Ngano Mbangi za Yehova bala bawu zitumaka mu ngolo mu bâ Mbangi za Yehova?

Kâni, mu bungu ti muntu yandi beni fweti sola mu sambila Nzambi. (Bisi-Rome 14:12) Mbangi za Yehova mitieno mia Bibila zilongesaka kwe bala bawu, kâ bala bu bakulaka, bawu beni bafweti bonga nzengolo ya bâ Mbangi za Yehova.—Bisi-Rome 12:2; Bisi-Ngalate 6:5.

Ntiana bibuti biabiansoni, Mbangi za Yehova misamu miyôkele bubote mu bungu dia bala bawu bakekoloko. Misamu mi bamonaka ti mbo mibasarisa mu luzingu babalongesaka: Bawu bazololo babâ na lenda dia sarila, mpe bazaba mitieno mitariri ndiatulu na nkwikulu za nsambululu. Mbangi za Yehova lukwikulu lwe nawu ti Bibila luzingu luyôkele bubote dihanaka. Ntiangu basarilaka ngolo mu longesa bala bawu ndiatulu ya mu Bibila mpe ku tukutakanu twa Bakristo ba bakwendaka nawu. (Lubambu 6:6, 7) Muna mwana, bu wukulaka, lendi sola yandi beni tala ti dibundu dia bibuti biandi katambula peleko kâni.

Ngano Mbangi za Yehova bala ba bebe babatisaka?

Kâni. Bibila ka ditambulaka bateme ya bala ba bebe ko. Mu tifwani, Bibila disongele ti ntete babatusu mpe babâ Bakristo, bantu ba mu mbandu ya ntete bayizi wâ nsangu zi babasamunina, bayizi za tambula mpe bayizi soba mabanza. (Bisalu 2:14, 22, 38, 41) Mu batusu, muntu wufweti bâ na mvula zifwanane mu bakula ndongosolo za Bibila, wufweti kwikila mpe wufweti bonga nzengolo ya zinga tintwari na ndongosolo zo. Bima bio mwana bebe ka wulendi’â wasa bio ko.

Bala bu bakwe kuri, kampe mbo babonga nzengolo ya batusu. Kâ, yandi fweti tomo bakula nzengolo yi kata bonga.

Ngano Mbangi za Yehova bala bawu zikumaka tala ti bakariri mu batusu?

Kâni. Mbangi za Yehova mu tiari zibâka bala bu balembo landaka timinu tiawu. Mbo batatamanaka mu ba zolo. Ka ba kwizi’â yambirikaka mwana ko mu bungu ti wu kariri mu bâ Mbangi ya Yehova.

Mwana wa bakala wubatusu bu bamuvwikiri mu mamba. — Muna muntu, mvula ni mvula, fweti bonga nzengolo yandi beni tala ti batusu ka batusu peleko kâni

Mu bungu dia nti Mbangi za Yehova zinatinaka bala bawu mu tisalu tia samuna?

Misamu miamingi misaka ti Mbangi za Yehova zasarilaka bo.a

Bibila kwe bibuti dilombaka balongesaka bala bawu misamu mitariri Nzambi mpe bafweti ba longesa mu mu sarila. (Bisi-Efeze 6:4) Mu bungu ti nsambululu mbo yidingaka mu zonzelaka timinu tieto kwe bantu bakaka, tisalu tia samuna mfunu tiena mu ndongokolo ya timpeve ya mwana.—Bisi-Rome 10:9, 10; Bahebre 13:15.
Bibila bantwenia dilombaka mu “kembela nkumbu ya Mfumu.” (Mikunga 148:12, 13, Bible des Peuples) Mpila ya mfunu ya kembela Nzambi ni mu mu zonzelaka kwe bantu bakaka.b
Bala bu basamunaka tintwari na bibuti biawu, ndandu zazingi babakaka. Mu tifwani, bala mbo balongokaka mu zonza na bantu ba mpila na mpila mpe bifu bia ntalu bakurisaka, ntiana tiari tia mutima, mbote, buzitu na luzolo lwa mutima. Bawu mbo balongokaka mpe mu bakula mu bungu dia nti bakwikilaka mu Bibila.

Ngano Mbangi za Yehova malaki zikembelaka?

Mbangi za Yehova ka zikembelaka Malaki ma mabundu ko na malaki makaka malembo tâka Nzambi nsayi.c (2 Bisi-Korente 6:14-17; Bisi-Efeze 5:10) Mu tifwani, ka tukembelaka malaki ma mbutukulu ko (anniversaires de naissance) na Noele ko, mu bungu ti malaki mango ka matûkaka mu Bibila ko.

Diangana, tuzololo mu yôkesaka ntangu na makanda meto mpe tuzololo tahanaka makabu kwe bala beto. Ka tubikaka bantu bakaka ko peleko tima tiakaka tiatutuma mu yôkesaka ntangu na bantu ba makanda meto peleko mu hana tima kwe muntu. Beto beni tusolaka ntangu ni ntangu mu muvu mu hana makabu kwe muntu.

Tata na mama bata hana bala bawu makabu ma balembolo ba kanisina. — Bibuti bie Bakristo bizololo mu hanaka bala bawu makabu

Bwe bala ba Mbangi za Yehova babongelaka ndongosolo yi babahana?

“Tisalu tia samuna tiakundongese mu zitisaka bantu bakaka, ntono nkwikulu zawu na mpila yi bakumbongelaka. Mpe, bu nisamunaka, bantu misamu miawu na nkwamusu zawu bavulu kunzonzelaka. Buna, kani natûlaka kwa mutima mu misamu miani, nalongekele mu belokelaka lwaka misamu mi monaka bantu ku mutima na mu kipaka nsatu zawu.”—Tara.d
“Bibuti biani ka biakuntuma mu ngolo ko nabâ Mbangi ya Yehova. Vula-vula mbo beri kuntêlaka ti me beni mfweti sola. Ntangu zazansoni zi ndieri yulaka mama mu bungu dia nkwikulu za Mbangi za Yehova, mbo keri kuntêlaka: ‘Ngano wa dingiri mu mikanda?’ buna nayizi tomo dinga misamu miamingi mu mikanda mpe nayizi bâ na lukwikulu ti ni dibundu di ndieri kekoloko; ka diena kwa dibundu dia bibuti biani ko.”—Ellie.
“Kani kabwe ka ndieka’eti banza ko ti tima nihombesaka bu nillembo kembelaka malaki. Bilumbu bia samedi na dimanche, tisalu tiatingi tieri bâka nani ti ndieri saka na Mbangi za Yehova zakaka. Dia tweri diaka, tina na nsaka tweri saka. Ndiku zani za ku lukolo mbo zeri vulu kuntêlaka ti luzingu lwani lwa mbote lweri yôka lwa bawu.”—Melissa.
“Ni bu sa ti ka ndieri’â bakulaka ko mu bungu dia nti tweri lembo kembelaka Noele, ntangu zakaka ndieri banzaka ti tima tita kunkondo. Tima tiakumbakisa mu telamana mbanzulu zango ni mu ntangu bibuti biani bieri tikisaka bantu ntangu zazansoni ku nzo na bantu ba mu kanda. Mbo nita bambuka ti makabu beri ku nganaka.”—Miguel.

a Bala ba Mbangi za Yehova ka bakwendaka mu tisalu tia samuna ko tala ti ka bena na bibuti biawu ko peleko na muntu wakula wa nsungu.

b Bibila ntwenia zazingi dizonzelaka zayizi tâ Nzambi nsayi bu zazonzela nkwikulu zawu kwe bantu bakaka.—2 Mitinu 5:1-3; Matie 21:15, 16; Like 2:42, 46, 47.

c Tala mutu-diambu wa “Mu bungu dia nti Mbangi zi Yehova zilembo kembelaka malaki makaka?”

d Nkumbu zakaka za basobele.