Watchtower BIBLIOTEKE YA MU INTERNET
Watchtower
BIBLIOTEKE YA MU INTERNET
Kilari
  • BIBILA
  • MIKANDA
  • TUKUTAKANU
  • w25 Ngonda ya 8 bin. 14-19
  • Tambula mulemvo wa Yehova

Ka kwena video ko yi bawukiri mu nsololo yi siri.

Video yibwabwane na nkwamusu.

  • Tambula mulemvo wa Yehova
  • Nzo ya Zangama ya Munkengi yita samuna timfumu tia Yehova (Ndongokolo)—2025
  • Mitu-diambu mia fioti
  • Mukanda wu delakane
  • MU BUNGU DIA NTI TUFWETI TAMBULA MULEMVO WA YEHOVA?
  • NTI BILENDI TU BAKISA MU TAMBULA MULEMVO WA YEHOVA?
  • KUZIMBAKANANDI MIO MI BAMBUKILAKA YEHOVA
  • TATAMANA MU WISA MUTIMA’AKU
  • Mulemvo wa Yehova—Bwe wuta zolo tâ mu bungu dia nge
    Nzo ya Zangama ya Munkengi yita samuna timfumu tia Yehova (Ndongokolo)—2025
  • Yehova—Muntu wuyôkele mu tifu tia lemvokela
    Nzo ya Zangama ya Munkengi yita samuna timfumu tia Yehova (Ndongokolo)—2022
  • Bambuka ti Yehova “Nzambi ya moyo” yena
    Nzo ya Zangama ya Munkengi yita samuna timfumu tia Yehova (Ndongokolo) (2024)
  • Yehova zololo ti bantu babansoni basoba mabanza
    Nzo ya Zangama ya Munkengi yita samuna timfumu tia Yehova (Ndongokolo) (2024)
Biakaka
Nzo ya Zangama ya Munkengi yita samuna timfumu tia Yehova (Ndongokolo)—2025
w25 Ngonda ya 8 bin. 14-19

TIMOKO TIA NDONGOKOLO 34

MUKUNGA 3 Ngolo zeto, tivuvu tieto, lukwikulu lweto

Tambula mulemvo wa Yehova

“Nge walemvokele kuba diani, masumu mani.”—Mik. 32:​5, NWT.

MABANZA MA NGURI

Mu bungu dia nti tufweti tambula mulemvo wa Yehova, mpe bwe Bibila dituhanaka lukwikulu ti Yehova bantu bo bafungulaka masumu mawu kalemvokelaka.

1-2. Yehova nti kasaka mu ntangu yi tufungulaka masumu meto? (Tala mpe tifwani.)

MUTINU Davide wazaba mpasi zitunatinaka masumu ma tayirika mu ntama. (Mik. 40:12; 51:3; suscription) Masumu ma manene mamingi kayirika mu luzingu lwandi. Wafungula masumu mandi na bunsungu bwabwansoni, mpe Yehova wamulemvokela. (2 Sam. 12:13) Ntiangu Davide kayizi zaba, ntia tidzunu tubakaka mu ntangu Yehova yi katulemvokelaka.—Mik. 32:1.

2 Ntiana Davide, beto mpe tulendi zaba tidzunu tinataka mulemvo wa Yehova. Nsayi yayingi ye neto mu zaba ti, Yehova wakubama wena mu lemvokela masumu meto—ni bu sa ti ma manene mena—tala ti tulombele mulemvo na bunsungu bwabwansoni, tufunguri masumu meto kwe bakuluntu, mpe tusiri miamiansoni mi tulenda mu lembo vutu karila masumu mo! (Bin. 28:13; Bis. 26:20; 1 Za 1:9) Nsayi ye neto mu zaba ti, Yehova bu katulemvokelaka, ka vutu’â tu landaka mambu ko, mpe ka vutu’â tu sembaka ko mu bungu dia masumu ma tayirika!—Ezk. 33:16.

Mutinu Davide zakale ku nzo’andi, tisalulu tia mizike kata sika mpe tanga kata tanga.

Mutinu Davide mikunga miamingi katsoneka mizonzelaka mulemvo wa Yehova (Tala paragrafe 1-2)


3-4. Mpangi yimosi ya yikento bwe keri timonaka ha manima ma bateme mandi, mpe nti tuzonzela mu timoko ti?

3 Ntangu zakaka, musamu wa mpasi wubaka kwe bantu mu tambula ti Yehova bawu kalemvokele. Tataluzuleno tifwani tia Jennifer wakurila mu matieleka. Mu buntwenia bwandi wayizi batika mu yirika misamu mia mbi mu mansweki. Mvula zazingi ha manima, wakâla kwe Yehova mpe wasa miamiansoni mi kalenda mu baka bateme. Yandi têle: “Luzingu lwani lwa ntama, lwa fuluka lweri mu nsatu ya baka mbongo zazingi, ya sa bunsuza, ya nwa malavu mamingi na ya vulu bakaka nkesi. Nazaba ti Bibila mbo ditâka ti, mu nzila ya mukayulu wa Yezu Kristo Yehova lenda die nandi dia lemvokela masumu meto. Kâ, ka ndieri’â lendaka ko mu tambula mu mutima’ani ti Yehova wakundemvokele.”

4 Ngano ntangu zakaka, mpasi wubaka kwe nge mu tambula ti Yehova walemvokela masumu ma wasa mu ntama? Yehova zololo ti, ntiana Davide, beto mpe tabaka tidzunu titunatinaka tiari tiandi tia lemvokela. Mu timoko ti mbo tulongoka mu bungu dia nti tufweti tambula luzolo lwa Yehova, na misamu mitubakisa mu sila bo.

MU BUNGU DIA NTI TUFWETI TAMBULA MULEMVO WA YEHOVA?

5. Satana nti kata zolo takwikila? Hana tifwani.

5 Tamana tambula mulemvo wa Yehova, mbo tusa keba mu lembo bwa mu mutambu wumosi wa Satana. Kuzimbakanandi, Satana mbo kasa mio miamiansoni mi kalenda mu ku kabakasa mu sarila Yehova. Mu lungisa kani diandi, Satana zololo ti takwikila ti masumu meto, Yehova ka lendi’â kalemvokela mo ko. Tataluzuleno tifwani tia mpangi yeri mu timvuka tia ku Korente, yi badukisa mu timvuka mu bungu dia musamu wa bunsuza. (1 Kor. 5:​1, 5, 13) Ha manima, bu kafungula masumu mandi, Satana wazolo ti bampangi mu timvuka balembo mu bwana mu mpila ya mbote mpe bakala mu mu lemvokela. Satana wadinga mpe ti, mpangi yo yasa disumu, ‘[yabwa] mu bunsana bwa yôka,’ wu zololo tâ kabanza ti ka bafweti’â mu lemvokela ko, ngatu kalembo vutu sarila Yehova. Satana ka sobela kani diandi na nsalulu zandi ko. Kâ ‘ka tuzimbakane’â mbanzulu zandi ko.’—2 Kor. 2:​5-11.

6. Nti tulendi sa mu lembo vutu bâ na tiari mu bungu dia masumu meto?

6 Tamana tambula mulemvo wa Yehova, ka tuvutu’â mona mpasi za masumu meto ko mpe mbo tubâ mu nsayi. Bu tusaka disumu, mu bunsana tubâka mu bungu dia disumu di tuyirikiri. (Mik. 51:17) Musamu wo wa mbote wena. Ngindu’eto yilendi tu tuma mu yirika misamu mitubakisa mu soba ndiatulu. (2 Kor. 7:​10, 11) Kâ, tamana tatamana mu tûla mabanza meto mu masumu ma tasiri, ni bu sa ti ma tafunguri tulendi kwizi bîka mu sarila Yehova. Kâ, tamana tambula ti Yehova tu lemvokele, tufweti bîka mu bâ mu tiari. Buna mbo tubâ na lenda dia sarila Yehova buna bu kazololo—mu nsayi mpe na ngindu ya mbote. (Kol. 1:​10, 11; 2 Tim. 1:3) Kâ bwe tulendi sa ngatu mutima’eto watambula mulemvo wa Yehova?

NTI BILENDI TU BAKISA MU TAMBULA MULEMVO WA YEHOVA?

7-8. Ntia misamu Yehova katâ kwe Mose mu bungu dia yandi beni, mpe ntia lukwikulu mituhanaka? (Ndukulu 34:​6, 7)

7 Dimbitila mu misamu mia tâ Yehova mu bungu dia yandi beni. Mu tifwani, tataleno misamu mia tâ Yehova kwa Mose ku mongo wa Sinayi.a (Tanga Ndukulu 34:​6, 7, NWT.) Ni bu sa ti Yehova bifu biabingi bieri nandi bia mbote, wasola mu tâ kwe Mose ti Yandi wena “Nzambi ye na tiari tia lemvokela mpe ye na tiari tia mutima.” Ngano Nzambi ya mpila yo, yilendi kala mu lemvokela muntu wuyirikiri disumu mpe wufunguri dio? Kani! Kamana sila bo, mbo kasongela ti, mutima wa ngolo we nandi. Kâ Yehova kena bo ko.

8 Tulendi bâ na lukwikulu ti, kani kabwe Yehova ka sa soba ko. (Mik. 31:5) Buna tulendi kwikila misamu mi katâka. Tala ti musamu wa mpasi wena kwe nge mu bîka mu bâ na lwaka mu bungu dia masumu ma wayirika mu ntama, lendi tiyula: ‘Ngano lukwikulu lwe nani ti Yehova tiari tia lemvokela na tia mutima tie nandi, mpe kani kabwe ka sa yimina mulemvo’andi ko kwe muntu ni muntu wu fungulaka masumu mandi? Buna, ndendi bâ na lukwikulu ti, meno kalemvokele.’

9. Mikunga 32:5 nti yita tu longesa mu mpila Yehova yi kalemvokelaka masumu meto?

9 Dimbitila mu mio mi tâka Bibila mu wo wutariri mulemvo wa Yehova. Mu tifwani tataleno mu ntia mpila titsoniki Davide kazonzela mulemvo wa Yehova. (Tanga Mikunga 32:​5, NWT.) Yandi watâ: “Nge walemvokele kuba diani, masumu mani.” Ntêlo ya Hebre yi basarila mu zonzela “mulemvo” mu verse yi, yizololo tâ “katula” peleko “nata.” Yehova bu kalemvokela Davide, weri ntiana’eti wakatula masumu mandi mpe wanata mo. Buna Davide watomo bâ mu nsayi mu bungu ti wazaba ti Yehova watomo mu lemvokela. (Mik. 32:​2-4) Beto mpe tulendi bâ na nsayi ya mpila yo. Bu tufungulaka masumu meto na bunsungu bwabwansoni, ka tuvutu’â bâ na nsatu ko ya tatamana mu bâ na lwaka mu bungu dia masumu ma tu lemvokele Yehova.

10-11. Ntêlo ya bâ “wakubama mu lemvokela” nti yita tu longesa mu Yehova? (Mikunga 86:5)

10 Tanga Mikunga 86:​5, NWT. Mu verse yi, Davide zonzele Yehova ntiana muntu we “wa kubama mu lemvokela.” Wuzololo tâ Yehova ka kulu’â bakaka nkesi ko bu tusaka masumu. Tîmina dibâka nandi dia tu lemvokela bu tufungulaka masumu meto. Mu bungu dia nti kasilaka bo? Lweka lwa nzole lwa verse yo lutêle: “Luzolo lwa kwikama lwa sampa lwe naku kwe bantu babansoni bakutâka mbila.” Ntiana bu tamweni wo mu timoko tiayôkele, luzolo lwandi lwa kwikama mbo lumutumaka mu bâ na tindiku tia ngolo na bisari biandi bia kwikama. Mu luzolo lwandi lwa kwikama, ‘mbo katomo lemvokela’ bô babansoni bafungulaka masumu mawu. (Iza. 55:​7, na note) Tala ti musamu wa mpasi wena kwe nge mu tambula mulemvo wa Nzambi, lendi tiyula: ‘Ngano lukwikulu lwe nani ti Yehova wakubama wena mu lemvokela bô babansoni bafungulaka masumu mawu mpe bamusambilaka mu baka mulemvo’andi? Buna lendi bâ na lukwikulu ti, nge mpe kalemvokele bu wamulombele mulemvo mu bungu dia masumu maku.’

11 Tulendi baka lutindusu mu bungu nti tuzebi ti Yehova beto katomo bakulaka. (Mik. 139:​1, 2) Tataluzuleno misamu mia tâ Davide, mu mukunga wakaka, milendi tu bakisa mu tambula mulemvo wa Yehova.

KUZIMBAKANANDI MIO MI BAMBUKILAKA YEHOVA

12-13. Tintwari na Mikunga 103:​14, ntia musamu Yehova kabambukilaka mpe nti wumutumaka mu sa?

12 Tanga Mikunga 103:14. Davide zonzele Yehova ntiana muntu ‘wubambukaka ti beto mfumfuta kwa twena.’ Ni mu ntêlo yo, Davide kabangula mosi wa misamu misaka ti Yehova kabâ wakubama mu lemvokela masumu ma bisari biandi bia kwikama, bifungulaka masumu mawu. Yandi têle ti Yehova mbo kabambukaka ti beto mfumfuta kwa twena, wuzololo tâ, zebi ti bantu ba masumu kwa twena, makuba tutâka ntangu zazansoni mpe ka twena ba lunga ko. Mu tomo wa bakula, tatomo’eno taluzula nzonzolo ya sarila Davide.

13 Davide têle ti Yehova zebi ‘mwe tayilukulu.’ Yehova mutoto kasarila mu yirika Adame; buna zebi bantu mwe bayiluku mpe nti bie nawu nsatu. Mu tifwani bafweti dia, bafweti sêka mpe bafweti wumuna; ni bu sa ti ba lunga tweri nsatu mpe ni zo kwa zaketi bâ neto. (Mba. 2:7) Kâ Adame na Eva bu bayizi sumuka, bâ muntu wa mfumfuta wayizi bonga nsasa yakaka. Mu bungu ti twena bala bawu, tayizi biarila masumu ma tu tumaka mu yirika misamu mia mbi. Mpe Yehova wa katomono zaba. Davide bu katâ ti Yehova bambuka kabambukaka ti beto mfumfuta kwa twena, mbo keri zolo tâka: mu bungu ti Yehova zebi ti beto ba nkwa masumu kwa twena, makuba tuvulu tâka mpe ka twena ba lunga ko, Yehova mbo katubongelaka na tiari tia mutima ntangu zazansoni. Mu bukufi Davide mbo keri zolo tâka, Yehova mbo kabakulaka ti ntangu zakaka, ka tuyirikaka misamu buna bu kata mia kekolo ko. Bu tutâka makuba, tîmina dibâka nandi mu tu lemvokela bu tufungulaka masumu na bunsungu bwabwansoni.—Mik. 78:​38, 39.

14. a) Bwe Davide kabangurila bunene bwa ndemvokolo ya Yehova? (Mikunga 103:12) b) Nti tulendi longoka mu mpila Yehova yi kalemvokela Davide? (Tala kaku “Bwe Yehova kalemvokelaka mpe kazimbakanaka.”)

14 Nti bitubakisa mu bâ na lukwikulu ti Yehova beto kalemvokele? (Tanga Mikunga 103:12.) Davide têle ti Yehova bu katulemvokelaka, masumu meto kanataka mala ntiana kwa ‘ku dukilaka ntangu bu kwe mala na ku yidiaminaka.’ Mbuka yidukilaka ntangu, mala yena na mbuka yi diaminaka ntangu; mbuka zo za zole, ka zilendi’â zavukana ko. Musamu wo nti wuta tu longesa mu masumu ma lemvokelaka Yehova? Bu kalemvokelaka masumu meto mbo wubaka ntiana’eti Yehova ma kaneti mala na beto. Buna, ka lendi’â kavutu ma tu bambula ko peleko katusemba mu bungu dia masumu mo.—Ezk. 18:​21, 22; Bis. 3:19.

Bifwani: 1. Mutinu Davide ku muluri tatala Bateseba tayebela. 2. Na fuki kata sambila. 3. Dimbitila kata dimbitila bu kata kwe tsoneke.

Bwe Yehova kalemvokelaka mpe kazimbakanaka

Yehova bu katulemvokelaka, masumu meto kazimbakanaka bu kalembo tu sembaka. (Iza. 43:25) Tabongeno tifwani tia mutinu Davide. Tifwani tiandi tisongele ti luzingu lweto lulendi bâ lwa mbote ni bu sa ti masumu ma manene tayirika.

Davide masumu ma manene kayirika, mu tifwani bunsuza kasa mpe muntu kahondesa. Kâ mu bungu ti wafungula masumu mandi na bunsungu bwabwansoni, Yehova wamulemvokela. Davide watambula nsembolo, wasoba ndiatulu’andi, mpe ha manima watatamana mu sarila Yehova.—2 Sam. 11:​1-27; 12:13.

Ha manima Yehova watâ kwe Salomo: “Diatila ha matu mani, ntiana bwa diatila Davide tata’aku mu mutima wa mukaka na bunsungu.” (1 Mit. 9:​4, 5) Yehova ka zonzela masumu ma Davide ko. Kâ Yehova wazonzela Davide ntiana muntu wa sungama mpe weri na buderede. Mpe Yehova “watomo mu sakumuna” mu bungu dia kwikama kwandi.—Mik. 13:6.

Ntia malongi tuta baka? Yehova bu kalemvokelaka, ka tûlaka mabanza mandi ko mu masumu ma kalemvokele, kâ mu misamu mia mbote mi kalendi sakumuna. (Ebr. 11:6) Buna ka twena na nsatu ko ya tatamana mu bambukila masumu ma tayirika mu ntama, Yehova ma kasola mu zimbakana.

15. Nti tulendi sa tala ti lwaka luvulu bâka neto mu bungu dia masumu ma tayirika mu ntama?

15 Bwe misamu mia tâ Davide mu Mikunga 103 milendi tu bakisa mu tambula mulemvo wa Yehova? Tala ti lwaka luvulu bâka neto mu bungu dia masumu ma tayirika mu ntama, tulendi tiyula: ‘Ngano mbo nizimbakanaka musamu wu bambukilaka Yehova, wuzololo tâ ngano mbo nizimbakanaka ti Yandi mbo kabambukaka ti muntu wa masumu ndiena, mpe mbo kakundemvokela tala ti mfunguri masumu mani na bunsungu bwabwansoni? Ngano mbo ni bambukilaka mpe misamu mi zimbakana Yehova, wuzololo tâ ngano masumu ma kakundemvokela nivutu bambukilaka mpe mbo nibambukaka ti ka vutu’â ku nsemba ko mu bungu dia masumu mo?’ Yehova ka vutu’â kala ko mu masumu ma tayirika mu ntama. Beto mpe tufweti sila bo. (Mik. 130:3) Tamana tambula mulemvo wa Yehova, mbo tutilemvokela beto beni mpe mbo tutatamana mu kwenda ku matu.

16. Hana tifwani tita songela ti musamu wa mbi wena mu tatamana mu tûla mabanza mu masumu Yehova ma katulemvokela. (Tala mpe tifwani.)

16 Tabongeno tifwani timosi. Muntu bu kanataka kaminio lendi tala mu rétroviseur mu tala misamu mita yôka ku manima. Ntangu zakaka lendi tala mu rétroviseur; kâ mbo wubâ musamu wa mbi tala ti mu rétroviseur kwa kata tatamana mu kwe tari. Ngatu kanata mu mpila ya mbote, fweti tatamana mu tala ku matu mandi. Mpila mosi mpe, ka wena musamu wa mbi ko mu dimbitilaka ntangu zakaka mu misamu mi tayirika mu ntama; wulendi tu bakisa mu sa keba mu lembo vutu mia yirika. Kâ tamana tatamana mu tûla mabanza meto mu misamu mi tayirika mu ntama mpe Yehova mi katulemvokela, tulendi hombesa nsayi’eto mpe ka tuvutu’â sala na ngolo ko mu sarila Yehova buna bu fwanane. Kani tasila bo, tufweti tûla mabanza meto mu tisalu tia Yehova, mu misamu mi katukanisini na mu ntangu yi ‘tulembo vutu bambukila misamu mia yôka.’—Iza. 65:17; Bin. 4:25.

Bakala dimosi dita kwe tari mu rétroviseur mu ntangu yi kata kwe nati mu nzila ye na nzanda virage.

Ntiana muntu wunataka kaminio, wufweti tatamana mu talaka ku matu kani katalaka kwa rétroviseur, mpila mosi mpe beto tufweti tûla mabanza meto mu tusakumunu tuta tu kêla kani tatûla mabanza meto mu masumu ma tayirika (Tala Paragrafe 16)


TATAMANA MU WISA MUTIMA’AKU

17. Mu bungu dia nti tufweti tatamana mu wisa mutima’eto mu luzolo na ndemvokolo ya Yehova?

17 Tufweti bâ na lukwikulu ti Yehova beto kazololo mpe ntangu zazansoni wa kubama wena mu tu lemvokela. (1 Za 3:​19, na note) Mu bungu dia nti? Mu bungu ti Satana mbo katatamana mu ku wisa ti, ka balendi’â bakuzolo ko mpe ka balendi’â bakulemvokela ko. Kani diandi ka disobele’â ko; we nandi wabika mu sarila Yehova. Bu tuta kwe pusane ku mansukina, Satana miamiansoni mi kalenda kasa mu tu kabakasa mu sarila Yehova, mu bungu ti ntangu fioti kwa yisiri nandi. (Nza. 12:12) Ka tumubikandi katununga!

18. Nti lendi sa mu wisa mutima’aku mu luzolo na ndemvokolo ya Yehova?

18 Timoko tiayôkele tiatusongele nti tufweti sa mu bâ na lukwikulu ti Yehova beto kazololo. Timoko ti titusongele nti tufweti sa mu bâ na lukwikulu ti Yehova beto kalemvokele. Mu tifwani, bambuka misamu mia tâ Yehova mu bungu dia yandi beni. Dimbitila mu misamu mia tâ mitsoniki mia Bibila mu bungu dia mulemvo wa Yehova. Kuzimbakanandi ti zebi ti nge muntu wa masumu wena mpe mbo kakubongelaka na tiari tia lemvokela. Mpe bambuka ti, bu kalemvokelaka masumu maku ka vutu’â ma bambukilaka ko. Buna na lukwikulu lwabâ na Davide mu musamu wutariri tiari tia lemvokela tia Yehova, nge mpe lendi tâ: “Matondo Yehova, bu walemvokele kuba diani, masumu mani!”—Mik. 32:5.

NTIA MVUTU HANA?

  • Mu bungu dia nti tufweti tambula mulemvo wa Yehova?

  • Nti bilendi ku bakisa mu tambula mulemvo wa Yehova?

  • Mu bungu dia nti tufweti wisa mutima’eto ti Yehova beto kalemvokele?

MUKUNGA 1 Bifu bia Yehova

a Tala mutu-diambu “Approchez-vous de Dieu : Quand Jéhovah s’est décrit aux humains” mu Nzo ya Zangama ya Munkengi ya 1er mai 2009.

    Mabuku ma Lari (1996-2025)
    Duka
    Kota
    • Kilari
    • Tambika
    • Bima bi zololo
    • Copyright © 2025 Watch Tower Bible and Tract Society of Pennsylvania
    • Misiku mia sarila
    • Misiku mia mansweki
    • Paramètres de confidentialité
    • JW.ORG
    • Kota
    Tambika