Mbongo za tisalu tia Mbangi za Yehova kwe zitûkaka?

Mbongo za tisalu tieto Mbangi za Yehova zivulu za hanaka mu makabu.a Nkela za makabu (boîtes à offrandes) zibâka mu mbuka zeto za nsambululu, na mpila zakaka zi bazonzelaka mu tinima tia makabu tia site’eto. Mu tinima tio, mpila za swaswana ze mô zilendi bakisa bantu mu bonga nzengolo ya hana lubakusu mu tisalu tia mu nza peleko mu mbongo zi basarilaka mu timvuka.

Ka balombaka ko kwe Mbangi za Yehova mu futaka dime, peleko mu hanaka lweka lumosi lwa mbongo za lubaku lwawu. (2 Bisi-Korente 9:7) Ku tukutakanu tweto ka kubâka nsinsani ko, mpe ka bafutaka ko mu kota. Mpila mosi mpe, ka bafutaka bisari bieto ko mu bungu dia bâpteme, bu bazikaka bantu, makwela, na miakaka. Ka tukutakasaka mbongo ko mu nkari, mu kermesses, na mu mikembo miakaka mia mpila yo, peleko ka tulombaka mbongo ko. Nsangu zitariri bantu bahanaka makabu ka tuzonzelaka zo ko. (Matie 6:2-4) Site zeto za Internet na mikanda mieto ka zisaka publicités ko zibutaka mbongo.

Bimvuka biabiansoni rapore ya mbongo zi basarilaka basaka ngonda zazansoni ku tukutakanu, ku kwizaka bantu babansoni. Mikanda mitariri mbongo mia bavulu taluzulaka mu tomo bâ na lukwikulu ti makabu ma batomono sarila.​—2 Bisi-Korente 8:20, 21.

Mpila za hanina makabu

• Nkela za makabu: Ku Nzo za Nsambululu, bantu balendi hana makabu ma mbongo, peleko chèques, mu nkela za makabu ze mu Nzo za Nsambululu, za tukutakanu twa tunene, peleko mu mbuka zakaka zi tusilaka tukutakanu.

• Makabu mu Internet: Mu nsi zazingi, bantu balendi sarila tinima tia site tia “Makabu kwe Mbangi za Yehova” mu hana makabu mu nzila ya cartes de credit, cartes bancaires, transferts bancaires, na mpila zakaka za elektronike.b Mbangi za Yehova zakaka mbo zisolaka mu “tûla tima ha ndeko” ngonda zazansoni, bu bakubikaka makabu ma balendi hana bu basarilaka mpila zo.​—1 Bisi-Korente 16:2.

  

• Makabu ma bakubikaka: Mpila zakaka za hanina makabu bantu zilombaka mu toko tikubikila makabu peleko mu baka lutwalusu lwa bantu bakipaka misiku mia luyâlu. Mpila yo ya sarila yilendi nata ndandu mu nsi yi babâka. Bantu babingi bayizi baka ndandu mu nsangu za mbote za hanina makabu ma batikubikilaka–mu luzingu lwa muntu peleko ha manima ma lufwa lwandi. Tala ti makabu waheni mu mpila zi batangumuni ha banda, tukulombele mu monekena biro ya Mbangi za Yehova ya nsi’aku mu baka nsangu zakaka:

  • Comptes bancaires

  • contrats d’asssurance na plans de retraite

  • Nzo peleko tupangu

  • Mikanda mia lupangu na miakaka

  • Testaments

Mu baka nsangu zakaka mu mpila za hanina makabu ze mu tizunga tiaku, tala tinima tia “Makabu kwe Mbangi za Yehova.”