ISOMO 10
Unamona Mutali Mukizi ku Mikundamano za Balongeki ba Yehowa?
Ndi use wamanwa ku mikundamano za Balongeki ba Yehowa? Ndi ntukundamanaga kuzo, mango ntunabogelabogela kukundamana kuzo ku limbizi lyobe litangi. Mango uneibuzya bunee: ‘Bikizi bikukitwa ku mikundamano zongo? Kabamba kakizi zili za mutali? Nu kabamba kakizi natunganana kukundamana kuzo?’ Mu lilino isomo, wamone buno, kukundamana gamozi na bango kwakukasye kugugumania bwida bwobe gamozi na Kalaga nu kwakukasye mu kalamo kobe.
1. Kabamba kakizi Balongeki ba Yehowa bekukundamanaga gamozi?
Musanzi umozi wa Biblia alosizye kabamba kasoga ka kukundamana gamozi na bango: “Munkatini mwa musanganano nasime Yehowa.” (Nimbo 26:12) Ono lelo tondi, Balongeki ba Yehowa bekumona mbogimbogi nene kwa kukundamana gamozi na bango. Mu kisi kinsania bekukundamana n’izinga kwa kukumbamina Kalaga, kumuganuna kutingila nimbo nu kumusega. Nu bekukundamanaga lingo ku misanganano minene mambizi masatu ku mwaka.
2. Wajigisye kikizi ku mikundamano zeitu?
Ku mikundamano zeitu, tukwigisyaga Kitondo kya Kalaga, nu ‘kukisula bwasibwasi’ (Soma Nehemia 8:8.) Gawakundamane kuzo, wajigisye byeingi ku kabamba ka Yehowa nu nkumu zage zakwangamia. Buwamenye byeingi ku kabamba ka lutundo lwekukulosyaga, ubuwamukunde nunse. Wamenye lingo buni bwenakukasya kuba na kalamo kasoga.—Isaya 48:17, 18.
3. Unamona mutali mukizi kwa kukundamana gamozi na bango ku mikundamano zeitu?
Yehowa atusega buno “tulindanie bweitu bweitu buno tube na lutundo nu makitilo masoga. Tatulekele kukundamana gamozi.” (Baebrania 10:24, 25) Ku mikundamano zeitu, wasange bantu bekwangana lebelebe, nu beli anga ugwe, bekutunda kwijigisya byeingi ku Kalaga. W’ungwe ku bekutendela meigisya ma Biblia mekubalindiaga mutima. (Soma Baroma 1:11, 12.) Wabe na kiziki kya kumenyana na babo beli na mbogimbogi aba buno bekukulumana na tunkunku, anga tuto tukukulumanaga nato basongana nu betesongana. U tubamba tumozi tukukita buno Yehowa atunde tukundamane gamozi na bango bindi binsania!
TUMENYININE
Lola buni bukukitwa mikundamano za Balongeki ba Yehowa nu menya mutali mukizi u unamona kwa kukundamana ku mikundamano zongo.
4. Mikundamano za Balongeki ba Yehowa
Bakristo ba nkungu za basingwa, bakundamanaga bindi binsania kwa kukumbamina Yehowa. (Baroma 16:3-5) Soma Bakolosayi 3:16, nu kusila ibuzye luno lubuzya:
Bakristo ba nkungu za basingwa, bakitaga kikizi kwa kukumbamina Yehowa?
Ono lelo, Balongeki ba Yehowa nubo bekukundamana gamozi bindi binsania ku Mazumba mabo ma Bukota. Kwa kumona buni bukutingaga mikundamano zabo, lola VIDEO. Nu kusila, lola kilimelime kyalosya bukutingaga mikundamano nu ibuzye zeno mbuzya zalemba.
Bikizi biwamona bikukitwa mu Numba za Bukota byasusana na bibyo biwasoma mu Bakolosayi 3:16?
Ndi wamona kintu kishembe kyakukasa nkasa za kukundamana ku mikundamano mu zeno video aba ku kino kilimelime?
Soma 2 Bakorinto 9:7, nu kusila ibuzye luno lubuzya:
Kabamba kakizi mikundamano za Balongeki ba Yehowa tazikulegagwa?
Gamozi na mwigisya wobe wa Biblia, lola bibyo byatendelwe ku mikundamano zalemba.
Kibe kikizi kya mikundamano kyakutananizya aba kiwamona buno kinakukasya nunse?
Ndi wamenyile?
Ku jw.org, unamona kiziki nu mu nkungu nkizi mikundamano za Balongeki ba Yehowa zikukitwaga mu kisi kinsania.
Ku mikundamano zeitu kukukitwaga nsumbi, kukutingaga tulolesio nu video. Mikundamano zikulinga nu kusila kwa lwimbo nu masego
Mu kibe kishembe kya mikundamano, b’ungwilizi benabuzibwa nu nti baakula
Bantu bansania basekelwa ku mikundamano—bikanga, betasonga aba betasongwa, bakungu nu bana
Mikundamano zeitu tazikulegagwa. Balongeki ba Yehowa tabekusegaga musanga aba tabekutingyaga kyanzi kya mayawali za nkaso
5. Muntu atunganana kukita magala buno abase ku mikundamano
Kengela tangi musagu wa kikanga kya Yesu. Kwa kubasa ku musanganano wa mwaka na mwaka, batungananine kwenda lugendo lwa bilometre 100 mu nzila za miduko kutukila ku Nazareti nu kwika ku Yerusalema. Soma Luka 2:39-42, nu kusila ibuzye zeno mbuzya:
Ndi ukukengela buno lugendo lwa kwenda ku Yerusalema lwasegile magala nunse?
Kabamba kakizi buli busoga ukite magala buno ubase ku mikundamano?
Ukukengela buno kuli mutali kwidindika kubasa ku mikundamano? Kabamba kakizi?
Biblia byatenda buno kukundamana gamozi kwa kukumbamina Yehowa kuli na mutali nunse. Soma Baebrania 10:24, 25, nu kusila ibuzye luno lubuzya:
Kabamba kakizi twatunganana kukundamana bindi binsania?
NDI MUNTU AKUSOLELA BUNEE: “Ntwatunganana kukundamana gamozi na bango. Unazindila tugu kwijigisya Biblia ku numba.”
Unakambya isanzo ikizi aba musagu mukizi wa Biblia ukulosya makengelo ma Yehowa?
MAKENGELO MANENE
Kukundamana ku mikundamano kwa kukasye kwijigisya byeingi ku Yehowa, kugugumania bwida bwobe gamozi nage, nu kumukumbamina gamozi na bango.
Mbuzya za kwikengelesya
Kabamba kakizi Yehowa atusega tukundamane gamozi na bango?
Wajigisye kikizi ku mikundamano za Balongeki ba Yehowa?
Ukukengela buno unamona ungo mutali mukizi ku mikundamano?
LONDA LINGO
Ndi ntukubogelabogela mikundamano? Lola wamulume umozi wabezaga na makengelo mabi ku kabamba ka mikundamano bw’abasile kutunda mikundamano.
Lola musikila umozi watananizibwe na mikundamano nu mpumba insania z’akitile kwa kwendelela kukundamana kuzo.
Lola buni bukwijungwaga bango ku kabamba ka mikundamano.
“Kabamba Kakizi Twatunganana Kwenda ku Mikundamano ku Numba za Bukota?” (Musagu wa ku Enternete)
Lola buni bwagalukile kalamo ka wamulume umozi wabezaga mwiti nu munyagi wa bikulo, kwa kukundamana ku mikundamano za Balongeki ba Yehowa.
“Natabangaga na Kilonge Kyane Kunsania Kunendaga” (Munara wa Mulinzi, 1 Mwezi wa 7, 2014)