Watchtower BIBLIOTEKE YA MU INTERNET
Watchtower
BIBLIOTEKE YA MU INTERNET
Kilari
  • BIBILA
  • MIKANDA
  • TUKUTAKANU
  • mwbr22 Ngonda ya 3 bin. 1-8
  • Mikanda mu bungu dia “Mukanda wa lukutakanu lwa Luzingu na tisalu”

Ka kwena video ko yi bawukiri mu nsololo yi siri.

Video yibwabwane na nkwamusu.

  • Mikanda mu bungu dia “Mukanda wa lukutakanu lwa Luzingu na tisalu”
  • Mikanda mu bungu dia Mukanda wa lukutakanu lwa Luzingu na tisalu—2022
  • Mitu-diambu mia fioti
  • 7-13 MARS
  • 14-20 MARS
  • 21-27 MARS
  • 28 MARS–3 AVRIL
  • 4-10 AVRIL
  • 18-24 AVRIL
  • 25 AVRIL–1er MAI
Mikanda mu bungu dia Mukanda wa lukutakanu lwa Luzingu na tisalu—2022
mwbr22 Ngonda ya 3 bin. 1-8

Mikanda mu bungu dia Mukanda wa lukutakanu lwa Luzingu na tisalu

7-13 MARS

BIMVWAMA BIA ZU DIA NZAMBI | 1 SAMWELE 12-13

“Lulendo nsoni lufwisaka”

w00-F 1/8 13 par. 17

Lulendo nsoni lufwisaka

17 Ntete, nsalulu ya Sawule ya delakana yeri monekaka. Diangana, kanda dia Nzambi “mu mpasi diabâ,” “diakota mu mfietokoso,” mpe diateketa mu bungu ti mu mpasi dieri. (1 Samwele 13:6, 7) Ka bwena bubi ko mu tekerelaka misamu tala ti wufwanane. Ka tuzimbakanakandi ti, Yehova mitima katalaka mpe zebi mbanzulu zeto. (1 Samwele 16:7) Ntembe kani, Yandi misamu kamona kwe Sawule, mi tulembo monaka mu tinsamu tia Bibila. Ngano lulendo lweri nandi bu kakondo luvivululu? Kampe Sawule wafwema, yandi, mutimu wa Israele yayansoni, bu keri kêlaka mbikuri ya nuna yalembo bâ na manzangu. Diangana, yandi wamona ti Samwele bu keri lembo kulu tûlaka, nswa wa bâ nandi mu yirika misamu na mu kolamana misiku mi bamuhana. Ngano nti biatûla? Samwele ka sîka nsalulu ya Sawule ko. Yandi wasemba Sawule bu katâ: “Timfumu tiaku ka tizingila ko [. . .] mu bungu ti ka wazitisi’â misamu mia ku lombele Yehova ko.” (1 Samwele 13:13, 14) Lulendo lwavutu fwisa nsoni.

w07-F 15/6 27 par. 8

Tumama kwaku ntalu kwena kwe Yehova

8 Misamu mi tâka Bibila mu mutinu Sawule misongele ti tumama mfunu kwena. Ku mbatukulu Sawule mfumu ya kuluka yeri, mpe wazaba ndilu zandi, ‘wa fioti wabâ ha meso mandi.’ Kâ ha manima, lulendo na mbanzulu za mbi biatwarisa nzengolo zandi. (1 Samwele 10:21, 22; 15:17) Tilumbu timosi, Sawule wakubama mu kwe nwanisa Bafiliste. Samwele wamutêla kamukêla tii bu kakwiza, mu hana mukayulu kwe Yehova, mpe kamuhana misiku miakaka. Kâ, Samwele kasarila manzangu ko ntiana bu katâ. Buna bantu babatika mu mwangana. Bu kamona bo, Sawule “wahana mukayulu.” Musamu wo ka watâ Yehova nsayi ko. Samwele bu katûla, Sawule watâ ti yandi wakolama mu bungu ti mbikuri ka sa manzangu ko. Yandi watâ ti ‘misamu miamutuma’ mu hana mukayulu ngatu kalembeka Yehova. Kwe mutinu Sawule, hana mukayulu kwayôka tumama mu musiku wu bamuhana wa kêla Samwele ngatu kahana mukayulu. Buna Samwele wamutêla: “Buzoba wizi sarila. Kuzitisi’â ntumunu ya Yehova Nzambi’aku ko, yi kakutumini.” Bu kakolama kwe Yehova Sawule wahombesa timfumu tiandi.​—1 Samwele 10:8; 13:5-13.

Bimvwama bia timpeve

w11-F 15/7 13 par. 15

Ngano mbo landa lutwalusu lwa Yehova?

15 Ngano bala ba Israele beri banzaka ti muntu bu waketi bâ mutinu mbo waketi bâ wa matieleka yôka Yehova? Tala ti ni buna, hunakana beri tomo hunakanaka! Mpe mbo baketi bwa mu mutambu wa bungungu bwakaka bwa Satana. Bantu bu baketi bâ mitinu miawu, mbo baketi batuma mu tomo sarila biteki. Bantu basarilaka biteki buzoba basarilaka bu babanzaka ti bima​—nzambi zi basarila mu miti na mu matari—​bia matieleka biena, bia nsungu biena, yôka Yehova, Nzambi yilembo monekaka, yayirika bima biabiansoni. Kâ ntiana bwa tâ wo ntumwa Paulo, biteki “bima bia buna” kwa biena. (1 Kor. 8:4) Ka biena na lenda ko dia mona, dia wâ, dia zonza na dia sala. Tulendi bia mona, tulendi bia simba, kâ tala ti tusambiri bio, bungungu tuta landa​—bungungu bulendi tu nata ku mfukulu.​—Mik. 115:4-8.

14-20 MARS

BIMVWAMA BIA ZU DIA NZAMBI | 1 SAMWELE 14-15

“Tumama kuyôkele mukayulu”

w07-F 15/6 26 par. 4

Tumama kwaku ntalu kwena kwe Yehova

4 Mu bungu ti Yehova watuyirika, bima biabiansoni bie neto bia tinsuni ni yandi vwiri bio. Buna, ngano tima tie kô ti tulendi hana kwe Yehova? Yee, tulendi mu hana tima tia nkatika ntalu. Ngano nti biena? Mvutu mu mabanza mata landa tubakila yo: “Mwana’ani sarila ndwenga mpe yangirika mutima’ani, ngatu nahana mvutu kwe wô kuntsotsaka.” (Bingana 27:11) Tulendi hana tumama kweto kwe Nzambi. Ni bu sa ti beto bansoni ka twena na luzingu lumosi ko, mpe ka tabwabana na misamu mimosi ko, bu tutumamaka, beto bansoni tulendi hana mvutu mu misamu mia mbi mia kwikisila Satana kwe Yehova, bu katâ ti bantu ka babâ ba kwikama kwe Nzambi ko mu ntontolo. Ntia mpila bweso bwa nzitukulu!

it-2-F 429 par. 1

Tumama

Ka kwena tima ko tilendi yingasa tumama; tala ti tumama kâni, ka tulendi’â tabaka bweso bwa Nzambi ko. Samwele watâ kwe mutinu Sawule ti: “Ngano Yehova nti bimuyangirikaka, mikayulu mia yoko na miakaka peleko tumama [tifwani tia shama] mu Zu diandi? Tala! Tumama [mpila mosi wirikila] kuyôkele mukayulu, sa keba kuyôkele mafuta ma nkombo.” (1Sa 15:22) Bu tulembanaka mu tumama, Zu dia Yehova tukalaka, mpe mbo tusongelaka ti ka tukwikilaka ko, ka twena na lukwikulu ko, peleko timinu, mu Zu dio, na mu ntûkulu ya Zu dio. Wô lembo tumamaka, kena wa swaswana ko na muntu wusarilaka bunganga, peleko wusarilaka biteki. (1Sa 15:23; fwanakasa Ro 6:16.) Tambula kwa mpamba kulembolo na nsalulu ka kwena salu ko. Bu tulembo yirikaka musamu wu batulombele, kondo kwa timinu na kwa buzitu tusongelaka kwe Wô tuheni misiku. (Mt 21:28-32) Bô basukinaka kwa mu wâ matieleka ma Nzambi na mu tambula mo mabanza, kâni bayirika misamu mi balombaka, hunakana bahunakanaka bawu beni mu mbanzulu za bungungu, mpe ka babakaka tusakumunu ko. (Zk 1:22-25) Mwana Nzambi watâ ti bantu baketi yirika misamu mpila mosi na mi babalombaka, kâ mu mpila ya mbi, na mu mbanzulu za mbi, kani kabwe ka baketi’â kota mu Timfumu ko, kâ mbo baketi ba kala.​—Mt 7:15-23.

Bimvwama bia timpeve

it-1-F 598

Tiari tia mutima

Bu tubikaka batutuma mu songela tiari tia mutima tilembolo delakana na luzolo lwa Nzambi, misamu mia mpasi milendi tu tûrila. Yo ni ndongosolo ya misamu miatûrila mutinu Sawule. Ntangu yafwana ya lungisa mfundusu ya Nzambi kwe Ba-Amalekite, kanda dia ntete dianwanisa kanda dia Israele, ha manima ma ndukulu’awu ku Ezipte. Sawule bamuhana ntumunu ya lembo ba fwila tiari. Kâ, bala ba Israele bu bamusa tiya, Sawule walembana mu tomo lungisa ntumunu ya Yehova. Dieka bo, Yehova wamukala ngatu kalembo vutu bâ mutinu. (1Sa 15:2-24) Bu tusarilaka buderede bwa nzila za Yehova, mpe bu tutoko dingaka mu bâ ba kwikama kwe Yandi, ka tuhengama ko ntiana Sawule, mpe katuhombesa bweso bwa Nzambi ko.

21-27 MARS

BIMVWAMA BIA ZU DIA NZAMBI | 1 SAMWELE 16-17

“Muzingu Yehova vwiri wo”

wp16.5-F 11 par. 2-3

“Muzingu Yehova vwiri wo”

Davide wawisa Sawule bu kamuzonzela misamu miayôka ha kati dia yandi na ngo-mbulu, na urse. Ngano watisîka? Kâni. Davide wazaba bwe kanungina bibulu bio bia sangi. Yandi watâ: “Yehova, wakunkûla ha moko ma ngo-mbulu na ma urse, ni Yandi kunkûla mu koko kwa Filiste yo.” Mu bungu ti ka bâ na musamu wu katâ ko, Sawule wavutula: “Yenda, mpe bika Yehova kabâ na nge.”​—1 Samwele 17:37.

Ngano zololo wabâ na timinu mpila mosi na Davide? Zaba ti timinu tiandi mu Nzambi ka tiabâ tia mpamba ko. Timinu tiandi mu luzabu na misamu mi kabwabana na mio tiasikamana. Yandi wamona ti Yehova Munkengi wa luzolo weri, mpe ni Yandi lungisaka makani mandi. Tala ti tuzololo tabâ na timinu tia ngolo, tufweti tatamana mu longoka mu zaba Nzambi ya Bibila. Bu tukwe sariri luzabu lo mu luzingu lweto, mbo tubaka ndandu mpe mbo tuyika timinu tieto ngolo.​—Bahebre 11:1.

wp16.5-F 11-12

“Muzingu Yehova vwiri wo”

Bwawu bu mpe, mvutu ya Davide timinu tia ngolo yisongelaka. Banzeno’eti mwana bakala wô wuta kwaya kwe Goliate: “Kwe meno ta kwiza na mbele ya muzingu, na dionga, mboko na munsoma (javelot), kâ meno kwe nge nita kwiza na nkumbu ya Yehova wa binwani; Nzambi ya binwani bia Israele yi watsotsele.” Davide wazaba ti ngolo na binwanunu bia muntu wo ka biabâ salu ko. Goliate ka zitisa Yehova ko, mpe Yehova mvutu kaketi mu hana. Ntiana bwa tâ Davide, “muzingu Yehova vwiri wo.”​—1 Samwele 17:45-47.

Davide kabâ na meso ma fwa ko; mutela wa Goliate na binwanunu biandi bia keri monaka. Kâ, ka bâ na bunkuta ko. Yandi kasa ntiana Sawule na bantu bandi ko. Davide ka tifwanakasa na Goliate ko, kâ wafwanakasa Goliate na Yehova. Na mutela’andi wa wula wa 2,90m, Goliate wa zangama wabâ, yôka bantu bakaka; kâ bwe tulendi tâ bamana mu fwanakasa na Mfumu Yatomo Zangama ya nza? Diangana, ntiana muntu ni muntu, yandi wa nkatika wa fioti kwa wabâ—mpe Yehova lenda diabâ nandi dia mu fukisa!

wp16.5-F 12 par. 4

“Muzingu Yehova vwiri wo”

Lumbu ti, bisari bia Nzambi ka binwanaka mizingu ko. Ntangu ya nwana mizingu yayôka. (Matie 26:52) Kâ, tulendi landa timinu tia Davide. Ntiana yandi, tufweti monaka Yehova ntiana muntu wa matieleka​—ntiana Nzambi ya yimosi yi bafweti kunda, mpe yi bafweti tîna. Ntangu zakaka, tulendi banza ti ba nkatika ba fioti twena bu tutifwanakasa na misamu mieto; kâ misamu mieto mia nkatika mia fioti miena tamana mia fwanakasa na ngolo za Yehova. Tala ti tusolele Yehova kabâ Nzambi’eto mpe tala ti tubêle na timinu mu Yandi ntiana Davide, ka kwena nkwamusu ko, peleko misamu mitutâ bunkuta. Ngolo za Yehova ka zilendi’â zalembana tima ko!

Bimvwama bia timpeve

it-2-F 905-906

Sawule

Bu bamana tumba Davide mu bâ mutinu wa Israele, mpeve ya Yehova yadûka mu Sawule. Buna “mpeve ya mbi yatûka kwe Yehova yamukwamisa.” Mu bungu ti Yehova wamukatula mpeve’andi, wahana nzila kwe mpeve ya mbi yakota mu Sawule, bu yamukatula tidzunu, mpe bu yanata nsobolo za mbi mu mbanzulu zandi, na mu mabanza mandi. Bu kakolama kwe Yehova, Sawule wasongela mbanzulu za mbi, mpe mpeve ya Nzambi ka yeri’â vutu mu kengerelaka ko, ka yeri’â mpe vutu mu hanaka ngolo ko za telamana musamu wo. Dieka bo, mu bungu ti Nzambi wahana nzila kwe “mpeve ya mbi” yayingasa mpeve’andi mpe yakwamisa Sawule, “mpeve ya mbi yatûka kwe Yehova” batâ yo, mpe bisari bia Sawule batâ yo “mpeve ya mbi ya Nzambi.” Mu malongi ma mu hana tisari tiandi timosi, Sawule walomba kwe Davide mu bâ titangi tia mikunga mu timfumu tiandi ngatu kamulembeka mu ntangu “mpeve ya mbi” yeri mu kwamisaka.​—1Sa 16:14-23; 17:15.

28 MARS–3 AVRIL

BIMVWAMA BIA ZU DIA NZAMBI | 1 SAMWELE 18-19

“Tatamana mu bâ wa kuluka bu lendaka misamu”

w04-F 1/4 15 par. 4

Sikirilaka mpeve ya Nzambi misamu bu misobaka

4 Ntangu fioti ha manima, muvungi wo wa ntwenia wayizi bâ nsangu mu nsi yayansoni. Batâ Davide mbila mu tangaka mikunga mu bungu dia mutinu. Davide wahonda Goliate, muntu wa zangama, wu beri tînaka kwe binwani bia Israele biazaba muzingu. Bu bamusola mu bâ mfumu ya binwani, Davide wanunga mizingu miamingi kwe Bafiliste. Bantu bamuzolo. Bawu batanga mikunga mu mu kembela. Mulongi wumosi wa mutinu Sawule wazonzela Davide ntiana “muntu wazaba mu sika” Arpe, kâ mpe ntiana “muntu wa ngolo na wa butindi, muntu wa muzingu, muntu wuzonzaka na mayela, na muntu wu batomo sala.”​—1 Samwele 16:18; 17:23, 24, 45-51; 18:5-7.

w18.01-F 28 par. 6-7

Mona luswaswanu ha kati dia bantu

6 Bantu bakaka luswaswanu lubâka nawu mu bungu ti ba toma bêna, ngolo ze nawu, nsangu bêna, bazebi tanga mikunga peleko bantu bakaka babasaka nsangu. Davide kabâ kwa na tima timosi ko ha kati dia bima bio; biabiansoni biabâ nandi. Kâ yandi watatamana mu bâ wa kuluka mu luzingu lwandi. Mu tifwani, bu kahonda Goliate, bweso bwabâ nandi bwa kwela mwana wa mutinu Sawule; kâ yandi watâ: “Ngano meno ni nani, kanda diani ni banani, kanda dia tata’ani ku Israele ngatu meno nabâ buko bwa mutinu?” (1 Sam. 18:18) Nti biamubakisa mu tatamana mu bâ wa kuluka? Davide wazaba ti tala ti bifu bia mbote bia bâ nandi, lenda na bweso, ni mu bungu ti Nzambi ‘wa kuluka wena’ mpe wamusila mutima. (Mik. 113:5-8) Davide wazaba ti bima biabiansoni biabâ nandi kwe Yehova biatûka.​—Fwanakasa 1 Bisi-Korente 4:7.

7 Ntiana Davide, bwawu bu bisari bia Yehova ngolo bisarilaka mu bâ ba kuluka. Nsayi yi baka neto mu zaba ti Yehova, Yandi yôkele mu nza, wa kuluka wena. (Mik. 18:35) Tuzololo tasarila malongi mata landa: “Lwateno mbanzulu za luzolo, za tiari tia mutima na za mbote, za kuluka, za bulembami na za luvivululu.” (Kol. 3:12) Mpe tuzebi ti luzolo “ka lutisîkaka ko, ka lwena na lukuta ko.” (1 Kor. 13:4) Kuluka kweto kulendi benda bantu kwe Yehova. Ntiana bakala dilembolo Mbangi ya Yehova dilendi bâ dia lemvoka mu ndiatulu ya mukento’andi, muntu wulendi kwiza kwe Yehova mu bungu dia kuluka kwa bisari biandi.​—1 Pi. 3:1.

Bimvwama bia timpeve

it-2-F 671-672

Mbikuri

Tala ti mpeve ya Yehova yeri solaka bambikuri, ka wuzolo’â tâ ko ti ntangu zazansoni mu ngolo za mpeve yo beri zonzelaka. Mpeve ya Nzambi yeri ‘ba bwilaka’ mu ntangu ya fwanana, mu ba zabikisa nsangu zi baketi tâ. (Eze 11:4, 5; Mika 3:8) Weri ntiana bawu beri bakaka nsikumusu (courant) yeri ba tumaka. (1Sa 10:10; Yer 20:9; Am 3:8) Misamu mia nzitukulu beri yirikaka, mpe ntembe kani, mpila ya bâ nawu ya zonzela na mbêlo yeri songelaka ngolo na mabanzulu za nzitukulu. Kampe, wusongele nsasa ya nzonzolo ya “diatila ntiana bambikuri.” (1Sa 10:6-11; 19:20-24; Yer 29:24-32; fwanakasa Bis 2:4, 12-17; 6:15; 7:55.) Mu bungu ti batûla mutima mu tisalu tiawu, butindi bwabâ nawu na luhemo, kampe ndiatulu yabâ nawu yabâ ya nzitukulu kwe bantu bakaka, yalembo bâ ya dekakana. Mu tifwani, mabanza ma hana mbikuri yimosi kwe mfumu za binwani, bu batumba Yehu. Kâ, bu babakula ti mbikuri yeri, batambula nsangu zandi na mabanza ma delakana. (2Mi 9:1-13; fwanakasa Bis 26:24, 25.) Sawule bu keri kwe landi Davide ‘wadiatila ntiana mbikuri,’ wakatula binkuti, wazakala ha mutoto timpene, mpe “wabâ bo tilumbu tia mukaka na mpimpa ya mukaka,” kampe ntangu ya dioka Davide. (1Sa 19:18–20:1) Ka tufweti’â tabanza ko ti bambikuri timpene beri vulu kwe yende, mu bungu ti tinsamu tia Bibila ka titâka bo ko. Mu binsamu biole biakaka, mbikuri yayenda timpene na mabanza ma delakana mu zabikisa lweka lwa mbikululu’andi. (Iz 20:2-4; Mika 1:8-11) Ka batâka ko mu bungu dia nti Sawule kabâ timpene, tala ti ka mu mu monekesa ntiana muntu wa mpamba ko, walembo vutu sala na binkuti bia timfumu, na ngolo za telamana lutumu na ngolo za Timfumu tia Yehova; peleko ni mu zonzela musamu wakaka.

4-10 AVRIL

BIMVWAMA BIA ZU DIA NZAMBI | 1 SAMWELE 20-22

“Bwe tubêla ndiku ya mbote”

w19.11-F 7 par. 18

Tunga tindiku tia ngolo ntete nsuka yiza

18 Lumbu ti, mpangi zeto ntontolo zazingi zibwabanaka na zo. Mu tifwani babingi bamonaka mpasi mu bungu dia katastrofe za nza peleko zi tulumunaka bantu. Katastrofe za mpila yo bu zibwaka, bakaka ha kati dieto balendi bwana mpangi zawu ze mu mpasi ku nzo zawu. Bakaka mpe balendi ba hana lubakusu lwa mbongo. Kâ beto bansoni tulendi lomba kwe Yehova kababakisa. Mpe bu tuwâka ti mpangi ye mu bunôkena, ka tuzabaka ko nti tusa mpe bwe tutâ. Kâ beto bansoni tulendi mu natina lubakusu mu mpila zazingi. Mu tifwani tulendi dinga mu yôkesa ntangu na yandi, tulendi mu wâ na tiari mpe tulendi mu tangila verse yi tutomono zolo. (Iza. 50:4) Musamu wuyôkele mfunu, ni mu bâ na mpangi zeto mu ntangu yi babaka neto nsatu.​—Tanga Bingana 17:17.

w08-F 15/2 8 par. 7

Diatila mu nzila za Yehova

7 Nzambi beto kalombaka tabâ ndiku zi bafweti sikirila. (Bin. 17:17) Yonatane mwana wa mutinu Sawule wayizi bâ ndiku ya ngolo ya Davide. Bu kawâ ti Davide wahonda Goliate, “Yonatane wayizi bâ nkatika ndiku ya Davide, mpe wamuzolo ntiana yandi beni.” (1 Sam. 18:1, 3) Yonatane mpe wayizi lwengesa Davide ti Sawule weri dingaka mu mu honda. Davide wadioka mpe Yonatane wa ye mu monekena mpe basa luwawanu ba bole. Yonatane waketi fwa bu kazonzela Davide kwe Sawule, kâ musamu wo ka wakabakasa ndiku za zole ko mu vutu monana na mu singasa tindiku tiawu. (1 Sam. 20:24-41) Tilumbu tia mansukina ti bamonana, Yonatane watindisa Davide “mu bungu dia Nzambi.”​—1 Sam. 23:16-18.

w09-F 15/10 19 par. 11

Lunda bindiku mu nza yikondolo luzolo

11 Bâ wa kwikama. Salomo watsoneka ti: “Nkatika ndiku ntangu zazansoni yisongelaka luzolo, mpe mpangi yena yabutuka mu bungu dia ntangu za mpasi.” (Bin. 17:17) Kampe mu ntangu yo, tindiku tia tata’andi na Yonatane keri banzaka. (1 Sam. 18:1) Mutinu Sawule wadinga ti mwana’andi Yonatane wabâ mutinu wa Israele ha manima mandi. Kâ Yonatane watambula ti Yehova katumba Davide mu bâ mutinu. Yonatane ka bâ ntiana tata’andi Sawule ko weri silaka Davide timbanda. Yandi keri’â fwemaka ko mu mukembo wu beri hanaka kwe Davide. Ka yizi’â kwikila bungungu bweri tâka Sawule mu bungu dia Davide ko. (1 Sam. 20:24-34) Ngano beto mpe ntiana Yonatane twena? Ndiku’eto bu yibakaka madema, ngano nsayi yibâka neto mu bungu dia yandi? Bu kakotaka mu ntontolo, ngano lutindusu na lubakusu tumunatinaka? Tala ti tuwîri misamu mia mbi mu yandi, ngano manzangu ma bâka neto mu kwikila mio? Peleko, ntiana Yonatane, ndiku’eto tunwaninaka na kwikama kwakwansoni?

Bimvwama bia timpeve

w05-F 15/3 24 par. 4

Misamu mia nguri mia mukanda wa 1 Samwele

21:12, 13. Yehova zololo ti tasarila mbanzulu zeto na lenda dieto mu telamana misamu mia mpasi. Zu diandi, lenda dia swasikisa dituhanaka, luzabu na lenda dia dimbitila. (Bingana 1:4) Lubakusu tubakaka mpe lwa bakuluntu ba mu timvuka.

18-24 AVRIL

BIMVWAMA BIA ZU DIA NZAMBI | 1 SAMWELE 23-24

“Kêla Yehova na luvivululu”

w04-F 1/4 16 par. 8

Sikirilaka mpeve ya Nzambi misamu bu misobaka

8 Davide wakala mu yirika mbi kwe Sawule. Na timinu, na luvivululu wabika musamu ha moko ma Yehova. Mutinu bu kaduka mu bulu dia matari, Davide wamutêla: “Yehova kabâ mfundisi ha kati dia nge na meno; mpe Yehova fweti kukârisila mbi mu bungu dia meno, kâ meno ka nikunangunina koko kwani ko.” (1 Samwele 24:12) Yandi wazaba ti Sawule ka bâ na mpemba ko, kâ ka mu kârisila mbi ko; ka dinga ko mpe mu mu finga, peleko mu mu zonzela mu mpila ya mbi. Mbala zazingi mu luzingu lwandi, Davide ka yizi’â dinga ko mu kârisa mbi. Yandi wasikirila Yehova mu delakasa misamu.​—1 Samwele 25:32-34; 26:10, 11.

w04-F 1/6 22-23

Ngano misamu miaku mitwarisaka luzingu lwaku?

Wa ntatu, kani tasarila mpila zilembolo delakana na Bibila mu sobesa musamu’eto, tufweti sikirila Yehova. Mulongoki Zaki watsoneka: “Kâ, bika tifu tia korela tialungisa tisalu tiandi ngatu lwabâ ba lunga, mpe ka lubândi na matona mu misamu miamiansoni, beno ka lukondo tima.” (Zaki 1:4) Tufweti hana nzila ku tifu tia korela “mu lungisa tisalu tiandi” bu tubika ntontolo zenda tii ku nsuka, kani tasarila mpila zilembolo delakana na Bibila mu sukisa zo. Buna, timinu mu ntontolo tikotaka mpe toma titomaka, mpe lubakusu lu lunataka lwa lumonekaka. Yozefe na Davide tifu tia korela tia mpila yo tia bâ nawu. Ka badingaka ko mu yirika misamu mu mpila zaketi fwemesa Yehova. Kâ bayizi dinga mu bakila ndandu mu misamu miawu. Basikirila Yehova mpe babaka tusakumunu twatwingi! Yehova wabasarila mu kûla na mu twarisa kanda diandi.​—Mbatukulu 41:39-41; 45:5; 2 Samwele 5:4, 5.

Beto mpe tulendi bwabana na misamu mi tulendi dingila mu yirikila mu mpila zilembolo delakana na Matsonoko. Mu tifwani, ngano wa nôka wena mu bungu ti kuta baka muntu wukwela ko? Buna, kubwandi mu ntontolo ya kolamana ntumunu ya Yehova ya kwela “kwa mulongoki wa Mfumu.” (1 Bisi-Korente 7:39) Ngano longo lwaku mu mpasi lwena? Buna, kani wabika mpeve ya nza, yitumaka mu hambana peleko mu honda makwela yakutwarisa, telamaneno musamu wo ha timosi. (Malaki 2:16; Bisi-Efeze 5:21-33) Ngano musamu wa mpasi wena kwe nge mu kipa nsatu za kanda diaku mu bungu dia mbaya? Sikirila Yehova, ni mu lembo sarila mpila za mbi peleko za bumbaki mu baka mbongo. (Mikunga 37:25; Bahebre 13:18) Diangana, tufweti sa miamiansoni mi tulenda mu baka ndandu mu misamu mi tubwabanaka na mio, mpe tasarila ngolo mu hana bweso kwe Yehova bwa tu sakumuna. Tufweti bonga nzengolo ya sikirila Yehova. Ni Yandi yirika misamu mieto mu mpila ya lunga.​—Mika 7:7.

Bimvwama bia timpeve

w17.11-F 27 par. 11

Kubikandi na kani tima tiakukatula musendo

11 Tala ti tukurisi luzolo na mbote mu mutima’eto, ka tubâ na timbanda ko. Diangana Bibila ditêle: “Luzolo vivirila luvivirilaka, mpe lwa mbote lwena. Luzolo ka lwena na timbanda ko.” (1 Kor. 13:4) Ngano nti tulendi sa ngatu timbanda tialembo kula mu mutima’eto? Tasarila ngolo mu mona mpangi zeto ntiana bu ba mwinaka Yehova, ntiana binama bia nitu yimosi, timvuka tia Bakristo. Mbo wutubakisa mu sarila malongi mata landa: “Tala ti bakembele tinama timosi, binama biabiansoni biyangalala na yandi.” (1 Kor. 12:16-18, 26) Buna, musamu wa nsayi bu wuturilaka muntu wakaka, tabâ na nsayi mu bungu dia yandi, kani tabâ na timbanda. Tabongeno tifwani tia Yonatane mwana wa mutinu Sawule. Bu basola Davide mu bâ mutinu ha tibuka tia yandi, ka yizi’â sa timbanda ko. Yandi wayizi tindisa Davide. (1 Sam. 23:16-18) Ngano tulendi songela luzolo na mbote ntiana Yonatane?

25 AVRIL–1er MAI

BIMVWAMA BIA ZU DIA NZAMBI | 1 SAMWELE 25-26

“Ngano na mutununu yirikilaka misamu?”

ia-F 78 par. 10-12

Yandi wasarila mayela

10 Bwe binwani bio biakipila mivungi? Lenda dia bâ nawu dia labaka tindongo timosi timosi ntangu zakaka, kâ ka bayirika wo ko. Bawu bayizi kengerela ntwila na bisari bia Nabale. (Tanga 1 Samwele 25:15, 16.) Misamu mia mpasi miamingi miaketi tûrila mivungi na bibulu. Bibulu bia sangi biabingi biabâ kûna. Mpe mu bungu ti mu ndilu ya side ya nsi’awu babâ, nkontolo za mivi mia nsi za nzenza zazingi zabâ.

11 Kwe Davide musamu wa mpasi wabâ mu dikila bantu bandi ku sese. Ntiangu katambika bantu 10 mu lomba lubakusu kwe Nabale. Davide wasola ntangu ya mbote. Ntangu yi beri katulaka mîka mia bindongo, ntangu ya malaki yeri, yi beri bâka na tifu tiatomo diaka na tia kabaka. Yandi wasola nzonzolo ya mbote bu kasarila ntêlo za buzitu. Davide wasarila nzonzolo ya “mwana’aku Davide” kampe, mu bungu ti wazaba ti Nabale wa kula weri. Ngano Nabale bwe kabongela wo?​—1 Sam. 25:5-8.

12 Nabale wabaka nkesi! Tisari ti bazonzeleke ha mbatukulu tiatâ: “Yandi watomo ba finga”. Na lukokoto, wayizi kala mu kaba musunia, mamba na ndimpa diandi. Yandi wabongela Davide ntiana muntu wa mpamba, mpe wamufwanakasa na ngamba yeri kwe dioke. Kampe Nabale mabanza mamosi ma bâ nandi na Sawule weri yinaka Davide. Kâ, ni wubâ Nabale, ni wubâ Sawule, ka babâ na mabanza ma Yehova ko. Nzambi Davide keri zoloko, mpe mbo keri mu bongela ntiana muntu waketi bâ mutinu ku Israele. Ka ntiana ngamba ya bukolo’â ko​—1 Sam. 25:10, 11, 14.

ia-F 80 par. 18

Yandi wasarila mayela

18 Ku lweka lumosi, [Abigayile] walwata dema dia bakala diandi mpe walomba kwe Davide mu mu lemvokela. Na mabanza ma delakana, wabakula ti bakala diandi tizoba tieri ntiana bweri wasongelaka nkumbu’andi bu katâ kwe Davide ti mbo kaketi moneka buzoba tala ti wasemba muntu wa mpila yo. Ku lweka lwakaka wasongela lukwikulu mu Davide. Yandi wazaba ti timonikisi tia Nzambi tieri mpe “mizingu mia Yehova keri nwanaka.” Wazaba mpe ti Yehova wamukanisina timfumu mu bungu ti watâ: “Diangana Yehova [. . .] mbo kakuzakasa ngatu wabâ ntwarisi ya Israele.” Mpe walomba kwe Davide mu lembo yirika musamu waketi mu natisa dema dia menga peleko waketi mu natina maniongo. (Tanga 1 Samwele 25:24-31.) Ntia mpila nzonzolo ya nsayi na lutindusu!

Bimvwama bia timpeve

ia-F 80 par. 16

Yandi wasarila mayela

16 Ngano wuzololo tâ ti Abigayile lutumu lwa bakala diandi kakolamana? Kâni. Bambuka ti Nabale mu mpila ya mbi kayizi bongela tisari tia sola Yehova mpe waketi hondesa bantu balembo zaba musamu. Tala ti Abigayile ka sa tima ko, mbo kaketi nata dema dia bakala diandi. Buna, wafweti toko lemvokela Nzambi ntete kalemvokela bakala diandi.

    Mabuku ma Lari (1996-2025)
    Duka
    Kota
    • Kilari
    • Tambika
    • Bima bi zololo
    • Copyright © 2025 Watch Tower Bible and Tract Society of Pennsylvania
    • Misiku mia sarila
    • Misiku mia mansweki
    • Paramètres de confidentialité
    • JW.ORG
    • Kota
    Tambika