Ngano lukwikulu lwe naku mu mpila Yehova yi kayirikilaka misamu?

1-2. a) Mu bungu dia nti bantu babîngi balembo bêlaka na lukwikulu mu bamfumu? b) Nti tutaluzula mu timoko ti?

LUMBU ti bantu ka babingi’â ko babâka na lukwikulu mu bamfumu. Mbo bamonaka ti guvernema na misiku miawu mbo zivulu kengerelaka kwa bamvwama na bantu bê na lutumu, kâ ka zibakisaka bamputu ko. Bibila mbo ditâka ti: ‘Muntu ngolo zandi kasarilaka mu timuna mpwana’andi.’ (Ekl. 8:9) Mfumu za mabundu makaka mbo ziyirikaka misamu mia mbi.Misamu mio mbo misaka ti bantu ka bavutuandi bâ na lukwikulu mu Nzambi. Ntiangu bu tulongokaka Bibila na muntu, tufweti mu bakisa mu kurisa lukwikulu lwandi mu Yehova na bantu ba kasarilaka ha mutoto.

² Wa matieleka, ka milongoki’â ko kwa mia Bibila mifweti bâ na lukwikulu mu Yehova na mu organizasio’andi. Ni bu sa ti tûka ntama twe mu matieleka, kani kabwe ka tufweti’â takondo lukwikulu ko ti ntangu zazansoni mpila yi sarilaka Yehova ya mbote kwa yibâka. Ntangu zakaka, misamu milendi sa ti lukwikulu lweto ka lubândi ngolo. Mu timoko ti, mbo tumona misamu mitatu milendi sa ti timinu tieto tiakota mu ntontolo: 1) bu tutangaka binsamu biakaka bie mu Bibila, 2) bu tubakaka lutwalusu lutûkaka kwe organizasio ya Yehova, mpe 3) bu tubwabana na misamu mia mpasi mu bilumbu bita kwiza.

BÂ NA LUKWIKULU MU YEHOVA BU TANGAKA BIBILA

3. Ngano binsamu biakaka bie mu Bibila bwe bilendi sila ti takondo lukwikulu mu Yehova?

³ Bu tukwe tangi Zu dia Nzambi, tulendi kwizi bâ na biyuvu mu bungu dia mpila Yehova yi kabongela bantu bakaka na mu bungu dia nzengolo zakaka zi kabonga. Mu tifwani, mu buku dia Lutangu, mbo tutangaka ti Yehova wazengela Musi-Israele wumosi lufwa mu bungu ti nkuni katota mu lumbu tia Sabala. Mu buku dia 2 Samwele mbo tumonaka ti, ha manima ma mivu, Yehova walemvokela mutinu Davide bu kasa bunsuza na bu kahonda muntu. (Lut. 15:32, 35; 2 Sam. 12:9, 13) Tulendi tiyula: ‘Mu bungu dia nti Yehova kalemvokela Davide wahonda muntu mpe wasa bunsuza, kâ kazengela lufwa kwe Musi-Israele wakaka wayirika musamu weri monekaka wa fioti?’ Mu hanina tiyuvu tio mvutu, tataluzuleno misamu mitatu mi tufweti lundaka mu mabanza meto bu tutangaka Bibila.

4. Ngano bwe Mbatukulu 18:20, 21 na Lubambu 10:17 ziyikilaka lukwikulu lweto ngolo mu nzengolo za Yehova?

⁴ Ntangu zakaka, Bibila ka ditâka misamu miamiansoni ko mitariri tinsamu tie mu kati. Mu tifwani, tuzebi ti Davide watomo soba mabanza mu bungu dia masumu mandi. (Mik. 51:2-4) Kâ muntu wadiata musiku wa Sabala, ntia mpila muntu weri? Ngano walomba mulemvo mu bungu dia musamu wu kayirika? Ngano misiku mia Yehova kakolamana mu ntama? Ngano ka sa keba ko peleko wakala ndwengosolo zi beri mu hanaka? Bibila ka ditâka wo ko. Kâ, tulendi bâ na lukwikulu ti: kani kabwe Yehova ka kondolo’â buderede ko. (Lub. 32:4) Nzengolo zandi mu misamu mia matieleka zisikamanaka, ka zisikamanaka mu misamu mi tâka bantu ko, mu mabanza ma mbi ma bantu ko peleko mu misamu mitumaka bantu mu bâ na mbanzulu zilembolo za delakana. (Tanga Mbatukulu 18:20, 21; Lubambu 10:17.) Bu tutomo longoka misamu mitariri Yehova na misiku miandi, mbo tukurisa lukwikulu lweto mu nzengolo zandi. Ni bu sa ti tinsamu timosi mu Bibila tisaka ti tatiyula biyuvu bi tulendi lembo bakila mvutu bwawu bu, misamu miamîngi mi tuzebi mu Nzambi’eto mbo mituhanaka lukwikulu ti ‘Yehova nkwa buderede mu nzila zandi zazansoni.’​—Mik. 145:17.

5. Mu bwe masumu meto masobeselaka mpila’eto ya sarila buderede? (Tala mpe kaku tie na mutu-diambu “Masumu mbo masaka ti ntangu zakaka ka tutomoandi bakula misamu.”)

⁵ Mpila’eto ya sarila buderede ka yena ya lunga ko mu bungu ti bantu ba masumu twena. Nzambi watusala mu tifwani tiandi, buna mbo tuzoloko ti bantu babongelaka bampwana’awu mu mpila ya delakana. (Mba. 1:26) Kâ, mu bungu ti bantu ba masumu twena, tulendi mwina musamu mu mpila ya mbi ni bu sa ti mbo tuta banza ti misamu miamiansoni mia tuzebi. Mu tifwani, bambukeno nkesi zabaka Yonase mu ntangu Yehova yi kabonga nzengolo ya lemvokela bantu ba ku Ninive. (Yon. 3:10–4:1) Kâ taleno misamu miayôka mu bungu ti Yehova wabalemvokela. Bantu yôka 120 000 basoba mabanza, bayizi vuka! Diangana Yonase wafweti soba mpila’andi ya mwina misamu, ka Yehova ko.

6. Mu bungu dia nti Yehova kalembolo na nsatu ya tu bangurilaka nzengolo zandi?

⁶ Yehova kena na nsatu ko ya bangula nzengolo zandi kwe bantu. Wa matieleka, mu ntangu ya ntama Yehova wahana nzila kwe bisari biandi mu zonzela mabanza mawu mu nzengolo zi kabonga peleko zi kaketi bonga. (Mba. 18:25; Yon. 4:2, 3) Mpe ntangu zakaka wabangula nzengolo zandi. (Yon. 4:10, 11) Kâ, Yehova kena na nsatu ko ya tu bangurila ka mu bungu dia nti kabongele nzengolo eyi peleko eyi. Mu bungu ti ni Yandi watusala, kena na nsatu ko tamuhana nzila ya yirika musamu.​—Iza. 40:13, 14; 55:9.

LUKWIKULU MU YEHOVA MU NTANGU YI TUBAKAKA LUTWALUSU

7. Ngano ntia musamu wulendi bâ mpasi kwe beto, mpe mu bungu dia nti?

⁷ Kampe, bamana tâ ti Yehova misamu mia sungama kwa kayirikaka, mbo tusingasa wo. Kâ wulendi bâ musamu wa mpasi kwe beto mu kwikila bantu ba kasarilaka ha mutoto. Tulendi tiyula tala ti bantu bê na lutumu mu organizasio, lutwalusu lwa Yehova balandaka peleko lwa bawu beni. Kampe mu ntangu ya Bibila, bantu bakaka ni bo beri banzilaka. Tataluzuleno bifwani bi tuzonzele mu paragrafe 3. Kampe muntu wa kanda dia muntu wadiata musiku wa Sabala, mbo kaketi tiyula tala ti Mose, wa matieleka wazonza na Yehova ntete bazengela muntu wo lufwa. Ndiku ya Uriya Muhitite, weri na mukento wasa bunsuza na Davide, mbo kaketi banza ti Davide wasarila timfumu tiandi tia mutinu mu dioka nsembolo yamudelakana. Yehova lukwikulu lwe nandi mu bantu ba kanoma mu twarisa organizasio na timvuka. Buna, tamana lembo bâ na lukwikulu mu bantu bo, ka tulendi’â tatâ ko ti lukwikulu lwe neto mu Yehova.

8. Ntia tintwari tie ha kati dia misamu mie mu Bisalu 16:4, 5 na mpila yi sarilaka timvuka tia Bakristo lumbu ti?

⁸ Lumbu ti, Yehova mbo katwarisaka lweka lwa organizasio’andi ha mutoto, mu nzila ya “ngamba ya kwikama na ya ndwenga.” (Mat. 24:45, NWT) Ntiana kwa bweri Timvuka titwarisaka mu mbandu ya ntete, ngamba yo mbo yitwarisaka kanda dia Nzambi mu nza ya mukaka mpe mbo yihanaka lutwalusu kwe bakuluntu mu timvuka. (Tanga Bisalu 16:4, 5.) Bakuluntu, mbo basalaka ngatu bimvuka bialanda lutwalusu lo. Mbo tusongela ti lukwikulu lwe neto mu mpila Yehova yi kayirikilaka misamu bu tulanda lutwalusu lu tubakaka mu nzila ya organizasio na ya bakuluntu.

9. Mu ntia ntangu wulendi bâ musamu wa mpasi mu singasa nzengolo zi bongaka bakuluntu, mpe mu bungu dia nti?

⁹ Ntangu zakaka wulendi bâ musamu wa mpasi mu singasa nzengolo zi bongaka bakuluntu. Mu tifwani, mivu miayôkele, bimvuka na bizunga biabingi basobele peleko bavutulu yirika. Bakuluntu balombele kwe bisamuni biakaka mu vukana na timvuka tiakaka mu tomo sarila bibuka bia zakala bie mu Nzo zeto za Nsambululu. Bamana tu lomba mu kwenda mu timvuka tia môna, wulendi bâ musamu wa mpasi kwe beto mu sisa ndiku zeto na kanda dieto. Ngano bakuluntu lutwalusu lwa ku mazulu babakaka lubatêlaka ka kwe balendi tambika muna tisamuni? Kâni. Musamu wo wulendi sa ti wabâ musamu wa mpasi kwe beto mu landa lutwalusu lu batuhana. Kâ Yehova lukwikulu lwe nandi mu mpila bakuluntu yi babongelaka nzengolo; buna beto mpe tufweti ba sila lukwikulu.b

10. Tintwari na Bahebre 13:17, mu bungu dia nti tufweti singasalaka nzengolo za bakuluntu?

¹⁰ Mu bungu dia nti tufweti singasalaka nzengolo zi bongaka bakuluntu ni bu sa ti nzengolo zango ka zena buna bu tuzololo ko? Mu bungu ti bu tusila bo mbo tusingasa bumosi mu kati dia kanda dia Nzambi. (Efz. 4:2, 3) Bimvuka mbo bikulaka mu ntangu bantu babansoni basingasaka nzengolo zi bongaka bakuluntu na kuluka kwakwansoni. (Tanga Bahebre 13:17.) Musamu wuyôkele mfunu ni wena’eti mbo tusongela kwe Yehova ti lukwikulu lwe neto mu Yandi bu tubâ na lukwikulu mu bantu ba kasola mu tu kipa.​—Bis. 20:28.

11. Nti bilendi tu bakisa mu yika lukwikulu lweto ngolo mu lutwalusu lu tubakaka kwe bakuluntu?

¹¹ Tulendi yika lukwikulu lweto ngolo mu lutwalusu lu tubakaka kwe bakuluntu, bu tubakulaka ti bu bazonzelaka misamu mitariri timvuka sambila batoko sambilaka mu baka mpeve santu. Mbo batomo taluzulaka mitieno mia Bibila, mpe mbo balandaka lutwalusu lu hanaka organizasio ya Yehova. Musamu wu batomo zoloko ni mu tâ Yehova nsayi na mu kipa kanda diandi mu mpila yiyôkele. Mpangi zo za kwikama zizebi ti Nzambi mbo katomo kipaka mpila yi bakipilaka kanda diandi. (1 Pi. 5:2, 3) Tabambukaka musamu ewu: Mu nza ya kabana mu bungu dia mukanda nitu, mabundu, na misamu mia politike, kanda dia Yehova mu bumosi diena mu sambila Nzambi ya yimosi ya matieleka. Diangana lusakumunu kwa lwa Yehova lusaka ti musamu wo wayilama mu organizasio’andi!

12. Ntia misamu bakuluntu bafweti taluzula mu zaba tala ti muntu wusobele mabanza?

¹² Yehova wahana kwe bakuluntu dema dia kengerela timvuka ngatu tiabâ tia tsema. Mukristo wamana yirika disumu dia dinene, Yehova mbo kazoloko ti bakuluntu batala tala ti muntu wo wulendi tatamana mu bâ mu timvuka. Mpe bafweti dinga mu tomo zaba tala ti muntu wo wusobele mabanza. Muntu wo wulendi tâ ti mabanza ma kasobele, kâ ngano misamu mi kayirikiri mia kata tomo yina? Ngano nzengolo kabongele ya lembo vutu karila disumu di kayirikiri? Tala ti ndiku za mbi zimuneti mu yirika disumu, ngano wa kubama wena mu honda bindiku bio? Bakuluntu mbo basambilaka Yehova, mbo batomo taluzulaka misamu na mabanza ma Bibila, mpe mbo batomo taluzulaka mio mi ta banza muntu mu bungu dia musamu wu kayirikiri. Ha manima mbo babongaka nzengolo tala ti muntu wusumukini wulendi tatamana mu bâ mu timvuka. Ntangu zakaka, bafweti mu katula mu timvuka.​—1 Kor. 5:11-13.

13. Ntia lwaka lulendi bâ neto tala ti bakaturi ndiku’eto mu timvuka peleko muntu wa kanda dieto?

¹³ Ngano bwe lukwikulu lweto mu bakuluntu lulendi kotela mu ntontolo? Tala ti muntu wu bakaturi mu timvuka ka yena ndiku’eto ko peleko muntu wa kanda dieto ko, ka wubâ musamu wa mpasi ko kwe beto mu tambula nzengolo ya bakuluntu. Kâ tala ti ndiku’eto yena, tulendi tiyula tala ti bakuluntu misamu miamiansoni mia bataluzuri, peleko nzengolo yi babongele ni yo mpe yi bongele Yehova. Ngano nti bilendi tu bakisa mu mwina nzengolo yo mu mpila ya mbote?

14. Nti bilendi tu bakisa tala ti bakuluntu babongele nzengolo ya katula ndiku’eto peleko muntu wa kanda dieto mu timvuka?

¹⁴ Tufweti bambukaka ti katula muntu mu timvuka musamu wena wa kubika Yehova. Mbo wunataka ndandu kwe timvuka na kwe muntu wusumukini. Tala ti muntu wuyirikiri masumu mpe wulembolo soba mabanza wutatamane mu bâ mu timvuka, wulendi tuma bantu bakaka mu yirika masumu. (Nga. 5:9) Mpe muntu wo wulendi mona ti disumu diandi ka diena dia dinene ko, mpe lendi mona ti kena na nsatu ko ya soba mabanza mandi na nsalulu zandi ngatu kavutu bâ na tindiku tia mbote na Yehova. (Ekl. 8:11) Tulendi bâ na lukwikulu ti bu babongaka nzengolo ya katula muntu mu timvuka, bakuluntu mbo babongelaka dema diawu na bunsungu. Mbo bazabaka ti, ntiana mfundisi za mu ntangu ya bala ba Israele ‘ka mu bungu dia bantu’â ko bafundisilaka kâ mu bungu dia Yehova.’​—2 Nta. 19:6, 7.

BWE LUKWIKULU MU YEHOVA LUTUBAKISILA BWAWU BU NA MU BILUMBU BITA KWIZA

15. Mu bungu dia nti tufweti bêla na lukwikulu mu lutwalusu lwa Yehova bwawu bu yôka mu ntama?

¹⁵ Mu bungu ti nsuka ya nza yi ka yisiri’â mala ko, ni mu ntangu yi tufweti bâ na lukwikulu mu mpila Yehova yi kayirikilaka misamu yôka mu ntama. Mu bungu dia nti? Mu bungu ti, mu ntangu ya mpasi ziyôkele tulendi baka ntumunu zimoneka ntiana’eti za nzenza zena, ka zena za delakana ko peleko mpasi zena mu landa. Wa matieleka, Yehova ka tu monekena ko mu tu zonzela. Kampe mbo katuhana lutwalusu mu nzila ya bantu ba kasarilaka. Ka yibâ ntangu ko ya bâ na ntembe mu lutwalusu lwandi peleko ya tiyula: ‘Ngano wa matieleka wena ti lutwalusu lo kwe Yehova luta tûka, peleko mabanza kwa mena ma mpangi zita tu twarisa?’ Ngano mbo bâ na lukwikulu mu Yehova na mu organizasio’andi mu ntangu yo ya mfunu? Mvutu mbo zizabakana mu mpila yi bongelaka lutwalusu lutûkaka kwe bantu Nzambi ba kasarilaka bwawu bu. Wamana bâ na lukwikulu mu lutwalusu lu bakaka lumbu ti, mpe wamana lwa tumamana, kampe ka wubâ musamu wa mpasi ko kwe nge mu tumamana mu ntangu ya mpasi ziyôkele.​—Like 16:10.

16. Mu bilumbu bita kwiza, mu ntia mpila lukwikulu lweto mu nzengolo za Yehova lulendi kotela mu ntontolo?

¹⁶ Tufweti mpe tomo banzaka mu mpila yi tubongela nzengolo za Yehova ku nsuka ya nza yi ya mbi. Mu ntangu yi, tivuvu tie neto mu bungu dia bantu balembo sarilaka Yehova, mu kati na bantu ba kanda dieto. Kâ mu ntangu ya Armagedo, Yehova, mu nzila ya Yezu, mbo kabonga nzengolo ya mansukina mu bungu dia bawu. (Mat. 25:31-33; 2 Tes. 1:7-9) Ka beto’â ko tubonga nzengolo ya tâ ka nani baka mulemvo wa Yehova peleko kâni. (Mat. 25:34, 41, 46) Ngano mbo tubâ na lukwikulu mu nzengolo za Yehova, peleko mbo wubâ musamu wusa ti tatâ kuba? Mu bungu dia musamu wo, ni mu ntangu yi tufweti bâ na lukwikulu mu Yehova, ngatu tamusila lukwikulu mu bilumbu bita kwiza.

17. Bwe tubakila ndandu mu nzengolo za Yehova mu ntangu ya nsuka ya nza yi?

¹⁷ Banza ka bwe mona ku mutima mu nza ya môna ya Nzambi bu mona ndandu zi nata nzengolo za Yehova. Mabundu ma bungungu mbo mazimbakana, compagnie na guvernema zisarilaka bumbaki mpe zimwisaka bantu mpasi mbo zizimbakana. Mbo tubâ na nitu za wasa, bununu na lufwa ka bivutu’â kwa bâ ko. Satana na bademo bandi mbo babakanga mu yôkesa funda (1 000) dia mivu ku boloko. Misamu mia mbi mia nata bukolo bwawu mbo mizimbakana. (Nza. 20:2, 3) Diangana mbo tutomo bâ mu nsayi, mu bungu ti takwikila mpila Yehova yi kayirikilaka misamu!

18. Tintwari na Lutangu 11:4-6; 21:5 ntia malongi tulendi baka mu tifwani tia bala ba Israele?

¹⁸ Ngano luzingu mu nza ya môna ya Nzambi lulendi kwizi bâ na misamu mia mpasi, milendi kotesa lukwikulu lweto mu ntontolo mu mpila Yehova yi kayirikilaka misamu? Tataluzuleno misamu miayôka ha manima bala ba Israele bu babakûla mu bungamba ku Ezipte. Bakaka babatika mu kwe niunguti mu bungu ti mbo beri kondoko bidia bi beri diaka ku Ezipte, mpe babatika mu tsâla mane yeri ba hanaka Yehova. (Tanga Lutangu 11:4-6; 21:5.) Ngano tulendi kwizi bâ na mbanzulu za mpila yo ha manima ma mpasi ziyôkele? Ka tuzebi’â ko ka ntia tisalu tifwanakana mu tsemesa mutoto na mu sa ti malembe-malembe wabâ paradi. Kampe, mbo kubâ tisalu tiatingi tia sala mpe ha mbatukulu ka wubâ musamu wa fioti ko. Ngano mbo tuniunguta mu bungu dia bima bi tu hana Yehova mu ntangu yîna? Musamu wa matieleka ni ewu: Tamana tomo zolo misamu mi yirikaka Yehova lumbu ti, buna ka wubâ musamu wa mpasi ko mu tambula misamu mi kayirika mu ntangu yîna

19. Zonzela mabanza ma timoko ti mu bukufi

¹⁹ Tufweti bâ na lukwikulu ti ntangu zazansoni mpila Yehova yi kayirikilaka misamu ya sungama kwa yibâka. Tufweti bâ mpe na lukwikulu mu bantu Yehova ba kakwikilaka mu singasa ntumunu zandi. Kani kabwe kuzimbakanandi misamu mia tâ Yehova mu nzila ya mbikuri Izaya ti: “Ngolo zeno ni mu tatamana mu bâ ba dzuna na mu bâ na lukwikulu.”​—Iza. 30:15, NWT.