ISOMO 12
Kikizi Kyakukasye Kwendelela Kwijigisya Biblia?
Ndi muntu eli mu lugendo, ekubasila kumona bintu bisoga. Tondo lugendo luli na tunkunku twage. U buli go na kwijigisya Biblia. Kuli nkungu z’inibuzya muntu buno ndi enavwama kwendelela kwijigisya. Tondo kwidindika kwijigisya Biblia kuli na mutali mukizi? Kikizi kinakukasya buno ntusige kwijigisya ndi wakulumana na tunkunku?
1. Kabamba kakizi kwijigisya Biblia kuli kwa mutali?
Kitondo aba “Idagi lya Kalaga, likulamaga nu lili na magala.” (Baebrania 4:12) Biblia bili bya mutali nunse kubuno byatulosya makengelo ma Kalaga nu bubo bwekwijungwaga ku kabamba keitu. Byatukasya kuba na bumenyinino bwa bulili nu kilemanizio ku kabamba ka nkungu zikuvwa. Nu mutali munene nunse u buno, Biblia byatukasya kuba beida ba Yehowa. Kwijigisya Biblia kwatukasya kugalukya kalamo keitu kuba kasoga.
2. Kabamba kakizi buli busoga kukutya bulili bwa Biblia?
Bulili bwa Biblia bwasusana n’isuku lya mutali nunse. Ukinsa Biblia byatukakizia beiswe bansania bunee: “Kunza bulili aba ntubukunzie.” (Misumo 23:23) Ndi twakengela buno bulili bwa Biblia buli bwa mutali nunse, tun’idindika kwijigisya—aba mu nkungu mbibu.—Soma Misumo 2:4, 5.
3. Mu nzila nkizi Yehowa enakukasya kwendelela kwijigisya Biblia?
Yehowa Mubumbi wobe uli na magala nu Mwida wobe, ekutunda kukukasya buno ujigisye byeingi ku kabamba kage. Enakukasa “nkasa nu magala ma kukita” bubo. (Soma Bafilipi 2:13, NWT.) Lebelebe, ndi wijanizya nkasa nu magala ma kwijigisya aba ma kukambya bibyo biukwijigisya, Kalaga enakukasa mo. Ndi wijanizya magala ma kukinda tunkunku aba buguni, enakukasa mo. Bindi binsania sega Yehowa buno akukasye buno ntusige kwijigisya Biblia.—1 Batesalonika 5:17.
TUMENYININE
Lola buni b’unendelela kwijigisya Biblia aba buno uli na byeingi byakukita nu ndi kuli bantu bekukuzugila kwijigisya. Nu kuzinda wamone mu nzila nkizi Yehowa enakukasya buno ntusige kwijigisya Biblia.
4. Bika igisyo lyobe lya Biblia ga kiziki kitangi mu kalamo kobe
Mambizi meingi unaba na byeingi byakukita mu kalamo nu bubo bunakita bube bubibu kumona nkungu za kwijigisya Biblia. Tondo kikizi kinakukasya? Soma Bafilipi 1:10, nu kusila ibuzye zeno mbuzya:
Ku makengelo mobe, “bitondo bili bisoga” nunse u bikizi?
Buni b’unabika igisyo lyobe lya Biblia ga kiziki kitangi mu kalamo kobe?
Ndi wisa tangi misege mu mbeketi nu kuzinda wabika leno makozi, makozi mansania tameneingila
Ndi wisa tangi makozi, nti wamone bwa kwisa misege. U buligo bubo ndi wabika bitondo bya mutali nunse ga kiziki kitangi mu kalamo kobe, nti wakosye kubikita nu nti wabe na nkungu zakukita bingo
Kwijigisya Biblia kukukukyaga meijanizyo meitu ma mutima u kutenda nkasa zeitu za kumenya Kalaga nu kumukumbamina. Soma Matayo 5:3, NWT, nu kusila ibuzye luno lubuzya:
Tunamona mutali mukizi ndi twabika igisyo lyeitu lya Biblia ga kiziki kitangi mu kalamo keitu?
5. Idindike kwijigisya aba buno ukuzugilwa
Bango bantu benakutambya mutima buno ntujigisye Biblia. Tondo kengela musagu wa Francesco. Lola VIDEO, nu kusila ibuzye zeno mbuzya zalemba.
Mu zeno video, buni bwakitile bilemba nu nina wa Francesco g’abalosizye bibyo byajigisizye?
Kwidindika kwijigisya Biblia kwamulisizye mponga nkizi?
Soma 2 Timoteo 2:24, 25, nu kusila ibuzye zeno mbuzya:
Kikanga kyobe nu bilemba byobe bekutenda kikizi ku kabamba ka kwijigisya kwobe Biblia?
Bulingilingi na mamo masanzo, watunganana kukita kikizi ndi muntu ntekubogaboga kukumona ukwijigisya Biblia? Kabamba kakizi watenda bubo?
6. Lemanina Yehowa buno akukasye
B’ukwendelela kukunda Yehowa, unu buwatunde kumutananizya. Tondo unamona buno buli bubibu kukita migaluko mu kalamo kobe buno ulame anga bukutunda Yehowa. Ndi u buli lukita lwobe, kasi ntutambe mutima. Yehowa akukasye. Lola VIDEO, nu kusila ibuzye zeno mbuzya zalemba.
Mu zeno video, Jim akitile migaluko mikizi kwa kutananizya Yehowa?
Kikizi kyakubogyabogya ku musagu wage?
Soma Baebrania 11:6, nu kusila ibuzye zeno mbuzya:
Yehowa ekakita kikizi ku “babo bekumulonda” na komanizia, u kutenda buno bekwijigisya kumumenya nu kumutananizya?
Kulembana na lino isanzo, Yehowa ekwijungwaga buni gekumona ukwidindika kwijigisya Biblia?
NDI MUNTU AKUSOLELA BUNEE: “Kabamba kakizi ukwijigisya Biblia?”
Buni b’unamwakula?
MAKENGELO MANENE
Aba buno bunaba bubibu kwijigisya Biblia, tondo bunakukasya kubogelabogela kalamo milyalya. Wamone mponga za Yehowa ndi widindika nu kwendelela kumulemanina.
Mbuzya za kwikengelesya
Kabamba kakizi bulili bwa Biblia buli bwa mutali nunse kwobe?
Buni b’unabika “bitondo bisoga” nunse ga kiziki kitangi mu kalamo kobe?
Kabamba kakizi watunganana kusega Yehowa buno akukasye kwendelela kwijigisya Biblia?
LONDA LINGO
Lola itumbi inazi zakasizye bantu beingi kwa kwibikila nkungu za kwijigisya Biblia.
Lola mu nzila nkizi Yehowa akasizye mukikulu umozi widindikaga kutananizya Kalaga, aba buno iba wage ntatundaga bubo.
Lola mutali wamonile wamulume umozi kutingila nkiki za mukikulu wage.
Mambizi meingi Balongeki ba Yehowa bekukandikwa buno bekulekanukya bikanga. Ndi bubo buli bulili?
“Ndi Balongeki ba Yehowa Bekulekanukyaga Bikanga aba Bekubilindiaga?” (Musagu wa ku Enternete)