Ngano misamu mi walongoka mia ntete mu Bibila milendi vutu ku bakisa lumbu ti?

1. Bwe ndongosolo za Bibila, zayizi nata nsobolo mu luzingu lwaku bu walongoka zo mu mbala ya ntete?

MISAMU mia ntete mi talongoka mu Bibila miasoba luzingu lweto. Mu tifwani, bu talongoka ti nkumbu ya Nzambi ni Yehova tayizi batika mu bâ ndiku’andi. (Iza. 42:8) Bu tayizi longoka matieleka matariri bantu bafwa, ka tasala tiyuri biyuvu ko tala ti ndiku zeto za fwa mpasi zimonaka. (Ekl. 9:10) Mpe bu tayizi longoka kani dia Nzambi ditariri Paradi ha zulu mutoto, ka tasala na lwaka ko mu bungu dia bilumbu bita kwiza. Tahizi bâ na lukwikulu ti luzingu lweto lulendi zingila, ka ntangu fieti’â ko kwa—mvula 70 peleko 80—kâ ntangu zazansoni.—Mik. 37:29; 90:10.

2. Bwe 2 Piere 1:​12, 13 yita songela ti Bakristo bayela balendi mpe baka ndandu mu misamu mia ntete mi balongoka?

² Kani kabwe ka tufweti’â tazimbakana ko ti, misamu mia ntete mi talongoka mu Bibila mfunu miena. Mu mukanda’andi wa nzole, ntumwa Piere watsonekena Bakristo beri “basikama mu matieleka.” (Tanga 2 Piere 1:​12, 13, NWT.) Kâ mu ntangu yo mu timvuka ba nkwa-mbi beri kô, beri zolo wubakasaka bampangi mu matieleka. (2 Pi. 2:​1-3) Piere wazolo mu tindisa mpangi zandi mu ba bakisa mu telamana musamu wo. Mu sila bo, wababambula misamu mi batizabila. Misamu mio mbo miaketi ba bakisa mu bâ ba kangama tii ku nsuka.

3. Bangula mu bungu dia nti Bakristo babansoni bafweti tatamana mu yindula mu misamu mia ntete mi balongoka mu Bibila.

³ Ni bu sa ti ntama tweka mu matieleka, tulendi vutu baka ndongosolo za môna mu misamu mia ntete mi talongoka mu Bibila. Mu tifwani: muntu wuzebi lamba na wo wuta longoka mu lamba, balendi tûla bima bimosi mu bidia bi bata lamba. Kâ, ntangu bu yiyôka wô zebi tomo lamba, mbo kazaba mu sarila bima bio mu mpila zakaka mu lamba bidia bia mbote. Mpila mosi mpe, bô basarilaka Yehova tûka ntama, na bô bamusarilaka bwawu bu balendi baka ndandu mu misamu mia ntete mi balongokaka mu Bibila. Kampe luzingu lweto peleko madema meto mayizi soba tûka ntangu yi tayizi baka bateme. Tamana dimbitila mu misamu mia Bibila mi talongoka mu ntama, mbo tumonaka mu ntia mpila tulendi mia sarila bwawu bu. Tataluzuleno ndongosolo zilendi baka Bakristo bayela mu misamu mitatu mi balongoka mu Bibila.

YEHOVA NI MVANGI

4. Nti bia tu simba mutima bu tazaba ti Yehova ni Mvangi’eto?

⁴ “Wô wasala bima biabiansoni ni Nzambi.” (Ebr. 3:​4, NWT.) Tuzebi ti nza yayansoni na bima bie mu kati, Mvangi ye ko ye na ndwenga na ngolo wasala bio. Ni Yandi watusala, buna tomono tu zaba. Kâ mpe beto kafwilaka tiari. Bio biyôkele bubote mu bungu dia beto bia kazebi. Zaba ti Yehova ni Mvangi’eto, wayizi tomo tu simba mutima mpe wayizi hana nsasa mu luzingu lweto.

5. Ntia matieleka malendi tu bakisa mu kurisa tifu tia kuluka? (Izaya 45:​9-12)

⁵ Bu tuzaba ti Yehova ni Mvangi’eto, musamu wo wulendi tulongesa tifu tia kuluka. Yobe bu katûla mabanza mandi mu yandi beni na mu bantu bakaka, Yehova wamubambula ti yandi weri Mvangi mpe weri mu Nkwa-Ngolo-Zazansoni. (Yobe 38:​1-4) Musamu wo wabambula Yobe ti nzila za Nzambi ziyôkele za muntu. Mu mabanza mo kwa mpe, mbikuri Izaya watsoneka ha manima: ‘Ngano lubuma lendi tâ kwe tisari tia binzu [potier]: ‘Nti tasa?’’—Tanga Izaya 45:​9-12.

6. Mu ntia ntangu tufweti dimbitila mu ndwenga na ngolo za Mvangi’eto? (Tala mpe bifwani.)

⁶ Mu ntangu Mukristo ka kwe zabi misamu miamingi, lendi batika mu tomo tûla lukwikulu mu mbanzulu zandi kani kabika Yehova na Zu diandi diamutwarisa. (Yobe 37:​23, 24) Ngano nti biyôka tala ti muntu wubongele ntangu yatomo dimbitila mu ndwenga na ngolo za Mvangi’andi? (Iza. 40:22; 55:​8, 9) Matieleka mo ma mfunu, mbo mamubakisa mu bâ wa kuluka na mu zaba ti mbanzulu za Yehova ziyôkele mbanzulu zandi.

7. Ngano Rahela nti kasa mu tambula nsobolo za môna?

⁷ Bu kayindula ti Yehova ni Mvangi’andi, Rahela bâka ku Slovenie, wazaba delakasa mbanzulu zandi mpe watambula nsobolo zi basa mu timvuka. Yandi têle: “Ntangu zakaka, ka weri’â musamu wa fioti ko kwe meno mu tambula nzengolo zeri bongaka bantu bo beri tu twarisaka. Mu tifwani, ni bu sa ti natitarila Nsangu za Timvuka titwarisaka #8 za 2023 zeri tarilaka ndievo, nayizi yituku bu namona mu mbala ya ntete mpangi yeri na ndievo yeri saka tinzonzi. Buna nayizi sambila Yehova kakumbakisa mu tambula nsobolo yo.” Rahela watambula ti bu ke Mvangi yasala zulu na mutoto, Yehova lenda die nandi dia tomo twarisa organizasio’andi mu mpila ya mbote. Tala ti mpasi wena kwe nge mu tambula nsobolo za mona, lendi dimbitila na kuluka kwakwansoni mu ndwenga na ngolo ze na Mvangi’eto?—Rom. 11:​33-36.

MU BUNGU DIA NTI NZAMBI KABIKILAKA MPASI

8. Bu tayizi zaba mu bungu dia nti Nzambi kabikilaka mpasi, ntia ndandu tayizi baka?

⁸ Mu bungu dia nti Nzambi kabikilaka mpasi? Bantu bakaka balembo baka mvutu mu tiyuvu tio, bayizi bakila Nzambi nkesi, peleko bayizi tâ ti Nzambi kena kô ko! (Bin. 19:3) Kâ nge, wayizi longoka ti, ka Yehova ko tulumunaka mpasi, kâ ni masumu ma tabiarila ma saka ti tamona mpasi mpe tafwa. Wayizi longoka mpe ti luvivululu lwa Yehova lwaheni lenda kwe milio za bantu mu mu zaba na mu mona mu bawu beni mu ntia mpila Yehova kakaturila mpasi. (2 Pi. 3:​9, 15) Matieleka mo mayizi ku tindisa mpe masa ti wapusana kwe yandi.

9. Mu ntia ntangu tufweti bambukaka mu bungu dia nti Yehova kabikilaka mpasi?

⁹ Mfunu ya luvivululu tubakulaka, bu tuta kwe kêle ntangu Yehova yi kakatula mpasi. Kâ, tala ti beto peleko bantu ba tuzololo, tubwabane na mpasi, kondo kwa buderede, peleko tuhombese muntu, tulendi tiyula mu bungu dia nti Yehova kata lembo kulu katula mpasi. (Hab. 1:​2, 3) Mu ntangu yo musamu wa mbote wubâka, mu dimbitila mu bungu dia nti Yehova kabikilaka bantu basungama bakorela mpasi.a (Mik. 34:19) Tulendi dimbitila mpe mu kani diandi dia tûla nsuka mu mpasi.

10. Bwe Anne katelamana tiari tia lufwa lwa nguri’andi?

¹⁰ Matieleka matariri mpasi malendi tu bakisa mu korela. Anne, bâka ku île ya Mayotte, mu kati dia Ocean Indien, têle: “Lufwa lwa nguri’ani mu mvula zi zayôkele lwa tomono ku ntâ tiari. Kâ ntangu zazansoni bambuka nibambukaka ti, ka Yehova ko tulumunaka mpasi. Timina die nandi dia katula mpasi za mpila na mpila na dia vumbula bantu bafwa. Bu nidimbitilaka mu matieleka mo, lutindusu na tidzunu nibakaka ntono tiari tia lufwa lwa nguri’ani.”

11. Bu tuzebi mu bungu dia nti Yehova kabikilaka mpasi, bwe musamu wo wulendi tubakisa mu tatamana mu samuna?

¹¹ Zaba mu bungu dia nti Nzambi kabikilaka mpasi wulendi tu bakisa mu tatamana mu bâ na luhemo mu tisalu tia samuna. Bu kamana bangula ti luvivululu lwa Yehova mvukulu lunataka mu bungu dia bô basobaka mabanza, Piere watsoneka: “Dimbitileno mu mpila ya bantu yi lufweti bâ, bantu bê na ndiatulu ya santu na nsalulu zisongelaka kangama kwe Nzambi.” (2 Pi. 3:​11, NWT.) Ha kati dia “nsalulu zinsongekala kangama kwe Nzambi” mwe na tisalu tieto tia samuna. Ntiana Tata’eto, beto mpe bantu tuzololo. Tuzololo bawu mpe babâ mu nza ya môna ya Nzambi. Yehova na luvivululu lwalwansoni kahanaka kwe bantu ba mu teritware’eto lenda dia mu sarila. Bweso bwa nzitukulu bwe naku bwa bâ ndiku ya Nzambi mu tisalu tiandi, mpe bwa bakisa bantu babingi mu longoka mu muzaba ntete nsuka ya tûla!—1 Kor. 3:9.

MU ‘BILUMBU BIA MANSUKINA’ TWENA

12. Bu tazaba ti ‘mu bilumbu bia mansukina twena’ ntia ndandu tabaka?

¹² Bibila mbo ditomo songelaka bwe bantu bakwizi bâ ‘mu bilumbu bia mansukina.’ (2 Tim. 3:​1-5) Bu tumonaka ndiatulu ya bantu batuzungiriri, mbo tubakulaka ti mio mitâka Bibila mia matieleka miena. Mpe bu tumonaka ndiatulu ya bantu yitâ tomo beba, lukwikulu lwa ngolo lukwizi bâka neto ti, tulendi sikirila Zu dia Nzambi.—2 Tim. 3:​13-15.

13. Bwe tifwani tia zonzela Yezu mu Like 12:​15-21 tilendi tu bakisila?

¹³ Zaba ti mu bilumbu bia mansukina twena bakisa wutubakisaka mu tûla mabanza meto mu bio biyôkele mfunu. Tulendi longoka mu bungu dia nti we mfunu mu sila bo, bu tutaluzula tifwani tia Yezu tie mu Like 12:​15-21. (Tanga, NWT.) Mu bungu dia nti batêla ti muntu wabâ na bimvwama “tizoba” tieri? Ka wena ko ti mu bungu ti muntu wo bimvwama biabingi bieri nandi, kâ ni mu bungu ti ka zaba misamu mia yôka mfunu ko. “Wakutakasa bimvwama mu bungu dia yandi beni, kâ ka vwama ha meso ma Nzambi ko.” Mu bungu dia nti weri musamu wa wunene? Nzambi watâ kwe bakala dio: “Mpimpa yi mbo fwa.” Lumbu ti, nsuka ya nza yi yeka penepene, buna tulendi tiyula: ‘Ngano makani mani songela masongelaka ti mabanza nitulaka mu misamu miyôkele mfunu? Ntia makani nibakisaka bala bani mu lungisa? Ngano ngolo zani, ntangu’ani, na mbongo zani ni sarilaka, mu toko dinga bimvwama biani peleko mbo nisarilaka bio mu toko dinga bimvwama bia ku zulu?’

14. Ntiana buta wasongela tifwani tia Miki, mu bungu dia nti we mfunu mu dimbitilaka mu misamu mita songela ti mu bilumbu bia mansukina twena?

¹⁴ Mpila’eto ya mwina luzingu yilendi soba bu tubakula ti mu bilumbu bia mansukina twena. Musamu ni wo waturila mpangi yimosi ya yikento ye na nkumbu Miki. Yandi têle: “Bu nabaka diplome’ani, wabâ nani na sala tisalu ti balongokelaka bibulu. Kani mpe diabâ nani diabâ mupasuri-nzila wa ntangu zazansoni na dia hana lubakusu ku mbuka zi beri dingaka bisamuni. Ndiku za yela zakuntindisa mu tomo banza tala ti wa delakana weri mu landa tisalu tiani ha timosi na makani mani ma timpeve. Bakumbambula ti nsuka ya nza yi ka yisiri’â mala ko. Ku lweka lwakaka, mu nza ya môna, lenda dibâ nani dia longoka tibulu ni tibulu ti nzololo. Buna nayizi bonga nzengolo yalembo sa lukolo lwa lula. Musamu wo wakumbakisa mu baka tisalu tiakungana lenda dia bâ mupasuri-nzila wa ntangu zazansoni, mpe ha manima mu kwenda ku Equateur kwa bâ na nsatu bisamuni.” Bwawu bu Miki ku nsi yo kasalaka na bakala diandi, we munkengi wa tizunga.

15. Bwe tifwani tia Zaki tita tu songela ti ka tufweti’â tayambirikaka bantu beka lembo tambula matieleka ko? (Tala mpe bifwani.)

¹⁵ Ka tufweti’â tabâ ba nôka ko mu ntangu bantu yi balembo tambulaka nsangu za mbote. Bantu balendi soba. Tabongeno tifwani tia Zaki weri mpangi ya Yezu. Wamona Yezu bu kakula, bu kayizi bâ Masiya, mpe bu keri longesaka mu mpila ya nzitukulu. Kâ, tûka mvula zazingi, Zaki ka yizi’â landa Yezu ko. Ha manima ma mvumbukulu ya Yezu kwa kayizi bâ mulongoki wa Yezu, diangana Zaki wayizi bâ mulongoki weri na luhemo!b (Za 7:5; Nga. 2:9) Mfunu wena mu lembo bika mu samuna bantu ba kanda dieto beka lembo tambula matieleka mpe mu tatamana mu samuna bantu bakaka balembo tambula matieleka mu ntama. Bambuka ti mu bilumbu bia mansukina twena, buna tisalu tieto tia samuna nguria mfunu tiena. Mio mi tubatêla lumbu ti milendi buta mbutu ha manima, kâ mpe na mu ntangu ya mpasi ziyôkele.c

TONDAKA MU MISAMU MI TU BAMBULAKA YEHOVA

16. Ntia ndandu wabaka mu misamu mi tu bambulaka Yehova? (Tala mpe kaku “Sarila bio mu bakisa bantu bakaka.”)

¹⁶ Bidia biakaka bia timpeve bi tubakaka, mu bungu dia bantu beka lembo wâ matieleka ma Bibila biena. Mu tifwani, binzonzi bieto bia lumingu, mitu-diambu miakaka na video za jw.org na mikanda mi tukabaka, mu bungu dia bantu balembolo Mbangi za Yehova biena. Kâ ni bu sa ti ni bo we, ndandu mpe tubakaka mu misamu mio. Luzolo lweto mu bungu dia Yehova mikurisaka na timinu tieto mu Zu diandi. Beto mpe mibakisaka mu zaba longesa matieleka ma mfunu kwe bantu bakaka.—Mik. 19:7.

17. Ntia ntangu tufweti dimbitilaka mu misamu mia ntete mi talongoka mu Bibila?

¹⁷ Bu twe Mbangi za Yehova, nsayi yibâka neto bu tubakulaka misamu mia môna mu Bibila. Kâ mpe, tonda tutomo tondaka mu bungu dia misamu mia ntete mi talongoka mu Bibila miasa ti twiza mu matieleka. Tala ti tuturiri mabanza meto mu mpila’eto ya mwina misamu kani tatûla mo mu malongi ma organizasio ya Yehova, tufweti bambuka na kuluka kwakwansoni nani ta twarisa organizasio yo—ni Mvangi’eto Yehova. Beto peleko muntu wutuzololo bu tubwabanaka na mpasi, tufweti bâ na luvivululu, mpe tufweti yindula mu bungu dia nti Yehova kata bikila mpasi zo zatutûrila. Mpe bu tusongelaka bwe tusarila ntangu na mbongo zeto, tufweti bambuka ti mu bilumbu bia mansukina twena. Tabîkeno misamu mi tu bambulaka Yehova miatatamana mu tu tindisa, mu tu hana luhemo na ndwenga.