ISOMO 30
Batundwa Bobe Bakule, Benalama Lingo!
Lukuo lukutulisizya kabebe nu mbabazio. Ukinsa Biblia bikumana lukuo buno mwiti. (1 Bakorinto 15:26) Mu isomo lya 27, twijigisizye buno Yehowa ekakinda mwiti wongo. Tondo kuli kilemanizio kikizi ku babo bekasangwa bese bakua? Mu lilino isomo, twajigisye byeingi ku kabamba ka ingo idagano isoga lya Yehowa—ekasubanizya ma bilioni ma bantu ku kalamo buno babogelebogele kalamo milyalya. Ekabayukya kutuka ku bakuzi! Lebelebe ndi bubo bunakulungana? Bekayukibwa kwa kulama kuni, ndi mwigulu aba ga kisi?
1. Yehowa ekutunda kukita kikizi ku kabamba ka batundwa beitu bakule?
Yehowa ekutunda nunse kuyukya bakuzi nu kubasubanizya lingo mu kalamo. Yobu wamulume wabezaga na bukatizio atendile buno, Kalaga ntenamwibilinde genakule. Atendile buno ku Kalaga: “Ukammana nu nkakwitabila [mu nsinda].”—Soma Yobu 14:13-15.
2. Buni butwamenya buno bakuzi benayukibwa?
G’abezaga Yesu mu kisi, Kalaga amukasile magala ma kuyukya bakuzi. Yesu ayukizye kutuka ku bakuzi mukinga wa miaka 12 nu mwana wa musigala. (Marko 5:41, 42; Luka 7:12-15) Kusila, Lazaro mwida wa Yesu akule. Aba buno Lazaro akule nu kwabezaga kuse kwatinga bindi binazi nagayikilwe mu nsinda, Yesu amuyukizye. Kusila kusega ku Kalaga, Yesu alalukile n’iyuki nene bunee: “Lazaro, basa kumbuga!” Nu “wozo wabezaga mukuzi atukile”—mugimagima! (Yoana 11:43, 44) Kengela mbogimbogi zabende nazo kikanga nu beida ba Lazaro!
3. Kuli kilemanizio kikizi ku batundwa bobe bakule?
Biblia byalaga bunee: “Kukaba iyukilo.” (Misako 24:15) Babo bayukizibwe na Yesu tabendile mwigulu, babezaga na mbogimbogi za kuyukibwa nu kulama ga kisi. (Yoana 3:13) Anga bubo, Yesu ese bwigi kuyukya ma bilioni ma bantu buno babogelebogele kalamo milyalya mu Paradizo ga kisi. Yesu atendile buno “babo bansania beli mu nsinda [aba nsinda zikukengelwa, NWT]”—bekayukibwa—aba babo bese beibililwa bekayukibwa, kubuno beli mu makengelo ma Kalaga.—Yoana 5:28, 29.
TUMENYININE
Lola butitikizio bwa Biblia bukulosya buno bakuzi benayukibwa, nu bekayukibwa mu nkungu zikuvwa. Lola buni bunakubobelezia meigisya m’iyukilo lya bakuzi nu kukukasa kilemanizio.
4. Yesu alosizye buno enayukya bakuzi
Menya byeingi ku bibyo byakitile Yesu ku mwida wage Lazaro. Soma Yoana 11:14, 38-44, nu kusila ibuzye zeno mbuzya:
Buni butwamenya buno lebelebe Lazaro akule?—Lola mulindi 39.
Songo Lazaro abezaga mwigulu, ukukengela buno Yesu enamutikizye lingo mwigulu buno alame ga kisi?
5. Bantu beingi bekayukibwa!
Soma Nimbo 37:29, nu kusila ibuzye luno lubuzya:
Kuni kukalama ma bilioni ma bantu bekayukibwa?
Yesu ekayukya bantu beingi aba babo betakumbaminaga Yehowa. Soma Misako 24:15, nu kusila ibuzye luno lubuzya:
Nazi ukatunda kumona kweli gekayukibwa bakuzi?
Yesu enasasya kuyukya mukuzi anga bubo bukuyukyaga isé mwana wage wazombama
6. Meigisya m’iyukilo lya bakuzi menakubobelezia nu kukukasa kilemanizio
Musagu wa Biblia wa kuyukibwa kwa mukinga wa Yairo ukubobelezia bantu beingi bekukwilwa. Soma musagu wongo wa bulili mu Luka 8:40-42, 49-56.
Lwabusio lwa kuyukya mukinga wa Yairo, Yesu abwinde Yairo bunee: “Ntukue boba, katizia tugu.” (Lola mulindi 50.) Buni bunakukasya kilemanizio kya kuyukibwa . . .
gawakwilwa na mutundwa wobe?
ndi kalamo kobe keli gabibu?
Lola VIDEO, nu kusila ibuzye luno lubuzya lwalemba.
Mu nzila nkizi kilemanizio kya kuyukibwa kyabobelezizie nu kukasa magala babuti ba Phelicity?
NDI MUNTU AKUSOLELA BUNEE: “Buli bubibu kukatizia buno bakuzi bekalama lingo.”
Buni buli makengelo mobe?
Unakambya isanzo ikizi kwa kulosya buno kukaba iyukilo?
MAKENGELO MANENE
Biblia byatenda buno ma bilioni ma bantu bakule bekayukibwa. Yehowa ekutunda kubasubania lingo mu kalamo nu akasile Yesu magala ma kuyukya bakuzi.
Mbuzya za kwikengelesya
Yehowa nu Yesu bekwijungwa buni ku kabamba ka kuyukya bakuzi?
Ma bilioni ma bantu bekayukibwa bekalama kuni—ndi mwigulu aba ga kisi? Kabamba kakizi watenda bubo?
Kikizi kyakutitikizia buno batundwa bobe bakule benalama lingo?
LONDA LINGO
Lola nsungu zinakukasya ndi wakwilwa na mutundwa wobe.
Ndi lebelebe kanuni za Biblia zinakasya wozo wakwilwa?
Buni bunakita bana kwa kulwania kabebe ka kukwilwa na mutundwa wabo?
Ndi kukaba bantu bekayukibwa nu kwenda kulama mwigulu? Banazi u betekayukibwa?
“Kuyukibwa Kutuka ku Bakuzi Kwisulwa Buni?” (Musagu wa ku Enternete)