Biyuvu bia bitangi

Ha manima ma mbutukulu ya Yezu, mu bungu dia nti Yozefe na Mariya batatamana mu bêla ku Beteleyeme kani bakâla ku Nazarete kweri nzo’awu?

Bibila ka ditâka wo ko. Kâ mbo dihanaka bidimbu bia mbote bilendi songela ka mu bungu dia nti basila nsololo yo.

Mbazi yimosi yatêla Mariya ti mbo kaketi baka zimi, mpe mbo kaketi buta. Mbazi yo bu kahana nsangu zo, Mariya na Yozefe ku Nazarete beri bêlaka, dieri hata dia mbutukulu dia Yozefe ku Galile. (Like 1:26-31; 2:4) Ha manima, bu batûka ku Ezipte bakâla ku Nazarete. Yezu ni kûna kakurila, mpe wayizi bâ Musi-Nazarete. (Mat. 2:19-23) Ntiangu tubambukilaka Nazarete bu tuzonzelaka Yezu, Yozefe na Mariya.

Mariya muntu weri nandi mu kanda wu beri tâka Elizabete, mpe weri bêlaka ku Yuda. Mukento weri wa Nganga-Nzambi Zakari, mpe ni yandi wabuta Za Tibatisi. (Like 1:5, 9, 13, 36) Mariya waye tala Elizabetet, mpe wayôkesa ngonda 3 nandi ku Yuda. Ha manima Mariya wakâla ku Nazarete. (Like 1:39, 40, 56) Buna Mariya tizunga tia Yuda tia kazaba.

Ha manima, Yozefe wayizi tumamana musiku weri lombaka ti batsonekesa nkumbu. Buna Yozefe wakatuka ku Nazarete mu kwenda ku Beteleyeme, kweri bêlaka Davide, mpe yeri mbuka yi babikula ti Masiya ni kô kaketi butukila. (Like 2:3, 4; 1 Sam. 17:15; 20:6; Mika 5:2) Mariya bu kamana buta Yezu, Yozefe keri’â kêlaka ko ti Mariya kasa nzietolo ya yila ya mpila yo mu kâla ku Nazarete na mwana wubutukiri ka ntama ko. Batatamana mu bâ ku Beteleyeme, yeri ha titini tia kilometre 9 na Yerusaleme. Buna mbo waketi ba bakisa mu nata mwana ku Tempelo na mu hana kabu difwanakane.—Lev. 12:2, 6-8; Like 2:22-24.

Mbazi ya Nzambi yatêlaa Mariya ti mwana’andi mbo kaketi kwizi zakala ha muyâlu wa Davide mpe mbo kaketi kwizi bâ mutinu. Kampe Yozefe na Mariya bamona ti mfunu weri ti Yezu kabutukila ku mumvuka wa Davide. (Like 1:32, 33; 2:11, 17) Kampe babanza ti bubote batatamane mu toko bêla kô tii Nzambi bu kaketi ba têla ka nti biakaka baketi sa.

Ka tuzebi’â ko ntangu zikwa batiyôkesela ku Beteleyeme tii bwa tula bantu batangaka mbwetete (astrologues) kûna. Kâ tûka ntangu yîna, kanda diawu diayizi baka nzo, mpe Yezu ka vutu’â sâla bebe ko. (Mat. 2:11) Kampe kani Mariya na Yozefe bakâla ku nore, ku Nazarete, bayôkesa ntangu ya mwa yayingi ku Beteleyeme mu bêla kûna.

Erode wahana ntumunu ti bahonda bala babansoni ba babakala beri na mvula zole na balembo zalungisa. (Mat. 2:16) Mu bungu ti Yozefe na Mariya ndwengosolo ya Nzambi batibakila mu ntumunu yo, buna badioka ku Ezipte na Yezu, mpe babêla kûna tii ha manima ma lufwa lwa Erode. Mu bungu dia nti balembo kâla ku Beteleyeme? Yozefe wanata kanda diandi ku Nazarete mu lembo mona matimuna ma Arkelawuse weri mwana wa Erode, na mu landa ndwengosolo ya Nzambi. Kûna, lenda dieri nandi dia sansa Yezu na kondo kwa bunkuta, na mu bâ tisari tia Nzambi tia matieleka.—Mat. 2:19-22; 13:55; Like 2:39, 52.

Kampe Yozefe watifwila ntete Yezu kafwa mpe kaziburila bantu bakaka nzila mu kwenda ku mazulu. Buna Yozefe ha mutoto kavumbukila kwe ba fwa. Bantu babingi bamumona, mpe balendi mu yula misamu miasa ti yandi na Mariya batatamana mu bêla ku Beteleyeme ha manima ma mbutukulu ya Yezu.