Kututikwa Kwisulilwa Buni?
Ijakulo lya Biblia
Ndi muntu atutikwa nti iswa we unsania mu mazi nu kusila nti atuka mo.a Ukinsa Yesu atutikilwe mu luuzi. (Matayo 3:13, 16) Kulembana na bubo tondi, ukinsa wamulume mwetiopia asegile kututikwa gababasile ku kiziba kya “mazi.”—Misako 8:36-40.
Bwisulilwa bwa kututikwa
Biblia byalingimania kututikwa na kuyikwa mu nsinda. (Baroma 6:4; Bakolosayi 2:12) Kututikwa mu mazi kwalosya buno muntu akua ku misako zage zakitaga wakalazi nu kulinga kulama kalamo kato kwa kuba Mukristo wikasana ku Kalaga. Kututikwa, nu bibyo bikukitaga muntu kwa kubasila kututikwa, zili mpango zabikile Kalaga kwa kukasya muntu abe na kalenganio kasoga nu kulosya bukatizio mu kisansa kyasanine Yesu Kristo. (1 Petro 3:21) Ukinsa, Yesu igisizye buno Bakristo batunganana kututikwa.—Matayo 28:19, 20.
Ndi kututikwa mu mazi kukutikyaga bwagi?
Kilo. Biblia bigisya buno mikila zakasanine Yesu u zinatwengya tugu ku bwagi bweitu. (Baroma 5:8, 9; 1 Yoana 1:7) Buno muntu amone mutali ku kisansa kya bukuluzi kyakasanine Yesu, atunganana 1) kukatizia Yesu, 2) kugalukya kalamo kage buno alame bulingilingi na meigisya ma Yesu nu 3) kututikwa.—Misako 2:38; 3:19.
Ndi Biblia bigisya buno bana bato batutikwe?
Kilo, Biblia tabigisya bubo. Mu Biblia tamuli ikengelo lya kututika bana bato. Makanisa mamozi mekubezaga na bumba kwa kututika mwana muto (kwa kumukubulila aba kumutogizya mazi g’itoe), nu kumwinika izina.
Does the Bible teach infant baptism?
Kututikwa kwa Bakristo kuli kwa bantu beli na lugi lwakuka kwa kumenya nu kwitabizya “musagu musoga . . . wa Bukota bwa Kalaga.” (Misako 8:12) Bubo Bukusega tangi kungwa ku meigisya meli mu Kitondo kya Kalaga, kwitabizya meigisya mongo, nu kwigonga—lebelebe mwana ntenakita bubo.—Misako 2:22, 38, 41.
Lingo, Biblia byalosya buno Kalaga ekumona bana bato anga baswagibwa, u kutenda buno benga ku meiso mage ku kabamba ka bukatizio bwa babuti babo. (1 Bakorinto 7:14) Songo kututikwa kwa bana bato kwitabizibwa na Kalaga, kasi ntenamonile lingo bana bato anga baswagibwa ku kabamba ka bukatizio bwa babuti babo.b
Makengelo ma buza ku kabamba ka kututikwa kwa Bakristo
Makengelo ma buza: Kukubulila aba kutogizya muntu mazi kuli kusoga nu kuli tugu anga kwisa muntu we unsania mu mazi.
Bulili: Misagu insania za kututikwa zili mu Biblia zatendela kwisa muntu we unsania mu mazi. Anga, gabende mwigisibwa Filipo atutikile wamulume mwetiopia, “bagelile bobabili mu mazi” nu kumututika. Kusila, ‘batukile mu mazi.’—Misako 8:36-39.c
Makengelo ma buza: Gatenda Biblia buno numba insania zatutikilwe byatendela tondi bana bato babezaga mu numba. Anga, Biblia byatenda buno ku kabamba ka mulangi wa kikando ku mwino wa Filipi: “Atutikilwe, we nu ba numba zage insania.”—Misako 16:31-34.
Bulili: Musagu watendela kugalukibwa bukatizio bwa wozo mulangi wa kikando walosya buno babo batutikilwe bamenyile “idagi lya Mukota” nu mulangi wongo wa kikando “abogilebogile nunse, we nu bansania ba numba zage.” (Misako 16:32, 34) Bubo bwatukasya kumenya buno takuli mwana muto wa mu numba za wozo mulangi wa kikando watutikilwe, kubuno mwana ntenavwamile kumenya idagi aba Kitondo kya Yehowa.
Makengelo ma buza: Yesu igisizye buno bana bato batunganana kututikwa kwa kutenda buno Bukota buli bwa bana bato.—Matayo 19:13-15; Marko 10:13-16.
Bulili: Yesu ntatendelaga kututikwa gatendile bitondo bibyo. Tondo atendalaga ku kabamba ka bantu batananina kwingila mu Bukota bwa Kalaga batunganana kuba anga bana bato—kwa kwisigulizya nu kwitabizya kwigisibwa.—Matayo 18:4; Luka 18:16, 17.
a Kitondo kya Kigiriki kyisulwa “kututikwa” kyatukila mu bwisulilwa butangi bwa kitondo “kukokya.” Lola kitabu Theological Dictionary of the New Testament, Ibuku I, lusamba 529.
b Kitabu International Standard Bible Encyclopedia kyatenda bunee: “Mu Idagano Ito tamuli isanzo lyatendela kututikwa kwa bana bato.” Kitabu kyongo kyatenda lingo buno bubo bumba bwavwile kulembana na “makengelo ma buza ma kukutya nunse lututiko,” kwa kukengela buno kututikwa kukutikyaga bwagi bwa muntu.—Ibuku 1, nsamba 416-417.
c Kunsi kw’itoe ikeke “kututikwa (mu Biblia),” New Catholic Encyclopedia kwasanzwa bunee: “Buligo buno Kanisa ka wakalazi katutikaga bantu kwa kubakokya mu mazi.”—Ibuku 2, lusamba 59.