakârila misamu mia yirika bankaka bawu ko. Balevite babingi beri sarilaka Yehova na kwikama kwakwansoni. Mu ntangu Mose yi kabaka Musiku wa Yehova ku mongo wa Sinayi, bala ba Israele babingi bayizi sambila titeki tia mwana ngombe, kâ Balevite bayizi bâ ku lweka lwa Mose mpe bamubakisa mu telamana nsalulu yo ya mbi. (Ndu. 32:​26-29) Yehova wasola bantu mu kanda dia Levi mu kwizi bâ ba Nganga-Nzambi mu kanda dia Israele. (Ndu. 40:​12-15; Lut. 3:​11, 12) Ha manima, kanda dia Simeone diabakisa kanda dia Yuda mu nwanisa Bisi-Kana mu bungu dia tizunga tiawu tieri ku nsi ya Kana.—Mfu. 1:​3, 17.

12. Ntia malongi tulendi baka mu tifwani tia Simeone na Levi?

12 Ntia malongi tuta baka? Tufweti zabirila nkesi zeto. Tala ti nge peleko muntu wuzololo mpasi balumwisa, ka wena musamu wa nzitukulu ko mu bâ mu bukaka. (Mik. 4:4) Tufweti bambuka ti, Yehova ka tambulaka nzonzolo na ndiatulu yisikamane mu nkesi za ngolo ko. (Zaki. 1:20) Tala ti muntu tu mwisini mpasi—ni kabâ mbangi ya Yehova peleko kani—tufweti tatamana mu bâ na ndiatulu yiyangirikaka Yehova. Mpila yo ya diatila mbo yitubakisa mu lembo tâ peleko yirika musamu wumwisa muntu mpasi (Rom. 12:​17, 19; 1 Pi. 3:9) Ni bu sa ti bibuti biaku ka bita diatila mu mitieno mia Yehova ko, bambuka ti lendi sola mu lembo landa tifwani tiawu. Kubanzandi ti kulendi’â wa yangirika Yehova ko. Yehova mbo kakubakisa mu sarila mbote mpe mbo kakusakumuna.

YUDA

13. Mu bungu dia nti Yuda kaketi bâ na lwaka mu ntangu yi kaketi wirikila misamu mia keti mu têla tata’andi?

13 Ha manima, Yakobe wayizi zonza kwe Yuda. Bu kayizi wâ misamu mia tâ Yakobe kwe bayaya bandi, kampe Yuda wayizi bâ na lwaka. Yandi mpe, misamu mia mbi miamingi kayirika. Yandi mpe wabonga bima bia bâ ku mumvuka wa Sisheme mu ngolo. (Mba. 34:27) Wayika mpangi zandi moko mu teka Yozefe ku bungamba mpe bahuna tata’awu mu bungu dia musamu wo. (Mba. 37:​31-33) Ha manima, wayizi vukasa nitu na Tamare weri mukento wa mwana’andi, bu keri banzaka ti tiyala tieri.—Mba. 38:​15-18.

14. Ntia misamu mia mbote Yuda kayizi yirika? (Mbatukulu 49:​8, 9)

14 Kâ Yakobe, misamu mia mbote mia Yuda kwa kazonzela, mpe wakanisina misamu mia mbote miaketi mu tûrila yandi na kanda diandi. (Tanga Mbatukulu 49:​8, 9.) Yuda wasongela ti tata’andi keri tomo belokelaka lwaka. Mpe wayizi songela tiari tiandi tia mutima mu bungu dia mpangi’andi Benyamine.—Mba. 44:​18, 30-34.

15. Mu ntia mpila Yuda kayizi bakila tusakumunu?

15 Yakobe wayizi bikula ti Yuda mbo kaketi twarisa mpangi zandi. Kâ, mbikululu yo yazingila mu lungana. Mvula 200 zayôka, bu bayizi zonzela Yuda ntiana ntwarisi mu mbala ya ntete; ni ha manima ma ndukulu, mu ntangu kanda diandi diayizi twarisa kanda dia Israele tûka sese tii ku mutoto wa Kani. (Lut. 10:14) Mvula zazingi ha manima, Yehova wasola Yuda wa ntete mu kwe nwanisa Bisi-Kana mu biarila mutoto wa Kani. (Mfu. 1:​1, 2) Mpe Davide, mosi wa batekolo ba Yuda, weri mutinu wa ntete mu mitinu miamiansoni mia duka mu kanda dia Yuda. Kâ mbikululu yo yayizi lungana mpe mu mpila zakaka.

16. Bwe mbikululu ya Mbatukulu 49:10 ya lungana? (Tala mpe kaku “Mbikululu ya Yakobe ha zulu mfulu’andi ya lufwa.”)

16 Yakobe watâ ti mutinu wuyâla bantu babansoni, mu kanda dia Yuda wudûkila mpe ntangu zazansoni kayâla. (Tanga Mbatukulu 49:10 na note.) Mutinu wo ni Yezu Kristo, Yakobe wu katâ mu nkumbu ya Silo. Mbazi yimosi yatâ mu bungu dia Yezu: ‘Yehova mbo kamuhana muyâlu wa Davide tata’andi.’ (Like 1:​32, 33) Yezu mbo bamutâka mpe ‘Ngo-Mbulu ya kanda dia Yuda.’—Nza. 5:5.

“Mbikululu ya Yakobe ha zulu mfulu’andi ya lufwa.”

Yuda.

Mwana

Yuda

Mbikululu

“Muhangu wa Timfumu [peleko sceptre] ka yikatuka ku Yuda ko [. . .] na tii ntangu yikwiza Silo.”—Mba. 49:​10, NWT.

Ndungananu

Yezu we mutekolo wa Yuda, kwizi bâ Mutinu wa Timfumu tia Nzambi.—Like 1:​32, 33.

17. Bwe tulendi landila tifwani tia Yehova mu mpila yi tumwinaka bantu bakaka?

17 Ntia malongi tuta baka? Yehova wasakumuna Yuda ni bu sa ti masumu ma manene kasa. Kampe mpangi zandi zakaka zatiyula, nti Yehova kamona kwe yandi? Ni bu sa ti ka tuzebi’â misamu mi beri banzaka ko, tuzebi ti Yehova misamu mia mbote kamona kwe Yuda. Bwe tulendi landila tifwani tia Yehova? Mpangi yakaka bu yibakaka madema ma nzitukulu, tulendi kwizi tûla mabanza meto mu misamu mia mbi mi tuzebi mu yandi. Kâ tufweti bambuka ti Yehova yangalala kayangalalaka mu bifu biandi bia mbote. Yehova bifu bia mbote kadingaka kwe bisari biandi. Beto mpe tufweti sila bo.

18. Mu bungu dia nti tufweti bêla na luvivululu?

18 Malongi makaka ma tulendi baka mu tifwani tia Yuda, ni mu bâ na luvivululu. Yehova makani mandi kalungisaka, kâ ntangu zakaka ka lungisaka mo ko mu mpila yi tukekoloko. Bantu ba ntete batwarisa kanda dia Israele, ka beri’â mu kanda dia Bayuda ko. Kâ moko beri yikaka kwe bantu Yehova ba kasola, mu twarisa kanda dia Israele ni bu wubâ Mose weri Levite, Yoswa weri mu kanda dia Efrayime, peleko mutinu Sawule weri Musi-Benyamine. Beto mpe tufweti yika moko kwe muntu Yehova wu kasolele mu tu twarisa lumbu ti.—Ebr. 6:12.

19. Mbikululu ya Yakobe ha zulu mfulu’andi ya lufwa, nti yita tu longesa mu Yehova?

19 Nti tulongokele mu misamu mia mansukina mia tâ Yakobe kwe bala bandi ba bayà? Wa matieleka “Mpila yi mwinaka Nzambi misamu ka yena mpila yi mwinaka bantu misamu ko.” (1 Sam. 16:​7, NWT) Yehova luvivululu lwalwingi lwe nandi mpe lemvokela kalemvokelaka. Ni bu sa ti ka tambulaka ndiatulu ya mbi ko, ka kêlaka ko mpe ti bisari biandi biabâ bia lunga. Lendi lemvokela mpe bantu basa masumu ma manene mu ntama, tala ti basobele mabanza mpe badiatiri mu bunsungu. Mu timoko tita landa, mbo tutaluzula misamu mia tâ Yakobe kwe bala bandi ba 8 bakaka.

NTIA MALONGI BAKIRI MU MISAMU MIA TÂ YAKOBE KWE . . .

  • Ribene?

  • Simeone na Levi?

  • Yuda?

MUKUNGA 124 Tabêno ba kwikama

    Mabuku ma Lari (1996-2025)
    Duka
    Kota
    • Kilari
    • Tambika
    • Bima bi zololo
    • Copyright © 2025 Watch Tower Bible and Tract Society of Pennsylvania
    • Misiku mia sarila
    • Misiku mia mansweki
    • Paramètres de confidentialité
    • JW.ORG
    • Kota
    Tambika